Fikrət Sadıqov: “Azərbaycandan olan bir qrup tələbə ŞKTR-in ali məktəblərində oxuyur”
Məlum olduğu kimi, Bakıda səfərdə olan Türkiyə Böyük Millət Məclisinin sədri Mustafa Şentop bir sıra görüşlər keçirib. Səfər çərçivəsində M.Şentop Milli Məclisin spikeri Oqtay Əsədovla görüşüb. Onun sözlərinə görə, Azərbaycan Türkiyənin xarici siyasətində önəmli yer tutur və Ankara regional və beynəlxalq səviyyədə Bakının maraqlarının müdafiəsinə can atır.
Spiker, həmçinin, Azərbaycanla Şimali Kipr Türk Respublikasının (ŞKTR – KKTC) dialoqunun əhəmiyyətini qeyd edib: “ŞKTR parlamentinin nümayəndə heyətinin Bakıya səfəri faydalı oldu. Azərbaycanın dəstəyi kiprli türklərin mənəvi durumu və Kiprdə münaqişənin ədalətli tənzimlənməsi baxımından vacibdir”.
Öz növbəsində, Milli Məclisin spikeri türkiyəli həmkarını yüksək vəzifəyə seçilməsi münasibətilə təbrik edib və ona işində uğurlar arzulayıb. Əsədov xatırladıb ki, bu günə qədər Bakı ilə Ankara arasında 230 müxtəlif saziş imzalanıb və 30 saziş də imzalanmağa hazırlanır.
Onu da qeyd edək ki, Azərbaycanın ŞKTR ilə yaxın münasibətləri mövcuddur. ŞKTR-də Azərbaycanın, Bakıda isə ŞKTR-in təmsilçiliyi mövcuddur. Bakıda keçirilən müxtəlif beynəlxalq toplantılara ŞKTR nümayəndələri də qatılırlar. ŞKTR-in Bakı nümayəndəliyi 1997-ci ildə açılıb və o vaxtdan fəaliyyət göstərir.
Bütün bu deyilənlərlə yanaşı, ümumilikdə, ŞKTR parlamentinin nümayəndə heyətinin Bakıya səfəri nə kimi nəticələr doğura bilər?
Məsələyə münasibət bildirən keçmiş diplomat, politoloq Fikrət Sadıqovun sölərinə görə, belə təmaslar Azərbaycanın ŞKTR ilə münasibətlərini daha da dərinləşdirə bilər: “Əvvəla Mustafa Şentopun səfəri Azərbaycanla Türkiyə arasında parlamentlərarası münasibətlərin daha da yüksək səviyyəyə qalxmasına öz müsbət təsirini göstərəcək. Çünki o, Türkiyə Böyük Millət Məclisinin yeni sədridir və ilk səfəri Azərbaycana edib. Bunun özü də özlüyündə bir göstəricidir. O ki, qaldı ŞKTR parlamentinin nümayəndə heyətinin Bakıya səfərinə, bu çox uğurlu keçdi. Azərbaycanın ŞKTR ilə münasibətləri var. Azərbaycandan olan bir qrup tələbə ŞKTR-in ali məktəblərində oxuyur. Azərbaycanla ŞKTR arasında iqtisadi və humanitar münasibətlər mövcuddur. Ancaq məlum səbəblərdən biz hələ ŞKTR-in müstəqilliyini tanımamışıq. Buna səbəb Dağlıq Qarabağ münaqişəsidir. Biz hər şeyi başa düşürük və anlayırıq ki, ŞKTR-də yaşayan türklər məcburi şəkildə bu addımı atıblar. O vaxt Kipr türklərinə qarşı etnik təmizləmələr baş verib və yaranan vəziyyətlə əlaqədar Türkiyə onları müdafiə edib. Bizim, hər halda, ŞKTR ilə diplomatik münasibətlərimiz olmasa da, digər əlaqələrimizi genişləndiririk. Hesab edirəm ki, belə səfərlər Azərbaycanla ŞKTR arasında münasibətlərin daha da dərinləşməsinə xidmət edəcək”.
Vidadi ORDAHALLI
