Bəhruz Quliyev: “Bu, hökumət-kilsə qarşıdurmasında yeni, daha aqressiv bir mərhələnin başladığını göstərir”
İyunun 24-də Ermənistan Baş naziri Nikol Paşinyan özünün sosial şəbəkə hesabında növbəti paylaşım edərək, Erməni Apostol Kilsəsi ilə gərgin mübahisəni daha da dərinləşdirdi və bu dəfə mövzuya şəxsi həyatına dair detallar da daxil oldu.
Paşinyanın sözlərinə görə, Ali Ruhani Lider - Katolikos II Qareginin (əsil adı Ktriç Nersesyan) mətbuat katibi onun, guya sünnət olunduğuna dair iddia irəli sürüb. Baş nazir bu iddialara cavab olaraq bəyan edib: “Mətbuat katibi bəyan edib ki, guya mən sünnət olunmuşam. Mən Ktriç Nersesyanı və onun nümayəndəsini qəbul etməyə və əksini sübut etməyə hazıram”. Bu qeyri-adi bəyanat həm yerli ictimaiyyətdə, həm də mətbuatda geniş rezonans doğurub.
Daha sonra Paşinyan kilsə rəhbərinə daha ciddi sualla müraciət edib: “Gəlin o da, nəhayət, cavab versin: subaylıq andını pozubmu, övladı varmı, ya yox?”.
Bu bəyanatlar, xüsusilə də kilsə rəhbərinə qarşı səsləndirilən şəxsi xarakterli ittihamlar son günlər Ermənistan hakimiyyəti ilə Erməni Apostol Kilsəsi arasında artan gərginliyin tavan nöqtəsinə çatdığını göstərir. Tərəflər bir-birini ifşa etmək üçün ən müxtəlif vasitələrə əl atırlar.
“Bu mübahisənin davamı kilsənin nüfuzunun sarsıdılması, ictimai dəstəyin parçalanması və...”
Sözügedən məsələ ilə bağlı fikirlərini “Bakı-Xəbər”lə bölüşən “SƏS” Media Qrupunun rəhbəri, politoloq Bəhruz Quliyev Ermənistanda kilsə-hakimiyyət qarşıdurmasına bir neçə aspektdən yanaşdı: “İyunun 24-də Ermənistan Baş naziri Nikol Paşinyanın sosial şəbəkələrdə verdiyi son bəyanat, artıq xeyli müddətdir davam edən hökumət-kilsə qarşıdurmasında yeni, daha aqressiv bir mərhələnin başladığını göstərir. Paşinyanın Katolikos II Qareginə qarşı irəli sürdüyü şəxsi həyatla bağlı ittihamlar dini institutlarla siyasi hakimiyyət arasında olan ənənəvi sərhədlərin tamamilə pozulduğunu ortaya qoyur. Paşınyanın guya onun sünnət olunması barədə yayılan xəbərlərə “bunu sübut etməyə hazıram” tipli cavab verməsi isə siyasi diskursun nə qədər populist və qeyri-ciddi müstəviyə keçdiyini təsdiqləyir. Digər tərəfdən, Katolikosun şəxsi həyatına dair - subaylıq andının pozulması və övlad məsələsi ilə bağlı verilən sual isə açıq-aşkar kilsənin nüfuzuna zərbə vurmaq məqsədi daşıyır. Bu cür qarşılıqlı ittihamlar Ermənistanın siyasi və dini elitası arasında dərin bir böhranın göstəricisidir. Ənənəvi olaraq Erməni Apostol Kilsəsi cəmiyyət üzərində ciddi təsirə malik olub. Lakin Paşinyanın son çıxışları göstərir ki, o, bu təsiri minimuma endirməyə, kilsəni siyasi proseslərdən təcrid etməyə çalışır. Bu mübahisənin davamı kilsənin nüfuzunun sarsıdılması, ictimai dəstəyin parçalanması və Ermənistan cəmiyyətində daha dərin ideoloji qütbləşməyə səbəb ola bilər. Hazırda görsənən budur ki, Paşinyan administrasiyası konstitusiya islahatlarına və dövlət idarəçiliyində dəyişikliklərə gedərkən kilsənin ona qarşı müqavimətini neytrallaşdırmaq istəyir. Belə görünür ki, tərəflər bu qarşıdurmada kompromisdən çox ifşa və nüfuz müharibəsinə üstünlük verirlər. Nəticə etibarilə demək olar ki, bu qarşıdurma yalnız siyasi deyil, həm də mədəni və mənəvi bir böhrana çevrilmək üzrədir. Ermənistan cəmiyyəti yaxın zamanlarda daha ciddi institusional parçalanmalara şahid ola bilər. Bunun ölkədəki sabitliyə təsiri isə artıq sual altındadır”.
Vidadi ORDAHALLI
