Məlum olduğu kimi, oktyabrın 9-da Birləşmiş Millətlər Təşkilatı (BMT) missiyası növbəti dəfə Qarabağa səfər edib. Missiya Ağdamdan Əsgəran-Xankəndi istiqamətində hərəkət edib.
Qeyd edək ki, BMT missiyası bundan öncə oktyabrın 1-də Qarabağda olub. Missiyanın məqsədi vəziyyətlə yerində tanış olmaq və sakinlərin humanitar ehtiyaclarını müəyyən etməkdir.
Bildiyimiz kimi, oktyabrın 1-də Qarabağa səfər etmiş BMT missiyasının təqdim etdiyi hesabatın nəticələrini ermənilər qəbul etmək istəmirlər və onlar iddia edirlər ki, BMT daha "obyektiv" olmalıdır.
Erməni mediası gecə-gündüz "etnik təmizləmə"dən dəm vurur, gözləyir ki, növbəti missiyası zamanı BMT də bu barədə, yəni nağıl danışa. Erməni mediası iddia edir ki, BMT missiyası erməniləri təmin edən nəticə təqdim etməlidir.
Erməni mediası yazır ki, BMT qrupunun Qarabağa ilk səfərinin yekunlarına dair mətbuata açıqlama ilə bağlı Ermənistan Xarici İşlər Nazirliyi şərh verib: "BMT-nin Azərbaycandakı rezident əlaqələndiricisinin rəhbərlik etdiyi BMT nümayəndə heyətinin Qarabağa səfəri və onun “nəticələri” ilə bağlı dərc edilmiş press-reliz barədə məlumatı Ermənistan dərin narahatlıq və məyusluq hissi ilə qarşılayıb". Erməni mediası iddia edir ki, "BMT missiyasının Azərbaycana səfəri idarələrarası faktaraşdırıcı missiya sayıla bilməz və heç bir halda Ermənistan tərəfinin və beynəlxalq təşkilatın gözləntilərini əks etdirmir".
Ermənistan mətbuatı özünəməxsus təxribatçı yol tutmaqla iddia edir ki, guya
BMT-nin Azərbaycandakı rezident əlaqələndiricisinin rəhbərlik etdiyi BMT nümayəndə heyətinin səfərindən Azərbaycan öz fikirlərini təbliğ etmək, həmçinin Qarabağa “genişmiqyaslı hücumu" və onun "nəticələrini" "qanuniləşdirmək" üçün istifadə edib.
Ermənistanın BMT-dən "aydın cavab gözlədiyi" qeyd edilir.
Ermənistan 1-ci BMT missiyasının bir neçə gün əvvəl Qarabağa səfərinin nəticələrini niyə qəbul etmədi? Və niyə? BMT gedib obyektiv informasiya verdi ki, mülki obyektlər yerindədir, heç bir etnik təmizləmə yoxdur. Amma Ermənistan buna qane olmayıb təşkilatdan "aydın cavab gözlədiyini" deyir.
“Oktyabrın 9-da gələn missiya da, təbii ki, Xankəndidə və ya Qarabağın digər yaşayış məntəqələrində "yeni" heç bir şey tapmayacaq"
Ermənistanın bu qərəzli davranışına şərh verən politoloq Mehman İsmayılov "Bakı-Xəbər"ə bildirdi ki, Qarabağdan kütləvi şəkildə ermənilərin köçürülməsi Fransa prezidenti Emmanuel Makronla Ermənistanın baş naziri Nikol Paşinyanın birgə düşündükləri siyasi kombinasiyadır. "Onlar Azərbaycanı "etnik təmizləmə"də, qeyri-humanist davranışda günahlandırmaq üçün o kombinasiyanı işə saldılar. Azərbaycan ən yüksək səviyyədə erməniləri xəbərdar etdi ki, Azərbaycan vətəndaşlığını qəbul edən hər bir erməniyə Azərbaycanın vətəndaşı kimi hər kəsə olan münasibət göstəriləcək. Hər kəs bilir ki, Azərbaycanda etnik kimliyə və dini mənsubiyyətə görə ayrıseçkilik mövcud deyil. Azərbaycan tolerant, sivil, mədəni və bütün dünya tərəfindən tolerantlığın səviyyəsinə görə nümunə çəkiləcək bir dövlətdir. Ancaq Azərbaycana qarşı bu kirli oyunu oynayan Makron-Paşinyan cütlüyü BMT-nin birinci missiyasının Azərbaycan ərazisində heç bir etnik təmizləmə siyasətinin aparılmadığını, onun izlərinin olmadığını görüb və bunu bəyan etməsini qəbul edə bilmirlər. BMT-nin birinci missiyasının bəyanatı Ermənistanı və Fransanı peşman edib, ona görə də onlar Qarabağa təkrar missiyanın gəlməsini istəyiblər. Birinci missiya gördü ki, Azərbaycan heç bir sivil, mülki vətəndaşa zərər yetirməyib, mülki infrastruktura ziyan vurmayıb. Bütün bunları görən BMT missiyası faktları qeyd etdi, ortaya çox açıq nəticələr çıxdı ki, Azərbaycan Qarabağın erməni əhalisinə qarşı heç bir etnik təmizləmə siyasəti aparmayıb, zor tətbiq etməyib, heç bir beynəlxalq qanunu pozmayıb. Bu, ermənilərə və fransızlara sərf etmədiyi üçün onlar təkrar missiyasının gəlməsini istədilər. Məqsəd nədir? Nəyin bahasına olursa-olsun, Azərbaycanı "etnik təmizləmə"də suçlamaq istəyirlər" - deyə bildirən M.İsmayılovun sözlərinə görə, məqsəd nə yolla olursa-olsun Fransanın da iştirak etməsi şərtilə Azərbaycana beynəlxalq bir missiyanı pərçimləmək və Azərbaycanın öz ərazilərində suveren hüquqlarını məhdudlaşdırmaq, nəyin bahasına olursa-olsun Ermənistanın Azərbaycanın Qarabağ bölgəsindəki iştirakını ən müxtəlif variysiyalarla təmin etməkdir. "Çünki Fransa türk düşmənçiliyi, öz ərazisində irqi ayrıseçkilik, faşizm və nasizm siyasəti həyata keçirir. Fransa islama qarşı total bir mübarizəyə başlayıb və onu çox açıq şəkildə aparır. Oktyabrın 9-da gələn missiya da, təbii ki, Xankəndidə və ya Qarabağın digər yaşayış məntəqələrində "yeni" heç bir şey tapmayacaq. Çünki etnik təmizləməni aparan Ermənistandır. Tərkibində ermənilərdən başqa heç bir millətin nümayəndəsi olmayan Ermənistan ərazisində yüzdən çox xalqın nümayəndəsi yaşayan Azərbaycanı etnik təmizləmədə suçlaya bilməz. Amma bütün bu kombinasiyalar mütləq Azərbaycana qarşı qara piar kampaniyası həyata keçirmək, onu ayaq tutub yeridə bilmək üçün Fransa və Ermənistan tərəfindən aparılan siyasətidir. Amma bu nəticə verəcək şeylər deyil. Təbii ki, dünyada bir erməni sevgisi, erməni təəssübkeşliyi var" - deyə bildirən M.İsmayılov qeyd etdi ki, o qüvvələr məmnuniyyətlə Azərbaycanın və Türkiyənin əleyhinə çıxışlar etməyə hazırdır, amma bu cəhdlərin hamısı nəticəsiz qalacaq.
İradə SARIYEVA
