Məlum olduğu kimi, Azərbaycanın paytaxtı Bakı oktyabrın 2-dən 6-dək daha bir mötəbər tədbirə - 74-cü Beynəlxalq Astronavtika Konqresinə ev sahibliyi etdi. Oktyabrın 6-dək davam edən Konqresə 100-dən artıq ölkədən 5 mindən çox nümayəndə qatılıb.
Qeyd edək ki, Azərbaycanın ilk dəfə Ulu Öndər Heydər Əliyevin rəhbərliyi dövründə ‒ 1973-cü ildə Bakıda keçirilən Beynəlxalq Astronavtika Konqresinə 50 il sonra yenidən ev sahibliyi etməsi böyük rəmzi məna daşıyır. Bu dəfə ölkəmiz Konqresə müstəqil dövlət kimi ev sahibliyi etdi. Bu, Azərbaycanın müasir texnologiyalar, rəqəmsal inkişaf və kosmik sənaye quruculuğu sahəsində qazandığı mühüm nailiyyətlərə beynəlxalq səviyyədə göstərilən yüksək diqqət və hörmətin parlaq göstəricisidir. Dünya miqyasında ən mötəbər tədbirlərdən biri olan bu Beynəlxalq Konqresin ikinci dəfə Azərbaycanda keçirilməsi həm də ölkəmizdə kosmik sənayenin inkişafına, beynəlxalq kosmik ictimaiyyət və onu təmsil edən Beynəlxalq Astronavtika Federasiyası (IAF) ilə əməkdaşlığın genişləndirilməsinə, habelə qlobal kosmos sənayesinə daha yaxından inteqrasiya istiqamətində misilsiz imkanlar yaradacaq.
Məlumat üçün bildirək ki, mötəbər tədbirin ölkəmizdə keçirilməsi barədə qərar 2019-cu ilin oktyabrında ABŞ-ın paytaxtı Vaşinqtonda qəbul edilib. Belə ki, Beynəlxalq Astronavtika Federasiyasının Baş Assambleyasında keçirilmiş seçkilər zamanı Bakı şəhəri Beynəlxalq Astronavtika Konqresinə ev sahibliyi etmək hüququ qazanıb. Həmin seçkilərdə Azərbaycan paytaxtı bu mötəbər tədbirə ev sahibliyi üçün namizədliyini irəli sürmüş Rio-de-Janeyro, Nyu-Dehli və Sinqapur kimi müasir və inkişaf etmiş şəhərləri geridə qoyaraq qalibiyyət əldə edib.
Vüqar Bayramov: “Kosmik sənayenin inkişaf etdirilməsi Azərbaycanın kosmik ölkəyə çevrilməsi kontekstindən xüsusi qiymətləndirilməlidir”
Ölkəmizdə keçirilən Beynəlxalq Astronavtika Konqresinin əhəmiyyəti haqqında danışan millət vəkili Vüqar Bayramov “Bakı-Xəbər”ə açıqlamasında qeyd etdi ki, ölkəmizin Beynəlxalq Astronavtika Konqresinə ev sahibliyi etməsi Azərbaycanın innovativ sənayedə apardığı islahatlara verilən beynəlxalq qiymət kimi də xarakterizə edilməlidir: "Azərbaycan Prezidenti cənab İlham Əliyevin konqresin açılış mərasimində qeyd etdiyi kimi, 74-cü Beynəlxalq Astronavtika Konqresi Azərbaycanda kosmos sənayesinin və aparıcı texnologiyaların inkişafına töhfə verəcək. Sənayedə aparılan islahatlar ənənəvi sektorlarla yanaşı, innovativ sektorun inkişafını da stimullaşdırır. Kosmik sənayenin inkişaf etdirilməsi Azərbaycanın kosmik ölkəyə çevrilməsi kontekstindən xüsusi qiymətləndirilməlidir. İnnovativ sahə olaraq kosmik sənayenin inkişafı həm bu istiqamətdə daha çox gəlirin əldə edilməsi, həm də Azərbaycanın innovativ potensialının təqdim olunması baxımından vacibdir. Bu, Azərbaycanın qeyri-neft sektorunda gəlirlərinə birbaşa təsir göstərən amillərdəndir. Xüsusən də, bu istiqamətdən daxilolmalar büdcə üçün çox əhəmiyyətlidir. Qeyri-neft sektorunun inkişafı hər bir sektorun ayrıca dəstəklənməsindən ibarətdir ki, bu kontekstdən də kosmik sənayenin inkişafı həm də dövlət gəlirlərinin artırılması baxımından vacibdir".
Kəmalləddin Qafarov: “Bu, əlbəttə ki, böyük nailiyyətdir və bu nailiyyətin əsasında Azərbaycan iqtisadiyyatının sürətli inkişafı durur”
Millət vəkili Kəmaləddin Qafarov bildirdi ki, 74-cü Beynəlxalq Astronavtika Konqresinin yenidən Bakıda, müstəqil Azərbaycanın paytaxtında keçirilməsi ölkəmizə olan yüksək etimadın göstəricisidir. Tədbirdə 100-dən artıq ölkəni 5000-dən çox iştirakçı təmsil edib ki, bu da Konqresin mühüm əhəmiyyət kəsb etdiyini deməyə əsas verir. Müstəqil ölkə kimi hələ çox gənc olan Azərbaycan artıq on ildən artıq müddətdir ki, beynəlxalq kosmik ailənin üzvüdür: “Bu gün kosmik sənayeni inkişaf etdirən Azərbaycanın Yer orbitində ikisi telekommunikasiya məqsədləri, biri isə Yer səthinin müşahidəsi üçün nəzərdə tutulan üç peyki vardır. Həmin peyklər hazırda 45-dən artıq ölkəyə xidmət göstərir. Bu, əlbəttə ki, böyük nailiyyətdir və bu nailiyyətin əsasında Azərbaycan iqtisadiyyatının sürətli inkişafı durur”.
Günel CƏLİLOVA
