Prezident İlham Əliyev Mövlam Şixəliyevin, Sahib Ələkbərovun və Yasin Məmmədovun ali hərbi rütbədən və dövlət təltiflərindən məhrum edilməsi haqqında sərəncam imzalayıb.
Sərəncam Mövlam Məmmədismayıl oğlu Şixəliyevin, Sahib Yunus oğlu Ələkbərovun və Yasin Seyfulla oğlu Məmmədovun ağır və xüsusilə ağır cinayətlər törətdiklərinə görə məhkum olunmaları barədə məhkəmə hökmünün qanuni qüvvəyə minməsi və Bakı Hərbi Məhkəməsinin təqdimatları əsas götürülərək imzalanıb.
Sərəncama əsasən, Mövlam Məmmədismayıl oğlu Şixəliyev general-mayor ali hərbi rütbəsindən, 3-cü dərəcəli “Vətənə xidmətə görə” ordenindən, “Vətən uğrunda” və “Hərbi xidmətlərə görə” medallarından məhrum edilib.
Sahib Yunus oğlu Ələkbərov və Yasin Seyfulla oğlu Məmmədov “Vətən uğrunda” medalından məhrum ediliblər.
Xatırladaq ki, general-mayor M.Şixəliyev ləğv edilmiş Milli Təhlükəsizlik Nazirliyi (MTN) Baş İstintaq İdarəsinin rəisi, Y.Məmmədov istintaq idarəsinin rəis müavini, 1-ci şöbənin rəisi, S.Ələkbərov isə istintaq idarəsinin metodiki yardım və kriminalistika şöbəsinin rəis müavini vəzifəsində çalışıb.
Maraqlıdır, elə generallar var ki, bundan da ağır cinayətlərə görə məhkum ediliblər, hətta cəzasını çəkib bitirən də var, hazırda cəza çəkəni də. Ancaq nədənsə məhkəmələr onların rütbədən və ali dövlət təltiflərindən məhrum edilməsilə bağlı təqdimatla müraciət etməyib. Məsələn, Akif Çovdarovu, hazırda həbsdə olan Rövşən Əkbərovu və digərlərini qeyd edə bilərik. Bu praktika ağır cinayətlərə görə məhkum edilən bütün generallara şamil edilməlidirmi?
Hərbi-siyasi ekspert Emin Həsənli “Bakı-Xəbər”ə açıqlamasında bildirdi ki, generalların bu cür rütbələrini itirməsi və cinayət hadisələri törətməsi çox təəssüfedici bir haldır: “General ən ali rütbədir, ölkə qarşısında müstəsna xidmətlərinə, uzun müddət keçdikləri yola görə belə rütbəyə layiq görülürlər. Hər bir zabit, leytenant rütbəsindən general rütbəsinə kimi uzun bir zaman keçir və həmin rütbələr ona ardıcıllıqla verilir. Təəssüf doğurucu bir faktdır ki, son illər ard - arda generalların bu cür məhkəmə halları baş verdi. Ancaq həyatdır. Qaçınılmaz bir faktdır və dünyanın bütün ölkələrində şəxsindən, rütbəsindən asılı olmayaraq bir çox şəxslər cinayət törədir, nəticədə də cəzalanırlar. Burda müxtəlif məsələlər məhkəmə tərəfindən nəzərə alınır. Məhkəmə bu təqdimatı ali rəhbərə göndərir. Bu, Prezidentin səlahiyyətindədir. Məhkəmənin də qərarına uyğun olaraq Prezident sərəncam imzalayır. Bilirsiz, burda məsələlər məhkəmə prosesində təhlil olunur, qərar verilir və bu qərara uyğun olaraq hərtərəfli araşdırılır. Görünür, həmin şəxslərin vətən, dövlət qarşısında xidməti dövrləri, o rütbələrə necə layiq görüldükləri də nəzərə alınır. Rütbədən də azad ediləndə həmin şəxsin törətdiyi cinayət, onun miqyası təhlil olunur. Elə şəxslər ola bilər ki, törətdiyi cinayət dövlətə, vətənə, ümumilikdə elə ağır nəticələr verər ki, həmin şəxslərin rütbələri alınar. Elə şəxslər də var ki, onların əvvəlki xidmətləri yüksək olduğuna görə, cinayət törətdikləri zaman həmin xidmətlər nəzərə alınır. Bu məsələlər yəqin ki, hərtərəfli təhlil olunur, ona uyğun qərarlar verilir. Bundan öncə də bir neçə generalın fəxri adı və rütbəsi alınmadı. Bu da cəmiyyət tərəfindən müqayisə edilir. Mən düşünmürəm ki, kiməsə güzəşt oluna. Bir adam həbs olunursa, vəzifəsini, əmlakını azadlığını itirir. Sadəcə rütbə məsələsində cinayətin ağırlığı, miqyası var ki, onlar təhlil olunur və ona uyğun qərar verilir. Yəni bu məsələ ilə də bağlı qanunvericilik var, buna uyğun da addımlar atılır. Necə ki, kiçik rütbələri vermək hansısa qurumun rəhbərinin səlahiyyətindədir, hərbi nizamnamə, hərbi qanunvericiliyə uyğun verilirsə, ali rütbələr də Konstitusiyanın Prezidentə verdiyi səlahiyyətə görə təqdim olunur. Ona görə də, məhkəmə bütün məsələləri araşdırır, sonra ölkə başçısına təqdim edir. Görünür, elə sübutlar, faktlar var ki, həmin şəxslər üçün cəzanın bütün növlərindən istifadə edilir. Digər şəxlər isə azadlıqlarını, əmlaklarını itirir, rütbələrini itirmirlər. Ancaq belə hallarla bağlı faktlar Prezidentdən gizlədilirsə, bu yolverilməzdir. Bəli, mən də hesab edirəm ki, etdikləri əməlləri ilə cəmiyyətdə nifrət qazanan bütün cinayətkar generallarla bağlı da Prezidentə belə təqdimat olunmalıdır”.
Məhəmmədəli QƏRİBLİ
