Ermənistanın Azərbaycan ərazilərində “əkdiyi mina tarlası” təmizləməklə bitmək bilmir. Vətən müharibəsindən keçən üç il ərzində hələ də minalardan xilas ola bilməmişik. İşğaldan azad edilən ərazilərdə ermənilərin döşədiyi minalar mülki vətəndaşlarımızın, hərbi qulluqçularımızın ölümünə və yaralanmasına səbəb olub. Azərbaycanın çağırışlarına, müraciətlərinə baxmayaraq Ermənistan hələ də mina xəritəsini Azərbaycana verməyib, verdikləri xəritələrin isə saxta olduğu məlumdur. Ermənistan mümkün qədər gerçək mina xəritələrini Azərbaycana verməkdən yayınır. Çox təəssüflər olsun ki, Azərbaycanın müraciətlərinə baxmayaraq, beynəlxalq ictimaiyyət də Ermənistanı mina xəritələrini verməyə məcbur etməyib.
Azərbaycan XİN növbəti dəfə beynəlxalq birliyə müraciət edib ki, Ermənistan mina xəritələrini verməyə məcbur edilməlidir.
Ermənistanın yerləşdirdiyi minalar azərbaycanlıların həyatına son qoymaqda davam edir. Bu barədə Xarici İşlər Nazirliyi "X" (tvitter) sosial şəbəkə hesabında paylaşım edib.
Bildirilib ki, 6 oktyabrda Tərtərdə mina partlaması nəticəsində daha bir azərbaycanlı mülki şəxs həlak olub: "44 günlük müharibənin bitməsindən sonra mina qurbanlarının sayı 330-a çatıb. Beynəlxalq ictimaiyyət Ermənistanı mina xəritələrini verməyə məcbur etməlidir".
Bu gün şərait bir az fərqlidir. Ermənilərin çoxu Azərbaycan ərazilərindən çıxıb getdi, Ermənistan da Azərbaycanın ərazi bütövlüyünü tanıdı. Amma hələ sülh sazişi imzalanmayıb, sərhədlər demarkasiyası və delimitasiya olunmayıb. Belə bir şəraitdə mina xəritələrinin verilməsi üçün yeni şərait yaranıb. Ermənilər bundan sonra çalışacaqlar ki, daha ciddi-cəhdlə o mina xəritələrini gizlətsinlər. Belə bir vaxtda beynəxalq birliyin Ermənistana daha güclü təzyiq göstərməsinə çox böyük ehtiyac var.
Bu yeni şəraitdə beynəlxalq birliyin Ermənistana təzyiq göstərməsi üçün nə etmək lazımdır?
“Yeni şərait tələb edir ki, bölgədə sülh və əminamanlığa nail olunsun, buna görə də Ermənistan nəhayət ki, mina xəritələrini Azərbaycana verməlidir...”
“Qarabağa aparan yol” qəzetinin baş redaktoru Əli Mahmud baki-xeber.com-a şərhində bildirdi ki, Ermənistan və artıq məhv edilmiş separatçı xuntanın “liderləri” mina terrorunu xüsusilə düşünmüşdülər, məqsədləri daha çox insanın həlak olması və geriqayıdışı ləngitmək olub. Azərbaycanın mina terroru ilə mübarizə apardığını deyən Ə.Mahmud hesab edir ki, beynəlxalq birlik ermənipərəstliyi bir qırağa qoyub Azərbaycanın çağırışına cavab verməlidir. “Ermənistan Azərbaycan ərazində misilsiz mina terroru həyata keçirib. İşğaldan azad olunmuş ərazilərdə basdırılmış minaların mövcudluğu bizi ciddi narahat edir və bu minalar bizim vətəndaşlarımızın ölümünə, həmişəlik şikəst qalmasına səbəb olur. Amma təəssüflər olsun ki, dünya ictimaiyyəti və beynəlxalq təşkilatlar indiyə qədər bir dəfə də olsun mina xəritələrini vermədiyinə görə Ermənistana təzyiq göstərməyib. Onu qınamayıb, cəzalandırmayıb. Ermənistanın cəzasız qalması Azərbaycanda məsum canların məhv olması ilə nəticələnir. Hesab edirəm ki, Ermənistan gerçək mina xəritələrini Azərbaycan tərəfə təhvil verməyənə qədər onunla yanaşı beynəlxalq birlik də məsuliyyət daşıyır”-deyə Ə.Mahmud qeyd etdi.
