Gözlənildiyi kimi, Avropa Parlamenti ənənəsinə sadiq qaldı. Ədalətə, beynəlxalq hüquq və prinsiplərinə deyil, qərəz və ikili standartlara üstünlük verdi. Fransanın təşəbbüsü ilə Azərbaycana qarşı qərəz və ikili standartlardan irəli gələn sənəd qəbul edildi.
Beləliklə, ermənipərəstliyi özündə ehtiva edən qətnamə ilə 30 il davam edən riyakar siyasətə sadiq qalmış oldular. Təşkilatın Qarabağda mövcud vəziyyətlə bağlı qəbul edilən qətnaməsində iddia olunub ki, bölgədə beynəlxalq hüquq və normalar pozulub. Heç bir fakt və rəqəm ortaya qoyulmadan Fransanın təşəbbüsü ilə qəbul edilən qətnamə başdan-ayağa qərəz və ikili standartlardan irəli gələn qərar kimi qiymətləndirilməlidir.
Avropa Parlamentinin bəzi üzvləri ilə erməni lobbisinin üzvləri arasında əlaqələri araşdırsalar, yaxşı olar. Avropa Parlamenti əmin olsun ki, bu qətnaməsi də kağız parçasından artıq deyil. Məsələ ondadır ki, Avropa Parlamentinin fəallığının səbəbi də var. Hədəf erməni lobbisinin maliyyəsini cəlb etməkdir. Onlardan çoxunun seçki kampaniyası erməni maliyyəsinə əsaslanır ki, bunun da əvəzini qaytarmaq lazımdır.
Avropa Parlamentinin 5 sentyabr abırsız anti- Azərbaycan qətnaməsi onu deməyə əsas verirmi ki, bu qurum əksərən korrupsiyalaşdığı üçün buraxılmalı və daha vicdanlı adamlardan yeni tərkib seçilməlidir?
Siyasi şərhçi Sahil Kərimli “Bakı-Xəbər”ə açıqlamasında bildirdi ki, Avropa Parlamentinin təpədən dırnağa kimi korrupsiyalaşmış, siyasi oyunbazlıqla məşğul olan üzvlərinin Azərbaycan əleyhinə qəbul etdiyi qətnamə bizim üçün heç bir dəyəri olmayan kağız parçasıdır: “Bu bədnam addım riyakarlığın, həyasızlığın və ədalətsizliyin ən böyük təzahürüdür. Azərbaycan nəyə görə sanksiyalara məruz qalmalıdır? Ona görə ki, öz suverenliyi və ərazi bütövlüyü uğrunda döyüşüb? Ona görə ki, bölgədə terrorçuluğa, separatizmə qarşı amansız tədbirlər həyata keçirib? Görünən odur ki, Azərbaycanın müstəqil addımları, terrora qarşı qətiyyətli addımlar atmağı Avropa dairələrini bərk narahat edir. Əks halda Azıərbaycana qarşı bu cür hiddətli mövqe tutmazdılar. Avropalı siyasətçilər ölkəmizin haqq savaşına qarşı addımlar atmaqdansa öz korrupsiya əməllərinə baxıb utansınlar. Onsuz da heç bir nüfuzu qalmayan əksər avropa siyasətçiləri də daxil Avropa Parlementi buraxılmalı və yenidən formalaşdırılmalıdır. Bunun vaxtı çoxdan çatıb. Fransa prezidenti Makron başda olmaqla, bəzi Avropa liderlərinin həyasızcasına Azərbaycanın haqq işinə mane olması, erməni separatizmini dəstəkləməsi dərin təəssüf hissi doğurur. Onlar bu mövqeləri ilə dünyada özlərini rüsvay edir, onsuz da olmayan nüfuzlarını yerlə bir edirlər. Avropanın dırnağarası demokratiyasının, ədalətinin əsl üzü, əsl siması görünür. Əlbəttə ki, bu cür addımlar Azərbaycanı öz yolundan döndərə bilməz. Qətnamələr, əsassız bəyanatalar dövlətimizin qətiyyətli və milli maraqlara söykənən siyasətini dəyişə bilməz. Azərbaycan öz yolu ilə sonadək gedəcək, ərazilərimizdəki terrorçuları son nəfərinədək zərərsizləşdirəcək və Cənubi Qafqazda dayanıqlı sülhə nail olacaq”.
Məhəmmədəli QƏRİBLİ
