Prezidenti İlham Əliyev Çinin “China Media Group” media korporasiyasına müsahibəsində deyib ki, Vətən müharibəsi zamanı müsahibə verdiyi Qərb jurnalistlərinin əksəriyyəti çox aqressiv idi və Azərbaycanı təcavüzkar kimi təsvir etməyə çalışırdılar:
“Ərazilərimizi azad etdikdə, ərazi bütövlüyümüz uğrunda vuruşduqda, biz digər ölkənin ərazisinə addım da atmadıq. Biz, sadəcə, üzləşdiyimiz 30 illik işğalın və etnik təmizləmənin nəticələrini aradan qaldırırdıq”. Prezident əlavə edib ki, Qərb jurnalistləri Azərbaycanı təcavüzkar kimi qələmə verməyə çalışırdılar və əlbəttə, bu, tamamilə qəbuledilməz idi: “Bütün bunlar Qərb mətbuatının qərəzli, qeyri-tarazlı və anti-Azərbaycan yanaşmasını nümayiş etdirdi”.
Prezidentin dediyi qərəzli Qərb mediası Azərbaycanın müharibədən sonra yaratdığı yeni siyasi reallıqları qəbul edirmi, yoxsa yenə qərəzini davam etdirir? Xüsusilə də Qarabağda ermənilərin yaratdığı saxta “blokada” şousu kontekstində onların fəaliyyətini necə dəyərləndirmək olar?
Media eksperti Müşfiq Ələsgərli “Bakı-Xəbər”ə açıqlamasında bildirdi ki, Qərb mediasının Azərbaycana münasibəti bugünə qədər birmənalı olmayıb: “Nəinki birmənalı, hətta normal olmayıb. Müstəqilliyimizi qazanıb, demokratik inkişaf yoluna qədəm qoyduğumuzdan bugünə qədər daim həmin media dairələrinin qərəzli münasibətilə üz-üzəyik. Bu vahid bir proses olsa da, səbəbləri müxtəlifdir. Məlum səbəbləri belə təsnifatlaşdıra bilərik. Birinci səbəb budur ki, uzun illər müxtəlif ölkələrdə kök salmış erməni diasporu oradakı media qurumlarına təsir imkanları əldə edib. Hətta beynəlxalq statuslu bəzi media təsisatlarını belə öz oyunlarına qoşa biliblər. Məsələnin ikinci təsnifat qrupu budur ki, müəyyən Qərb ölkələrinin Azərbaycan və bizim daxil olduğumuz coğrafiyada geopolitik maraqları mövcuddur. Onlar bu maraqları təmin etmək üçün belə media təzyiqi vasitəsindən istifadə edirlər. Çalışırlar ki, prosesləri öz maraqlarına uyğunlaşdırsınlar. Bu mənada, xüsusi olaraq Fransa mediasını misal göstərə bilərik. Görürük ki, Fransa prezidentinin bizə münasibəti necədirsə, onun mediası da elə mövqe sərgiləyir. Biz bunu Laçın yolunda ekoaktivistlərimizin keçirdiyi aksiya zamanı da müşahidə etdik. Üçüncü qrup media isə qərəzə yox, qeyri-dəqiqliyə yol verir. Bunun da səbəbi bizim həmin KİV qurumları ilə yetərincə işləyə bilməməyimizlə bağlıdır. Belə nəticəyə gəlirik ki, birinci qrup erməni lobbisinin, ikinci qrup ayrı-ayrı dövlətlərin təsiri altındadırsa, üçüncü neytrallarla yaxşı əməkdaşlığı bacarmalıyıq. Azərbaycan İkinci Qarabağ müharibəsindən əvvəlki illərdən başlayaraq, bu sahədə olduqca sistemli iş aparır. Bunu biz İkinci Qarabağ savaşı zamanı ölkə başçısının 30-a yaxın KİV-ə verdiyi müsahibələrdə gördük. Üç gün əvvəl Şuşada keçirilən Qlobal Media Forumunda da əsas məqsəd xeyli sayda jurnalisti Azərbaycana gətirib, həqiqətləri onlara göstərmək idi. Biz ölkə olaraq yuxarıda təsnifatlandırdığımız hər qrupla öz üsulunda mübarizə aparırıq. Cənab Prezidentin ifadə etdikləri tam reallığı əks etdirir. Bunu biz media ictimaiyyəti olaraq yaxşı görürük. Artıq Azərbaycan neytral Avropa KİV-ləri ilə yaxından əməkdaşlığa başlayıb ki, onlar məlumatsızlıqdan qərəzə yuvarlanmasınlar. Əsas budur ki, artıq əks proses başlayıb. Hətta biz işğal dönəmində Qarabağa icazəsiz səfər edən jurnalistlərin adlarını da “qara siyahı”dan çıxardıq”.
Məhəmmədəli QƏRİBLİ
