Daşdəmir Əliyev: “Günü-gündən güclənən ordumuz bizə torpaqlarımızın işğal altında qalmayacağını əminliklə söyləməyə əsas verir”
Sabunçu rayonunda hərbçilərə yeni mənzillərin verilməsi mərasimində iştirak edən Azərbaycan Prezidenti, Silahlı Qüvvələrin Ali Baş Komandanı İlham Əliyev hərbçilər və onların ailə üzvləri ilə görüşündə Azərbaycanda ordu quruculuğu prosesinin uğurla və sürətlə getdiyini bildirib:
“Azərbaycan dünyada güclü orduya malik olan ölkələrin sırasındadır. Ordumuzun maddi-texniki bazası möhkəmlənir, ən müasir texnika, silahlar alınır. Bu il keçirilmiş iki hərbi parad bizim hərbi gücümüzü bütün dünyaya göstərib. Bu gün ordumuz texniki təchizat baxımından dünya miqyasında seçilən ordular sırasındadır. Əlbəttə ki, bizim güclü hərbi potensialımız Ermənistan-Azərbaycan Dağlıq Qarabağ münaqişəsinin həlli üçün əsas amildir. Ordumuzun döyüş qabiliyyəti artır. Bu gün ordumuz istənilən vəzifəni icra etməyə hazırdır, buna qadirdir. Son illərin hadisələri bunu əyani şəkildə göstərir”.
Dövlət başçısı, həmçinin, qeyd edib ki, bu il də Naxçıvan istiqamətində Ermənistan-Azərbaycan sərhədi sahəsində ordumuzun uğurlu əməliyyatı nəticəsində 11 min hektar torpaq tam nəzarətimizə keçib: “Biz strateji yüksəklikləri əldə etdik. Bu yüksəkliklərin əldə edilməsi bizə imkan verir ki, Ermənistan ərazisində strateji yollara, kommunikasiyalara tam nəzarət edə bilək. Həm aprel döyüşləri, həm də uğurlu Naxçıvan əməliyyatı bir daha onu göstərir ki, ordumuz peşəkardır, döyüş qabiliyyəti yüksək səviyyədədir. Ordumuzda yüksək ruh mövcuddur və ordumuz istənilən vəzifəni icra edə bilər.
Əlbəttə, bir daha demək istəyirəm ki, Ermənistan-Azərbaycan Dağlıq Qarabağ münaqişəsinin həlli üçün bütün başqa amillərlə yanaşı, ən birinci amil bizim hərbi gücümüzdür, qüdrətimizdir. Biz gücümüzü artırırıq və artıracağıq. Onu da bildirməliyəm ki, bu il bir çox önəmli kontraktlar imzalanmışdır. Bu kontraktların icrası nəticəsində ölkəmizə ən müasir silahlar və texnika gətiriləcəkdir. Bu gün mövcud olan texnika və silahlar imkan verir ki, biz işğalçıların istənilən hərbi hədəfini yüksək dəqiqlik və böyük dağıdıcı qüvvə ilə darmadağın edə bilək. Əlbəttə, hər bir ölkənin, o cümlədən müharibə şəraitində yaşayan ölkələrin gücünü, ilk növbədə, onun hərbi qüdrəti müəyyən edir”.
Göründüyü kimi, dövlət başçısı ölkəmizin silah alışı sahəsində önəmli kontraktlar imzaladığını və bundan sonra da ən müasir silahları əldə edəcəyimizi bildirib. Əldə olunacaq yeni, müasir hərbi silah və texnikanın Dağlıq Qarabağ probleminin həllinin sürətlənməsinə nə kimi təsiri ola bilər?
Hərbi ekspert Daşdəmir Əliyev qəzetimizə bildirdi ki, Azərbaycan Ordusu indiyə kimi də ən müasir silahları əldə edib: “Bizim ölkə olaraq silahlanmaya ciddi önəm verməyimizin səbəbi aydındır. Birincisi, müharibə şəraitindəyik. İkincisi isə, bizim istəməyərəkdən cəlb edildiyimiz müharibə nəticəsində torpaqlarımızın bir qismi işğal olunub və hələ də Ermənistanın nəzarəti altındadır. Uzun illərdir Azərbaycan diplomatiyası həmin torpaqların sülh yolu ilə azad olunmasına çalışır. Amma təəssüflər olsun ki, biz bu istiqamətdə hər hansı irəliləyiş görmürük. Azərbaycan dəfələrlə ən ali səviyyələrdə bəyan edib ki, torpaqların azad olunmasında hərbi yolun tətbiqini istisna etmir. Təbii ki, uzun sürən sülh danışıqları nəticə verməyəcəyi təqdirdə biz hərbi yolla torpaqlarımızı azad etməliyik. Bu bizim həm haqqımızdır, həm də mənəvi borcumuz. Bilirsiniz ki, bizim hərbi büdcəmizin çoxluğundan, çoxlu sayda silah almağımızdan narahatlıq keçirənlər də az olmayıb. Hətta bəzi qurumlar və ölkələr bunu irad kimi də bildirmək istəyiblər. Amma hər zaman onların layiqli cavabı verilib. Təbii ki, Azərbaycan məcbur olmasa, həmin pulu silah alışına deyil, başqa istiqamətlərə xərcləyər. Bunu istəməyənlər buyursunlar torpaqlarımızın işğaldan azad edilməsini təmin etsinlər. Edə bilmirlərsə, onda ordusunu ən müasir silahlarla təmin etmək kimi haqq yalnız ölkəmizə məxsusdur. Ölkə başçısının qeyd etdiyi kimi, bizim ordumuz son illər ərzində nəyə nail olduğunu düşmənə əyani şəkildə sübut etdi. Bu baxımdan da yeni müasir silahların alınması bizim ordumuzun qüdrətini artırmış olacaq. Güman edirəm ki, üzmüzə gələn il Dağlıq Qarabağ məsələsinin nizama salınmasında həlledici olacaq. Hətta sülh danışıqlarının aparılacağı təqdirdə belə, bizim diplomatiyamız arxasındakı ordu gücünə tam güvənməlidir. Günü-gündən güclənən ordumuz bizə torpaqlarımızın işğal altında qalmayacağını əminliklə söyləməyə əsas verir”.
Məhəmmədəli QƏRİBLİ