Bu gün beynəlxalq təşkilatların Qarabağdan könüllü şəkildə köçüb getmiş ermənilərə görə hay-küy salmasını tənqid edən baş redaktor bildirir ki, onlar süni “qaçqın”, “məcburi köçkün” şousu yaradıb onun ətrafında oyunlarını qurmaqdansa, gözlərini açıb real vəziyyəti görsünlər. “Son proseslərdən sonra bölgədə vəziyyət tamamilə dəyişib, yeni reallıqlar yaranıb. Ermənistanın və beynəlxalq aləmdəki erməni havadarlarının təhriki, təzyiqi ilə erməni əhalinin çoxu Qarabağı könüllü olaraq tərk etdi. Maraqlıdır, onlar getdikdən sonra ərazidə minalar, tələ minalar olduğu məlum oldu. Ermənistan bu gün saxta “qaçqın”, “məcburi köçkün” şousu yaradır. Dünyaya elan edir ki, Azərbaycanın ərazi bütövlüyünü, suverenliyini tanıyır, amma qəsdən sülh müqaviləsinin imzalanması prosesini gecikdirir, sərhədlərin müəyyənləşdirilməsi işi də hələ başa çatmayıb. Bu gün tamamilə yeni şərait formalaşıb və beynəlxalq birlik də bu şəraitə uyğun addım atmalıdır. Yeni şərait tələb edir ki, bölgədə sülh və əminamanlığa nail olunsun, buna görə də Ermənistan nəhayət ki, mina xəritələrini Azərbaycana verməlidir, ərazilərimiz minalardan təmizlənməlidir, insan tələfatına son qoyulmalıdır. Ermənistanın ərazilərimizdə törətdiyi mina terrorunun kökünün kəsilməsi üçün beynəlxalq qurumlar ermənipərəstliklərini bir yana qoyub Ermənistanı buna məcbur etməlidir”-deyə qeyd edən müsahibimiz xatırlatdı ki, Ermənistan Azərbaycan ərazilərində 1 milyondan artıq mina basdırmışdı. Ekspert təəssüflə qeyd etdi ki, beynəlxaq birliyin laqeydliyi nəticəsində hələ də Ermənistan rəhbərliyi minalanmış ərazilərin xəritəsini Azərbaycan tərəfinə verməkdən boyun qaçırır. “Ermənistan bu gün mina xəritələrini verməkdən var gücü ilə yayınır, beynəlxalq birlik heç olmasa bir dəfə tərəfsizlik göstərib o xəritələrin Azərbaycana təhvil veriməsinə nail olsun. Bu, beynəlxalq təşkilatların əlində olan məsələdir, sabah Ermənistana göstəriş versələr o dərhal xəritələri verər. Ermənistan müstəqil dövlət deyil ki, özbaşına qərar verə, o qərarı onun yerinə başqaları verir. Amma bütün halIarda beynəlxalq ictimaiyyətdən tələbimiz odur ki, insanlarımızın həyatı üçün təhlükəyə səbəb olan, ətraf mühiti çirkləndirən, bölgə üçün təhdid yaradan minaların təmizlənməsindən ötrü mina xəritələrini Azərbaycana verməsi üçün Ermənistana təzyiq göstərsin”.
Ə.Mahmud qeyd etdi ki, bu gün dünya tərəfli olmağı yox, obyektiv olmağı seçməlidir.
Əli TURABOV
