Nəzakət Məmmədova: “Rusiya ABŞ-ın hazırladığı inqilabları qabaqlaya, onların qarşısını ala bilər”
Rusiyanın xarici işlər naziri Sergey Lavrov verdiyi müsahibədə maraqlı fikirlər səsləndirib. O bildirib ki, Qərbin postsovet məkanında etdiyi hər şey inqilabın hazırlanmasına hesablanıb.
Onun sözlərinə görə, postsovet məkanında işləyən bütün qeyri-hökumət təşkilatlarının komandalarının arxasında böyük pullar dayanır: "Bu təşkilarların əksəriyyətinin arxasında ABŞ Dövlət Departamentinin Beynəlxalq İnkişaf Agentliyi (USAID - red.) dayanır. Həmin qurum sözügedən təşkilatların donorudur. Bütün bu beynəlxalq və demokratik institutların arxasında ya ABŞ-ın Respublikaçılar Partiyası, ya da digər təşkilatlar durur".
XİN rəhbəri bildirib ki, Corc Soros, əlbəttə ki, burada kifayət qədər ciddi rol oynayır və o nəinki təkcə bizim postsovet məkanımızda, eləcə də bir çox digər yerlərdə bu işi həyata keçirir: “Əlbəttə, burada onların kəmiyyət baxımından üstünlüyü var. Biz onlara kəmiyyət baxımından bu səviyyədə cavab verə, bu cür marionet təşkilatlar yarada bilmərik".
Bununla belə, Rusiyanın xarici siyasət idarəsinin rəhbəri bütün siyasi qüvvələrlə işləməyin gərəkli olduğunu etiraf edib: "Bizim bunu etməməyimiz düzgün olmazdı. Biz hamı ilə işləyirik, özü də təkcə Cənubi Qafqazda deyil, postsovet məkanının digər hissələrində də. Biz bütün sistemli müxalifətçilərlə işləyirik. Lakin sistemsiz və yeraltı müxalifətlə işləmirik. Düşünürəm ki, bu, düzgün hərəkətdir".
S.Lavrov qeyd edib ki, postsovet məkanında inqilablara qarşı immunitet mövcuddur: "Ona görə də hazırda postsovet məkanında Qərbin etdiyi hər şey inqilabların hazırlanmasına yönəlib. Ola bilsin bu, bizim bəlamızdır, amma dəqiq deyim ki, bizim günahımız deyil. Biz özümüz dəfələrlə bizə çox baha - insan həyatlarına, şəhər və kəndlərin dağılması hesabına başa gələn inqilabları yaşamışıq. Başqalarına bunu arzulamırıq".
Göründüyü kimi, Lavrov faktiki olaraq ABŞ-ı bir çox ölkələrdə inqılab etməyə maraqlı olmaqda günahlandırır. O bu xüsusda bizim təmsil olunduğumuz Cənubi Qafqaz regionunun da adını çəkir. Lavrovun çaldığı bu həyəcan təbilindən hansı nəticələri çıxara bilərik?
Politoloq Nəzakət Məmmədova “Bakı-Xəbər”ə açıqlamasında bildirdi ki, ABŞ Cənubi Qafqaz ölkələrindən ikisində - Gürcüstanda və Ermənistanda artıq inqilab həyata keçirib: “Çünki həmin ölkələrin siyasi elitası Rusiyaya bağlı idi və Qərb öz adamlarını hakimiyyətə gətirmək üçün bu cür radikal üsuldan istifadə etməli oldu. Onlar hesab edirlər ki, bu da demokrak yolla hakimiyyətə gəlməkdir, çünki arxasında xalqın iradəsi dayanır. Sadəcə, xalq seçki yolu ilə deyil, meydanlara axışmaqla hakimiyyəti dəyişmiş olur.
Hər halda, bu cür hakimiyyətlərin legitimliyini Qərb dərhal tanıdı, Rusiya bunun çevriliş olduğunu deyib ABŞ-ın hakimiyyətə gətirdiyi iqtidarlarla normal münasibət saxlamaqdan imtina edib. Çünki inqilablarla hakimiyyətə gələn qüvvələr Rusiyanın bağlı olduğu siyasətçiləri hakimiyyətdən uzaqlaşdırmaqla yanaşı, ölkəsinin Qərbə inteqrasiyasına çalışıb. Saakaşvili, Paşinyan, Poroşenko və başqaları buna misal ola bilər”.
Politoloq hesab edir ki, bu gün dünyada vəziyyət dəyişib və Rusiyanın xeyrinə olmayan istiqamətdə cərəyan edir: “Rusiya beynəlxalq təcridə məruz qalır, sanksiyalarla üzləşir, daha çox xammal ixracatına əsaslanan, əsasən neft və qaz satışından gəlirləri formalaşan ölkə iqtisadiyyatı zəifləyir, əhalinin sosial durumu pisləşir. Bəzi MDB ölkələri Qərb nümunəsində inkişaf etmək, demokratiya və azadlıqlara can atmaq yolunu tutublar. Lakin onların heç birisi hələ ki, müşkül olan maneələri aşa bilməyib”.
Nəzakət Məmmədova deyir ki, Qərb və ABŞ vətəndaş cəmiyyəti ilə işləməyə üstünlük verirlər: “Bunun üçün milyardlarla dollar maliyyə ayırır, proqramlar həyata keçirirlər. Bu da nəticəsiz qalmır, əlbəttə. Məsələn, Lazarev klubunun Ermənistanda bu yaxınlarda keçirdiyi tədbirində də bu barədə həyəcan təbili çalındı və bildirildi ki, Ermənistan ictimaiyyəti artıq əvvəlki kimi Rusiyanı dəstəkləmir. Bunun əsas səbəblərindən biri kimi isə Qərbin Ermənistandakı vətəndaş cəmiyyəti institutları ilə yaxından işləməsi göstərildi. Rusiya özü indi bu üsuldan istifadə etməyə çalışır, Lavrovun dediyi kimi, dil, idman, mədəniyyət tədbirləri ilə keçmiş sovet ölkələrilə yaxınlaşmaq istəyir.
Lakin Qərb burada yenidir, öz demokratik imicindən istifadə edib xüsusən gənc və orta nəsillə işləməyə üstünlük verir. Rusiya isə iki əsrdən artıqdır öz ərazilərini postsovet ölkələri hesabına artırıb. Bu ölkələrin tarixində və insanların yaddaşında Rusiya bir imperiya kimi qalıb.
Odur ki, onun bu imicdən yaxa qurtarması üçün keçmişdə etdiyi səhvləri aradan qaldırması, ilk növbədə yaratdığı münaqişələri həll etməsi lazımdır.
Lavrov qeyd edib ki, inqilablar insan həyatı, şəhər və kəndlərin dağılması hesabına başa gəlib. Eynilə münaqişələr də insan həyatı, dağıntılar yaradıb və bütün postsovet məkanını geri salıb.
Rusiya ABŞ-ın hazırladığı inqilabları qabaqlaya, onların qarşısını ala bilər və keçmiş sovet məkanında öz müsbət imicini yarada bilər. Onun bu imkanları hələ də tükənməyib və şansı var. Sadəcə, yaratdığı münaqişələrin ədalətli həllinə çalışmaqla, o ölkələrə təzyiqləri azaltmaqla, onların demokratik inkişafına mane olmamaqla bu ölkələri özünə loyal yanaşmağa təhrik edə bilər. O zaman heç bir xarici güc burada inqilab edə bilməz”.
Məhəmmədəli QƏRİBLİ
