Qarabağı könüllü tərk edib Ermənistana gedən ermənilərə dəstək verən, yardım göstərən ölkələrin adları açıqlanıb. Bu siyahıda İran rejiminin də adı var. Özünü müsəlman dövləti olaraq qələmə verən molla rejiminin ermənipərəstliyi təəccüblü görsənməsə də, onun tez-tələsik yardıma qoşması, Qərb ölkələrinin səfində yer tutması suallar doğurur.
Açıqlanan siyahıya görə, Fransa 12,5 milyon avro, ABŞ 11,5 milyon dollar, Avropa Birliyi 5 milyon avro, Almaniya 5 milyon avro, İtaliya 4 milyon avro, Kanada 2,5 milyon avro, Norveç 1,85 milyon dollar, İsveç 1,35 milyon avro, İspaniya 1 milyon avro, Litva 350 min avro, Çexiya 200 min avro, İran 50 ton humanitar yardım, Estoniya nümayəndəlik, yerli yardım, Belçika həkim heyəti ilə ermənilərə yardım göstərilib. Bəli, özünü müsəlman elan edən Tehran rejiminin Qərb dövlətləri ilə bir tərkibdə yer alması onun mahiyyətindən və niyyətindən xəbər verir. Bu dövlətlər 30 il 1 milyon real qaçqına görə belə əl ayağa düşmədilər, amma indi bir ovuc yalançı erməni "qaçqına ya köçkünə" görə yardıma qaçırlar. Halbuki, onlar heç qaçqın və məcburi köçkün də deyillər. İran hakimiyyətinin bu "humanizmin"ə necə yanaşmaq olar?
Orta Doğu Araşdırma Mərkəzinin rəhbəri Sədrəddin Soltan “Bakı-Xəbər”ə şərhində “İran hakimiyyəti Ermənistanın dərd ortağıdır. Onun yaxşı günündə də, ağır günündə də yanında olub. Əvvəllər də İran hakimiyyəti Ermənistana hərtərəfli yardımlar edib. Ermənistanın keçmiş prezidenti Serj Sarkisyan bəyan edirdi ki, əgər 90-cı illərdə İran Ermənistana yardım etməsəydi çoxdan iflas olmuşdu. Odur ki, İran hakimiyyətinin Ermənistana yardımı bir ənənədir. Niyə? Çünki İran hakimiyyəti Ermənistanı Türkiyə və Azərbaycana qarşı istifadə etmək niyyətindədir. Bunu 30 ildən çox bir müddətdə Azərbaycan müşahidə edib. Onun regionda siyasəti daim ermənilər vasitəsilə Azərbaycana təzyiq üzərində qurulub. Odur ki, İran rejiminin Ermənistana yardımı həm də siyasi mahiyyət daşıyır” - deyə bildirdi.
S.Soltanın sözlərinə görə, İranda bir qrup fars şovinisti hesab edir ki, qaraçılar və ermənilər farsların bir qoludur. Mərkəz rəhbərinin fikrincə, ona görə də ehtimal etmək olar ki, Tehran hakimiyyəti etnik qohumluq baxımından erməniləri özlərinə yaxın bildiyi üçün bu şəkildə canfəşanlıq edir. “İran parlamentində ermənilər üçün vakant yer var ki, iki yer ermənilərə ayrılıb, onlar daim İran hakimiyyətinin siyasətini müdafiə ediblər. Onlar hakimiyyətin müxtəlif strukturlarına Azərbaycandan könüllü olaraq Ermənistana köçmüş erməınilərə yardım ayrılmasını təklif ediblər. Ermənistanın Milli Təhlükəsizlik Şurasının katibi Armen Qriqoryanın İrana səfərində də Qarabağdan gedən ermənilərə yardım edilməsi müzakirə edilmişdi. Yəni İran hakimiyyətinin Ermənistana, o cümlədən də Azərbaycan ərazisini könüllü olaraq tərk etmiş erməni sakinlərə yardım etməsi ənənənin davamıdır. İran hakimiyyəti erməniləri özünə daha yaxın bildiyindən daim onlara bu və başqa şəkildə yardım edir” - deyə bildirən S.Soltanın sözlərinə görə, Ermənistan Tehran rejiminin regionda siyasi alətidir və perspektivdə bu aləti daha böyük məqsədlər üçün istifadə etmək niyyətindədir.
İradə SARIYEVA
