Ermənistanın Baş naziri Nikol Paşinyan keçirdiyi mətbuat konfransında yenidən Qarabağın Azərbaycana aid olduğunu təsdiqləyib. Hətta bildirib ki, Ermənistan hər zaman Azərbaycanın ərazi bütövlüyünü tanıyıb, lakin bu, heç də həmişə bəyan edilməyib:
“Təəssüf hissi ilə qeyd edirəm ki, dünyada Dağlıq Qarabağı Azərbaycanın bir hissəsi kimi tanımayan bir ölkə belə yoxdur. Başqa bir sual da ondan ibarətdir ki, biz bu incəlikdən xəbərdar idik, ya yox. Bizim mövqeyimiz ondan ibarət idi ki, bütün dünyanın nə deməsinin əhəmiyyəti yoxdur, biz bunu başqa cür etməliyik. Ola bilsin ki, mən də hansısa mərhələdə bu cür hərəkət etmişəm, amma sonda biz konkret reallıqla üz-üzə qalırıq ".
Paşinyan, eyni zamanda, Rusiya prezidenti Vladimir Putinin 2020-ci il dekabrın 17-də keçirdiyi mətbuat konfransında bəyanatından bir sitatı oxuyub: "Beynəlxalq hüquq baxımından bütün bu ərazilər Azərbaycan Respublikasının ayrılmaz hissəsidir. Bir daha təkrar edirəm, Ermənistan özü Dağlıq Qarabağın müstəqilliyini tanımırdı, ona görə də Dağlıq Qarabağ beynəlxalq hüquq baxımından Azərbaycandır”.
Baş nazir fransalı keçmiş həmsədr Stefan Viskontinin 2020-ci ilin yanvarında Senat komissiyasının deputatları ilə görüşü zamanı dediyi sözləri də sitat gətirib: “Dağlıq Qarabağ Azərbaycanda yerləşən dağlıq anklavdır”.
Ermənistanın baş naziri ABŞ Dövlət Departamentinin insan haqları ilə bağlı illik hesabatından da sitat gətirib:
“Xüsusilə 2012-ci ildən 2016-cı ilə qədər olan hesabatlarda bildirilir ki, separatçılar Ermənistanın köməyi ilə Dağlıq Qarabağın əksər hissəsini və Azərbaycanın daha 7 kəndini nəzarətdə saxlamaqda davam ediblər”.
Göründüyü kimi, Ermənistanın baş naziri əsaslı arqumentlərlə öz ölkəsinə sübut etməyə çalışır ki, Qarabağla bağlı sərsəm iddialardan əl çəkmək lazımdır.
Politoloq Elşən Mustafayev “Bakı-Xəbər”ə açıqlamasında bildirdi ki, Ermənistan və ermənilər reallığı qəbul etməyə başlayıb: “Azərbaycan bunlara ardıcıl, dönməz xarici və daxili siyasəti və ordumuzun gücü nəticəsində nail olub. Biz Nikol Paşinyana və onun havadarlarına Cənubi Qafqazdakı yeni geosiyasi reallığı qəbul etdirdik.
Onlar bir müddətdən sonra 200 ildir aldadıldıqlarını da etiraf edəcəklər. Ermənistanın baş naziri Nikol Paşinyanın başçılıq etdiyi siyasi qüvvə hakimiyyətə gəldikdən sonra vəziyyət bir müddət əvvəlki kimi davam etdi. Bunu son açıqlamasında doğru ifadə edib. Hətta Paşinyan Şuşada rəqs də elədi. O, “Qarabağ Ermənistandır, nöqtə!” şüarını da səsləndirdi. Ancaq 44 günlük müharibə Ermənistanı, erməniləri və havadarlarını qəflət yuxusundan oyatdı.
Azərbaycan hərbçiləri Ermənistan ordusunu pərən-pərən saldı. Ölkənin rəsmi dairələri aldıqları zərbədən sonra bir-birini ittiham etməyə başladı. Ölkənin baş naziri ötən üç ilə yaxın müddət ərzində hələ də ordunu formalaşdırmağa çətinlik çəkir. Rəsmi İrəvan düşdüyü böhranlı vəziyyətdən xilas olmaq məqsədilə Azərbaycanla Ermənistan arasında sərhədyanı bölgədə təxribatlara əl atdı. Ancaq bu fitnə və hiylə də baş tutmadı. Beynəlxalq ictimaiyyət reallığı gördü. Odur ki, Nikol Paşinyan artıq reallığı açıq şəkildə etiraf etməyə məcbur olub. O bunu mayın 22-də keçirdiyi mətbuat konfransında daha açıq-aydın bildirib: “Qarabağ Azərbaycan ərazisidir”. Bu dəfə isə dediklərini daha əsaslı arqumentlərlə möhkəmlədib. Bununla cəmiyyətə ismarıc verir ki, perspektivi olmayan xülyadan əl çəksinlər. Yaxşı olar ki, Paşinyan bütün bu dediklərini sülh müqaviləsinə imza atmaqla da təsdiqləsin”.
Məhəmmədəli QƏRİBLİ
