ABŞ Suriyadakı bütün hərbçilərini bu ölkədən çıxarmağa hazırlaşır. Baki-xeber.com xəbər verir ki, bu barədə ABŞ mediası xəbər yayıb.
Qeyd edilir ki, bu barədə qərar Suriyada İŞİD-in nəzarətində olan bölgələrin təmizlənməsindən sonra verilib.
Müdafiə rəsmilərinə istinad edən CNN bildirir ki, bu çıxış “tam” və “çevik” olacaq. “Reuters”, CNN və “Wall Street Journal”ın bildirdiyinə görə, ABŞ Suriyadan tamamilə çəkiləcək. “Reuters” ABD rəsmilərinə istinadən Suriyanın terror təşkilatı İŞİD-dən təmizlənmək üzrə olduğunu yazır. Xəbərlərdə ABŞ rəsmilərinin əvvəlki açıqlamalarından fərqli olaraq, bütün Amerika əsgərlərinin eyni vaxtda çəkiləcəyi bildirilir. CNN, təxminən 2 min ABŞ əsgərinin dərhal Suriyadan çıxarılması qərarının ABŞ prezidenti Donald Tramp tərəfindən verildiyini bildirir.
“Wall Street Journal” qəzeti, ABŞ rəsmilərinə istinadən bu addımın Trampla Türkiyə Prezidenti Rəcəb Tayyib Ərdoğan arasında keçən həftə baş tutan görüşündən sonra atıldığını yazır. Qeyd edilir ki, bu addım ABŞ-ın Orta Şərq strategiyasını ciddi təsir edəcək və İŞİD-lə mübarizəsilə bağlı şübhə oyandıracaq.
ABŞ-ın Suriyadan tam çəkiləcəyi xəbərlərinin ardından prezident Donald Tramp yazdığı tvitdə bunu təsdiqləyib: “İŞİD Suriyada məğlub edilib və bu, orada olmağın yeganə səbəbi idi”.
Ağ Ev və Pentaqon da xəbərləri təsdiqləyib. Ağ Ev ABŞ əsgərlərinin Suriyadan geri çəkilməyə başladığını bəyan edib. ABŞ rəsmisi geri çəkilmə qərarının Trampla Ərdoğan arasında son telefon danışığından sonra verildiyini deyib. Onun sözlərinə görə, telefon danışığından sonra qəbul edilmiş qərarların icrasına başlanıb.
Pentaqon da ABŞ əsgərlərinin Suriyadan çəkilməyə başladığını, ancaq yerli müttəfiqlərlə işbirliyinin davam edəcəyini bəyan edib. Pentaqon İŞİD-lə mübarizənin hələ bitmədiyini bildirib.
“Reuters”ə açıqlama verən bir ABŞ rəsmisi isə Dövlət Departamentinin Suriyadakı bütün personalının 24 saat ərzində bu ölkədən çıxarılacağını deyib. Rəsmi ABŞ əsgərlərinin isə 60-100 gün arasında Suriyadan tam çəkiləcəyini deyib.
Abş mediası isə Trampın, ABŞ əsgərlərinin 30 gün ərzində Suriyadan çəkilməsi barədə göstəriş verdiyini iddia edir.
Tramp bu ilin əvvəllərində ABŞ qoşunlarının çox tezliklə Suriyadan çıxarılacağını vəd etmişdi. Ancaq ABŞ-ın müdafiə naziri və digər rəsmilər İslam Dövlətinin yenidən qüdrətlənməsinin qarşısını almaq üçün qüvvələrin orada saxlanmasını istəyirdi.
Vaşinqtonun qərarının İsrail və ABŞ-ın bölgədə dəstəklədiyi YPG/PKK-ya da çatdırıldığı bildirilir.
Qeyd edək ki, hazırda Suriyada 2 minədək ABŞ hərbçisi var. Bundan başqa ABŞ hazırda Suriyanın şimalında, terror təşkilatı YPG/PKK-nın nəzarətində olan ərazilərdə 15 hərbi bazası var, üç bazanın tikintisi isə davam edir.
Onu da xatırladaq ki, Türkiyə yaxın günlərdə Suriyada Fərat çayının şərqindəki ABŞ-ın dəstəklədiyi PKK/YPG terror qruplaşmasına qarşı hərbi əməliyyata başlamağa hazırlaşır. Məhz belə bir vaxtda ABŞ-ın Suriyadan çəkilmə qərarı verməsi diqqət çəkir.
