İbrahim Rüstəmli: “Ermənistan bu informasiya təxribatı ilə diqqəti ona yönəltmək istəyir ki…”
Azərbaycanın Sərhəd Qoşunlarını Ermənistanla sərhədin Qazax və Ağstafa rayonları istiqamətindən keçən hissəsində bəzi postlara yerləşdirməsinə dair Dövlət Sərhəd Xidmətinin rəisi, general-polkovnik Elçin Quliyevin bəyanatı ilə bağlı İrəvanda yaranmış panika davam edir.
Məsələyə Ermənistan Müdafiə Nazirliyi səviyyəsində münasibət bildirilib. Ermənistan müdafiə nazirinin müavini Qabriel Balayan bu məsələni şərh edərkən bildirib ki, erməni tərəfində bununla bağlı informasiya var, amma açıqlanması hazırda mümkün deyil: “Müdafiə Nazirliyində bu mövzu ilə bağlı informasiya var, amma bizim malik olduğumuz həmin informasiya hazırda açıqlanmaq üçün nəzərdə tutulmayıb. Bu addım heç bir halda bizim müdafiə imkanlarımıza, ayıq-sayıqlığımıza təsir etmir. Bizim xidmət davam edir”.
Erməni analitikləri isə təxmin edirlər ki, ola bilsin, Azərbaycan sərhədin bu hissəsində Sərhəd Qoşunlarını yerləşdirməklə Şəmkir korpusunun indiyədək sərhədin həmin hissəsini qoruyan bir briqadasını artilleriya qüvvələri ilə birlikdə Qarabağ istiqamətinə ata bilər. Tatev Ayrapetyan adlı ekspert bildirib ki, hələlik həmin qoşunların hara istiqamətləndiriləcəyi aydın deyil: “Faktiki olaraq ehtiyat qüvvələr gücləndirilir... Hara, hansı rayona göndəriləcək, aydın deyil, amma böyük ehtimalla Qarabağ istiqamətinə”.
Sərhəd Qoşunlarına aid hərbi hissələrin Ermənistanla sərhədin Qazax, Ağstafa istiqamətində yerləşdirilməsi Ermənistanı niyə belə ciddi narahat etməyə başlayıb?
Hərbi ekspert, istefada olan polkovnik-leytenant İbrahim Rüstəmli “Bakı-Xəbər”ə bildirdi ki, Azərbaycan Respublikasındakı bütün növ hərbi qüvvələrin dislokasiyası ölkənin qanunvericilik prinsiplərinə uyğun şəkildə həyata keçirilir: “Belə addımlar, həmçinin, Hərbi Doktrinamızdan irəli gələn tələblərə uyğun şəkildə aparılır. Yəni Azərbaycan öz ərazisi daxilində qoşun hissələrinin hər hansı bir yerdəyişməsini edərkən, digər dövlətlərlə məsləhətləşmələr aparmamalı və kimdənsə göstəriş gözləməməlidir. Bu bizim istər yerli, istərsə də beynəlxalq hüquq tərəfindən tənzimlənən haqqımızdır. Ermənilərin Sərhəd Qoşunlarımızın Qazax və Ağstafa istiqamətində düşmənlə ön cəbhəyə yerləşdirilməsilə bağlı keçirdikləri narahatlıq təbii qarşılanmalıdır. Çünki Ermənistan beynəlxalq aləmdə Azərbaycanın ərazisi kimi tanınan torpaqları zəbt edən işğalçı bir dövlətdir. Ona görə də Azərbaycanın istənilən hərəkətindən ehtiyatlanır. Bununla yanaşı, burada bir informasiya təxribatı da mövcuddur. Ermənistan bununla beynəlxalq ictimaiyyətin diqqətini regiona yönəltmək istəyir. Əvvəla Azərbaycan öz ərazi bütövlüyünü bərpa etmək hüququna malikdir və bunun istədiyi kimi həyata keçirə bilər. Bu hüquq bizə həm də beynəlxalq səviyyədə qəbul edilən qətnamələrlə də verilib. Azərbaycan Sərhəd Qoşunlarının təyinatı elə məhz xarici ölkələrlə sərhədlərimizi mühafizə etmək üçündür. Həmin hərbi hissələr məhz Ermənistanla sərhəddə yerləşdirilibsə, bu, Sərhəd Qoşunlarının təyinatına tam uyğun şəkildə həyata keçirilib. Bir daha xatırladıram, Ermənistan bu informasiya təxribatı ilə diqqəti ona yönəltmək istəyir ki, guya Azərbaycan məhz Dağlıq Qarabağ istiqamətindəki hərbi gücünü artırmaqla, müharibəyə hazırlaşır”.
Məhəmmədəli QƏRİBLİ
