“Dağlıq Qarabağda ciddi humanitar böhran var. Vəziyyət əsl humanitar fəlakətə yaxındır”. Belə bir sarsaq fikirlə Moskvada Rusiya və Azərbaycanın xarici işlər nazirləri ilə görüşündə Ermənistanın xarici işlər naziri Ararat Mirzoyan çıxış edib.
Daha sonra Mirzoyan bunları qeyd edib: “Əgər biz həll yolu tapa bilməsək və Azərbaycan blokadanı dayandırmasa, yer üzündə baş verən humanitar fəlakət, əlbəttə ki, danışıqlar prosesi üçün öz mənfi nəticələrini verəcək”.
O, həmçinin qeyd edib ki, Azərbaycanla danışıqlar kifayət qədər intensiv aparılır, bəzi məsələlərdə nəticələr var, bəziləri üzrə müəyyən perspektivlər görünür, orada tərəflər qarşılıqlı razılığa gələ bilərlər: “Ancaq əlbəttə ki, tərəflərin mövqelərinin hələ də bir-birindən uzaq olduğu problemli məsələlər qalmaqdadır”.
Belə görünür ki, Ermənistan rəhbərliyi bununla artıq sülh danışıqları prosesindən imtina etmək fikrindədir. Yəni Qarabağın blokadası ilə bağlı apardıqları yalançı təbliğatla əlaqədar heç bir şey alınmır, indi də şantaja keçiblər. Hətta mümkündür ki, onlar sülh danışıqlarını dayandırsınlar. Bu baxımdan maraqlıdır, Ermənistan indiki şəraitdə sülh danışıqları prosesini dayandıra bilərmi?
“Buna getsələr, bu, Azərbaycana əsas verəcək ki, hərbi əməliyyatlara əl atsın”
Məsələ ilə bağlı “Bakı-Xəbər”ə açıqlama verən hərbi ekspert Ramil Məmmədli hesab edir ki, indiki şəraitdə Ermənistanın açıq şəkildə danışıqlardan imtina edəcəyi real görünmür: “Bəli, o bir reallıqdır ki, Ermənistan danışıqları uzatmaq üçün müxtəlif bəhanələrdən istifadə edir. O cümlədən, blokada nağıllarını uydurur. Bu necə blokadadır ki, hər gün Laçın yolu ilə onlarla maşın Ermənistandan Qarabağa və əks istiqamətdə hərəkət edir? Qarabağda bir ovuc erməni var ki, onların qida ilə bağlı təminatında hansısa problemlərin olması mümkünsüzdür. Çünki sayları çox azdır. Üstəlik, onlar da kənd təsərrüfatı ilə məşğuldur. Mirzoyanın şantaj dili ilə danışması işğalçı Ermənistana xas olan bir haldır. Otiz ilə yaxın ərazilərimiz işğal altında olan dövrdə də Ermənistan şantaj mövqeyindən çıxış edirdi. Sonda nə əldə etdilər? Azərbaycan Ordusu hücuma keçərək ərazilərin böyük hissəsini işğaldan azad etdi. Ona görə də onların seçim imkanı məhduddur. Ermənistan sülh danışıqlarından imtina etsə, Qərbin ciddi təzyiqləri ilə üzləşəcək. Türkiyə ilə münasibətlərin tənzimlənməsi dalana dirənəcək. Nəticədə ölkədə Paşinyana qarşı təziqlər artacaq ki, bu da onun üçün baha başa gələ bilər. Biz nəzərə almalıyıq ki, Qərb danışıqların intensivləşməsində maraqlıdır. Onlar üçün ən pis danışıqlar hansısa toqquşmalardan daha üstündür. Digər tərəfdən, Ermənistan buna getsə, bu, Azərbaycana əsas verəcək ki, hərbi əməliyyatlara əl atsın. Qarabağdakı separatçı tör-töküntülərini güc yolu ilə təmizləsin. Ermənistan danışıqlardan imtina etsə, o zaman Azərbaycanın güc tətbiq etməsinə qarşı Rusiya hansısa arqumentlə çıxış edə bilməyəcək. Üstəlik, Ermənistan növbəti müharibəyə getmək imkanında da deyil. İkinci Qarabağ müharibəsi zamanı Ermənistanda fərarilərin sayı 13 min nəfərə yaxın olub. Növbəti müharibə baş versə, vəziyyət daha acınacaqlı olacaq. Ona görə də Ermənistan nə qədər şantajçı mövqedən çıxış etsə də, belə bir risqə gedəcəyini düşünmürəm”.
Vidadi ORDAHALLI
