Xəbər verildiyi kimi, Prezident İlham Əliyevin Avropa İttifaqı Şurasının Prezidenti Şarl Mişellə telefon danışığı olub. Telefon danışığı zamanı Əliyev deyib ki, əgər yeni qarşıdurma olsa, bunun səbəbkarı Fransa olacaq: “Fransanın Ermənistana silah verməsi sülhə deyil, yeni qarşıdurmaya xidmət edən yanaşmadır və əgər regionda hər hansı yeni qarşıdurma baş verərsə, bunun səbəbkarı məhz Fransa olacaq”.
Eyni zamanda, dövlət başçısı Avropa Parlamenti tərəfindən ksenofob və şovinist yanaşma əsasında qəbul edilmiş anti-Azərbaycan xarakterli bəyanatın, orada səsləndirilən fikirlərin qəbuledilməz olduğunu diqqətə çatdırıb, bunun regionda sülhün və sabitliyin təmin olunmasına xidmət etmədiyini deyib.
“Bütün bunlar revanşist əhval-ruhiyyənin yenidən dirçəlməsinə xidmət edir və sülh danışıqlarını tormozlayır”
Məsələ ilə bağlı “Bakı-Xəbər”ə açıqlama verən hərbi ekspert Ramil Məmmədlinin fikrincə, Ali Baş Komandanın Fransa ilə bağlı xəbərdarlığı ciddi məsələlərə söykənir: “Problem ondadır ki, Fransa Ermənistanı regionda özünün platsdarmı kimi görür. Ukrayna müharibəsi fonunda Fransa Ermənistanla bağlı daha cəsarətli pozucu addımlar atır. Bu yöndə rəsmi Paris daha avantürist davranır. Özü də bunu gizli yox, açıq formada edirlər. Digər tərəfdən, Makron hakimiyyəti fransızlara ölkənin təsir imkanlarını uzaq coğrafiyalara qədər yaydığını isbatlmaq istəyir. Bunun üçün də Ermənistandan bir alət kimi istifadə etməyə çalışırlar. Fransa Ermənistanı bu məqsədilə silahlandırır və Azərbaycana qarşı hücuma kökləyir. Bəlli məsələdir ki, Azərbaycana hansısa hücum ermənilərə baha başa gələcək. 44 günlük müharibə və ondan sonra baş verənlər Ermənistanın Azərbaycanla bacarmasının mümkünsüz olduğunu təsdiq edir. Bunu Parisdə də anlayırlar, lakin Makronun məqsədi Ermənistanı qorumaq, yaxud gücləndirməkdən daha çox, ondan Cənubi Qafqazı qan çanağına çevirmək üçün istifadə etməkdir. Fransa Afrikada itirdiyi mövqeləri müəyyən mənada Ermənistanda kompensasiya etməyə çalışır. Ermənistan 2020-ci ildən sonra ordunun modernləşdirilməsi və keçmiş hərbi texnologiyadan imtina istiqamətində müəyyən addmlar atmağa çalışır. Bu addımlar da ilk olaraq hərbi texnoloji avadanlıqların yenilənməsilə bağlıdır. İrəvan özünün hərbi strukturunu NATO-ya uyğunlaşdırmağa çalışır. Bu baxmdan da Fransa ilə əməkdaşlıq edir. Ermənistanın bu məsələdə Fransa ilə əlaqə qurması Rusiyadan hərbi texnoloji avadanlıqları daha ala bilməməsilə də bağlıdır. Ukrayna müharibəsilə bağlı Rusiyanın ixracı dayandırması İrəvanı çətin duruma salıb. Fransa hərbi avadanlıqların istehsalında dünyanın öndə gedən ölkələrindəndir. Dünya üzrə radiolakasiya sistemləri istehsalında ən tanınmış şirkətlərdən biri Fransanın "TALES” şirkətidir. İrəvan Fransadan PUA-lar əleyhinə antidron sistemlərini də almaq istəyir. O cümlədən, Ermənistana digər silahların da verilməsi gündəmdədir. Təbii ki, bütün bunlar Ermənistanda revanşist əhval-ruhiyyənin yenidən dirçəlməsinə xidmət edir və sülh danışıqlarını tormozlayır. Belə hallar imkan verir ki, Ermənistan danışıqlarda pozucu mövqedən çıxış etsin və sülh sazişini imzalamağa maraqlı olmasın”.
Vidadi ORDAHALLI
