Seyid Camal Əzimbəyli: “İnsanların təbəssümündə Prezident İlham Əliyevə olan böyük rəğbət açıq-aşkar özünü göstərirdi”
Məlum olduğu kimi, Prezident İlham Əliyev Ağsuda zəlzələnin nəticələrinin aradan qaldırılması ilə bağlı görülən işlərlə yerində tanış olmaq üçün adıçəkilən rayona səfər edib. Ağsuya səfəri zamanı Prezident rayon sakinləri ilə görüşüb, onlarla söhbət edib.
Eyni zamanda, ölkə başçısı Ağsu sakinlərinin ərizələrini qəbul edib. Görüşdə zəlzələnin nəticələrinin aradan qaldırılması ilə bağlı görülən işlər barədə danışılıb, Prezident sakinləri narahat edən məsələləri dinləyib. Dövlət başçısı müvafiq tapşırıq və tövsiyələrini verib. Daha sonra ölkə başçısı və xanımı Şamaxı rayonuna səfər edib.
Qeyd edək ki, 2019-cu il fevralın 5-də episentri Ağsu və İsmayıllı rayonlarının ərazisində olan zəlzələlər nəticəsində Şamaxı, İsmayıllı və Ağsu rayonlarında onlarla fərdi yaşayış evi qəzalı vəziyyətə düşdü. Sosial infrastruktur obyektlərinə ziyan dəydi. O zaman da ölkə başçısı zəlzələ bölgəsinə səfər edərək yerindəcə vəziyyətlə tanış oldu və sakinləri dinləyərək müvafiq göstərişlər verdi. Həmçinin, baş vermiş təbii fəlakətin nəticələrinin aradan qaldırılması tədbirləri haqqında sərəncam imzaladı. Ölkə başçısının təbii fəlakət bölgəsinə hər iki səfəri ictimaiyyətin böyük marağına səbəb olub. İstər təbii fəlakət baş verəndən sonra, istərsə də sonuncu səfəri maraqla qarşılanır.
Zəzələ bölgəsinə son səfəri zamanı yerli əhali ölkə başçısını daha böyük sevinclə qarşıladı. Nəzərə almaq lazımdır ki, çox qısa zamanda təbii fəlakətin nəticələrinin aradan qaldırılması üçün tədbirlərə start verildi. Bütün bunların operativ təşkilində və həyata keçirilməsində Prezident İlham Əliyevin müstəsna xidmətləri var. İctimaiyyət də bunun fərqindədir. Bu baxımdan ekspertlər sözügedən səfərlərdə ictimaiyyətin münasibətində hansı fərqləri görür və ümumən bunu necə dəyərləndirirlər?
Məsələyə münasibət bildirən şərqşünas Seyid Camal Əzimbəylinin sözlərinə görə, hər iki səfərdə ictimaiyyətin ölkə başçısına olan inamı özünü qabarıq şəkildə göstərdi: “Prezidentin zəlzələ baş verəndən sonra xalqın yanında olması təbii fəlakətdən zərər çəkən insanları ruhlandırdı. Onlarda bir daha əminlik yaratdı ki, ölkə başçısı onların problemlərinə biganə deyil. Nəticə də göz qabağındadır. Bir aydır zəlzələnin baş verməsinə baxmayaraq, artıq onun nəticələrinin aradan qaldırılması üçün ciddi işlər görülür. Dağılmış evlərin yerində yeniləri ucaldılır. Bu gedişlə qarşıdakı aylarda sakinlər yeni evlərinə köçəcəklər. Hansı bir ölkədə təbii fəlakətin nəticələri belə tez aradan qaldırılır? Deyərdim ki, dünyada ikinci belə ölkə təsəvvür etmək mümkün deyil. Elə ölkələr var ki, orada bənzər təbii fəlakətlərin vurduğu zərərlərin aradan qaldırılması illərlə vaxt tələb edir. Ancaq Azərbaycanda bu yöndə işlər daha operativ təşkil olunur. Təsadüfi deyil ki, Ağsuya səfəri zamanı ictimaiyyət nümayəndələri ölkə başçısını daha böyük coşqu ilə qarşıladılar. İnsanların təbəssümündə Prezident İlham Əliyevə olan böyük rəğbət açıq-aşkar özünü göstərirdi. Rayon sakinləri özlərini daha inamlı hiss edirdilər. Bütün bunları görməmək mümkün deyildi. Digər tərəfdən, müşahidələr göstərir ki, Prezidentin bölgələrə ardıcıl səfərləri, hər səfərindən sonra həmin rayonların sosial-iqtisadi inkişafının daha da sürətləndirilməsi məqsədilə görülən tədbirlər ölkənin hərtərəfli inkişafına, xalqın sosial müdafiəsinin gücləndirilməsinə xidmət edir. Ötən 15 ildə bölgələrin siması əhəmiyyətli dərəcədə dəyişib. Regionlar inkişaf edib. İş dalınca bölgələrdən paytaxta axın azalıb. Əlbəttə, bütün bunlar Prezident İlham Əliyevin ölkədə apardığı məqsədyönlü siyasət nəticəsində mümkün olub”.
Vidadi ORDAHALLI
