Əli Orucov: “Bu səbəbdən Putin Ermənistana rəsmi səfər etməyə maraqlı görünmür”
Ermənistanın baş naziri Nikol Paşinyan mətbuata açıqlamasında Rusiya ilə münasibətlərə toxunub. Paşinyan onun Moskvaya, Putinin isə Yerevana səfərinin hazırlandığını qeyd edib. Ancaq o, Putinin dəqiq hansı tarixdə Ermənistana rəsmi səfər edəcəyini deyə bilməyib. O jurnalistin bununla bağlı sualına “hələ dəqiq tarix yoxdur” cavabı verib: “Bu il bir neçə dəfə görüşəcəyik - məsələn, Avrasiya İqtisadi Birliyinin zirvə görüşü zamanı. Bununla yanaşı, ümid edirəm ki, bu il Vladimir Putin Yerevana rəsmi səfər edəcək”.
Bununla yanaşı, Paşinyan ölkədə baş verən “məxməri inqilab”ın “rəngli inqilab” kimi qələmə verilməsini qəbuledilməz adlandırıb: “Bizim üçün Rusiya cəmiyyətinin bütün zümrələrinin inqilabın mahiyyətini anlaması çox vacibdir. Təəssüf ki, bu günə qədər Rusiyanın ekspert dairələri baş verənləri “rəngli inqilab” kimi qələmə verməyə çalışırlar. Rusiyalı partnyorlarımızın baş verənlərdə nə geopolitik kontekst, nə də xarici ölkələrin təsirinin olmadığını anlamasını istəyirik. İnqilabımıza Rusiyada bəzilərinin “rəngli inqilab” təsəvvürü ilə baxması bizi təhqir edir”.
Göründüyü kimi, Rusiya Prezidenti hələ də Ermənistana rəsmi səfər etməyə tələsmir. Ermənistanda ötən ilin dekabrında keçirilən parlament seçkilərindən sonra yaranan yeni kabinetin fəaliyyəti də nəyisə dəyişə bilməyib. Ən başlıcası, bu, Paşinyanın apardığı xarici siyasətin uğursuzluğundan irəli gəlir. Yəni Paşinyan nə Qərblə işləri yoluna qoyub, nə də Rusiya ilə. Bir neçə dəfə səylər göstərsə də, V.Putinin Ermənistana rəsmi səfər etməsinə nail ola bilməyib. Bu baxımdan, yaranan vəziyyəti ekspertlər necə dəyərləndirirlər?
Məsələyə münasibət bildirən AMİP funksioneri Əli Orucovun fikrincə, Paşinyan uğursuzluğa məhkumdur: “Paşinyanın siyasəti də, bu siyasət üzərindən əldə edə bildiyi hakimiyyət də yalan və populizm üzərində qurulub. O, ağlabatmaz elə vədlərlə çıxışlar edirdi ki, erməni xalqı ilk baxışdan buna inanmışdı. Ancaq müəyyən müddət keçdikdən sonra yalan pərdəsi çəkildikcə, həqiqətlər və reallıqlar üzə çıxmağa başlayır. Ermənistan baş naizri Qərblə Rusiya arasında vurnuxmaqla öz populizminə dəstək qazanmağa səy göstərməkdədir. Lakin nə Qərbdən, nə də Rusiyadan istədiyi dəstəyi ala bilmir. Daxildə də narazılıqlar getdikcə geniş vüsət alır. Dağlıq Qarabağ problemi ilə də bağlı küncə sıxışdırılmaqdadır. Belə bir əlverişsiz vəziyyətin davamı isə N.Paşinyan hakimiyyətinin ömrünü qısaltmaqdadır. Paşinyan Putinlə görüşüb rəsmi Moskvanın mövqeyini bir qədər yumşaltmağa cəhdlər edir. Ancaq onun bu cəhdləri səmərə vermədi. Çünki Kreml Paşinyana inanmır və onun ciddi fiqur olduğunu düşünmür. Bu səbəbdən Putin Ermənistana rəsmi səfər etməyə maraqlı görünmür. Xatırlayırsınızsa, hakimiyyətə gələr-gəlməz, Paşinyan KTMT və Avrasiya İttifaqını şantaj etdi. Bəzi hədə-qorxular gəlməklə Ermənistanın müəyyən güzəştlər qazanmasına nail olmaq, özünü vacib sima kimi həzm etdirmək istədi. Lakin bunun cavabı elə sərt və gözlənilməz oldu ki, sonradan az qala yalvarmağa başladı. Məncə, Paşinyan ritorikasını da, siyasətini də dəyişməsə, sonu çox uzun çəkməyəcək”.
Vidadi ORDAHALLI
