Beynəlxalq qurumların bir çoxu Qarabağdan könüllü şəkildə köçüb getmiş ermənilərin vəziyyətini dramatikləşdirməkdə, ətraflarında faciə yaratmaqda davam edir. Onların Ermənistana köçməsini belə qələmə verirlər ki, guya onlar “qaçqın” və ya “məcburi köçkündürlər”.
Qarabağdan getmiş ermənilərin nə qaçqın, nə də məcburi köçkün statusuna uyğun gəlmədiyi məlumdur. Çünki onlar bizim torpaqlarımızı könüllü şəkildə tərk ediblər və bunu özləri də bütün müsahibələrində etiraf ediblər. Qarabağdan gedən ermənilərin təəssübkeşlərindən biri də özünü üzə çıxarıb. Bu UNESCO-dur.
Erməni mediası xəbər verir ki, UNESCO nümayəndələri Ermənistanın xahişi ilə Qarabağdan “məcburi köçkünlərə” dəstək vermək üçün İrəvana gələcək. Bu barədə təşkilatın mətbuat xidmətindən məlumat yayılıb.
Qeyd edilir ki, dəstək təhsilin davam etdirilməsini təmin etməyə və “qaçqın” şagirdlərə psixi-sosial yardımın göstərilməsinə yönələcək. Qarabağdan köçüb gedən guya “100 minə” yaxın “qaçqının”ın təxminən “⅓-ü uşaq və yeniyetmələrdir”. UNESCO-nun iddiası belədir. UNESCO BMT-nin bir institutu olmasına baxmayaraq, öz davranışları ilə bu qurumla hesabalaşmadığını nümayiş etdirir. BMT-nin Qarabağdan hazırladığı hesabatda məsələyə tam aydınlıq gətirilib, bu da UNESCO-ya əsas verir ki, ermənilərə layiq olduqları cavabı versin, amma ermənipərəstlik edir.
Azərbaycan 30 il ardıcıl olaraq UNESCO-ya müraciət etdi ki, bölgəyə, xüsusən də Qarabağa missiya göndərsin, İrəvandakı abidələrimizin taleyinə də bu qurum diqqət ayırsın, amma onun “tükü də tərpənmədi”. UNESCO Azərbaycanın çağırışı ilə nə Qarabağa, nə də İrəvana gəldi ki, erməni vandalizmini öz gözləri ilə görsün, amma bu gün ermənilər çağıran kimi nümayəndə göndərir.
“...Erməni şousunun toruna düşən beynəlxalq qurumlardan biri də UNESCO-dur”
“Vəfa” Sosial İctimai Birliyinin sədri Fatimə Hacıbəyli “Bakı-Xəbər”ə şərhində bildirdi ki, UNESCO-nun ermənipərəst davranışlarının illər boyu şahidi olmuşuq, bu da təşkilatın növbəti təxribatçı davranışıdır.
“Çox təəssüflər olsun ki, UNESCO ermənipərəst mövqeyində hələ də qalır. Qondarma “qaçqın”, “məcburi köçkün” oynuna qoşulmaqla o öz mövqeyini bir daha ortaya qoyur. Ermənilər Qarabağdan könüllü şəkildə köçüb gediblər. Azərbaycan dövləti dəfələrlə onlara çağırışlar etdi, vətəşdaşlıq təklif etdi və sair. Amma onlar çıxıb getdilər. İndi isə “qaçqın” və ya “məcburi köçkün” şousu yaradıblar və ermənilərin o şousunun toruna düşən beynəlxalq qurumlardan biri də UNESCO-dur. UNESCO-nun tabe olduğu BMT-nin xüsusi missiyası Qarabağda araşdırma aparmaq üçün oktyabrın 1-də Xankəndiyə getmişdi. BMT missiyası bəyan etdi ki, Xankəndidə mülki infrastruktura ziyan dəyməyib, orada heç bir etnik təmizləmə baş verməyib. Azərbaycan BMT missiyasına Qarabağda araşdırma aparmaq üçün şərait yaratdı. Amma UNESCO yenə də öz ermənipərəst mövqeyində qalır. Vaxtilə Azərbaycanın 1 milyon real qaçqınını görməzdən gələn UNESCO-nun erməni “məcburi köçkünlərin” yanına tələsməsi təəssüf doğurur”-deyə F.Hacıbəyli qeyd etdi.
F.Hacıbəyli əlavə etdi ki, UNESCO Ermənistanın çağırışı ilə bu gün İrəvana gəlirsə, sabah ermənipərəstliyindən istifadə edib “erməni irsi təhlükədədir” bəhanəsi ilə Qarabağa gəlməyə can atacaq. Amma bu kimi təşkilatların Azərbaycana münasibətdə niyyətlərinin saf olmadığının məlum olduğunu deyən təşkilat sədri hesab edir ki, UNESCO obyektiv olmayana qədər onu Qarabağa buraxmaq olmaz, çünki o, bölgəyə yeni qərəzli ssenari yazmaq üçün gəlmək istəyəcək.
Leyla QARAXANLI
