Azərbaycanın Sərhəd Qoşunlarını Ermənistanla sərhədin Qazax və Ağstafa rayonları istiqamətindən keçən hissəsində postlara yerləşdirməsi işğalçı Ermənistanda getdikcə daha böyük təşviş və narahatlıq yaratmaqdadır.
Xatırladaq ki, Azərbaycanın sərhəd qoşunlarını Ermənistanla sərhədin Qazax və Ağstafa istiqamətinə yerləşdirdiyini Dövlət Sərhəd Xidmətinin rəisi, general-polkovnik Elçin Quliyev açıqlayıb. O bildirib ki, Ali Baş Komandanın bu əmri Sərhəd Qoşunlarının yüksək döyüş hazırlığına və təchizata malik olmasının nəticəsidir.
Müdafiə Nazirliyi isə bildirir ki, dövlət sərhədinin bu hissəsində, əməliyyat şəraiti baxımından nisbətən sabit və düşməndən 2000 metrədək uzaqlıqda yerləşən postlar Dövlət Sərhəd Xidmətinin bölmələrinə təhvil verilib: "Eyni zamanda Müdafiə Nazirliyi bölmələrinin döyüş təcrübəsi nəzərə alınaraq, onlar hazırda Qazax və Ağstafa rayonlarının sərhəd xəttində ağır silah və döyüş texnikası ilə sərhədçilərə dəstək göstərir. Qeyd edək ki, sərhəd xəttinin qarşı tərəfində Ermənistan Daxili İşlər Nazirliyinin polis dəstələri növbə çəkir". Qeyd olunduğu kimi isə, Bakının bu addımları İrəvanda çox böyük təşviş yaradır. Erməni ekspert Taron Ovanisyan bildirir ki, Bakı bununla Nikol Paşinyan hakimiyyətinə yeni “aprel dərsləri” verməyə hazırlaşır: “Azərbaycan bildirir ki, Serj Sarksiyan hakimiyyətini məhz aprel savaşına görə itirdi. Paşinyan iqtidarı da Qarabağ münaqişəsinin nizama salınması üçün lazımi addımlar atmasa, Bakı aprel savaşını təkrarlaya biləcəyini istisna etmir. Bəzi postların sərhəd qoşunlarına verilməsi də yeni hazırlıqlardan xəbər verir”.
Ermənistan müdafiə nazirinin müavini Qabriel Balayan bildirib ki, baş verənlərlə bağlı erməni tərəfində informasiya var, amma açıqlanması hazırda mümkün deyil. “Azadlıq” radiosunun erməni xidmətinə açıqlamasında Qabriel Balayan bildirib: “Müdafiə Nazirliyində bu mövzu ilə bağlı informasiya var, amma bizim malik olduğumuz həmin informasiya hazırda açıqlanmaq üçün nəzərdə tutulmayıb”. Ermənistanın Qarabağa göndərdiyi ilk kəşfiyyat-diversiya batalyonunun komandiri olmuş Vova Vartanov isə vurğulayır ki, hazırda Azərbaycan tərəfində fəal hərəkətlilik müşahidə olunur: “Onlar təmas xəttinin həm Qarabağ, həm Naxçıvan istiqamətində fəal mühəndis işləri aparırlar. Qoşunların yerləşdirilməsi məsələsində müəyyən dəyişiklik edilir. Onların Sərhəd Qoşunları çox maraqlıdır, bizimkilərdən xeyli fərqlidir. Hazırda sərhəd qoşunları sərhədin Qazax istiqamətində yerləşdirilir. Bu isə o deməkdir ki, onlar bir briqadanı Ermənistanla sərhəddən götürüb, zərurət yaranarsa, Qarabağ istiqamətinə yönəldəcəklər”.
Erməni tərəfini narahat edən həm də odur ki, Azərbaycanın sərhəd qoşunları ağır və yüngül zirehli texnika, tank əleyhinə raket sistemləri, hava hücumundan müdafiə vasitələri və müxtəlif artilleriya sistemləri ilə təchiz edilmiş, tammiqyaslı döyüş əməliyyatları həyata keçirən qoşun birləşməsidir. Ermənistanın sərhəd qoşunlarının keçmiş komandanı, general-mayor Levon Stepanyan Qazax və Ağstafa istiqamətində qoşunların təmas xəttinə Sərhəd Qoşunlarını yerləşdirməsi barədə xəbərləri şərh edərkən bildirir ki, Azərbaycan Ermənistanla sərhədin strateji əhəmiyyətli istiqamətində müdafiəni zəiflədən deyil: “Xüsusən də Azərbaycan tərəfinin bəyanatında deyilir ki, burada məqsəd yeni ehtiyat qüvvələrin formalaşdırılmasıdır. İstisna etmirəm ki, bu, böyük siyasətdə “oyun” ola bilər və arxasında Ermənistan üçün nəsə yaxşı məqsəd dayanmır”.
Digər erməni analitiklərinin də əksəriyyətinin təxmini budur ki, Azərbaycan sərhədin bu hissəsində sərhəd qoşunlarını yerləşdirməklə Şəmkir korpusunun indiyədək sərhədin həmin hissəsini qoruyan bir briqadasını artilleriya qüvvələri ilə birlikdə Qarabağ istiqamətinə yönəldə bilər. Ekspert Tatev Ayrapetyan bu xüsusda bildirir: “Hələlik aydın deyil ki, həmin qoşunlar hara istiqamətləndiriləcək. Faktiki olaraq ehtiyat qüvvələr gücləndirilir. Hara, hansı rayona göndəriləcək, aydın deyil, amma böyük ehtimalla, Qarabağ istiqamətinə”.
Qeyd etdiyimiz kimi, Azərbaycanın sərhəd qoşunları təkcə sərhədlərin mühafizəsi funksiyasını yerinə yetirməyə deyil, eyni zamanda tammiqyaslı döyüş əməliyyatları, o cümlədən hücum əməliyyatları aparmağa imkan verən döyüş qabiliyyətinə və təchizata malikdir. Çünki Sərhəd Qoşunlarının silahlanmasında tanklardan tutmuş yüngül zirehli döyüş-nəqliyyat maşınlarına, Mi-35 hücum vertolyotlarına, o cümlədən tank əleyhinə raketlərə qədər müasir silah və hərbi texnika var.
Hər halda, baş verənlər fonunda Ermənistanın ciddi narahatlıqlar keçirməsi tamamilə başadüşüləndir. Azərbaycanın sərhəd qoşunları hansısa mümkün hərbi əməliyyatda Ermənistan qüvvələrini tatamilə darmadağın etmək gücündədir.
Tahir TAĞIYEV
