Ləğv edilmiş Milli Təhlükəsizlik Nazirliyinin idarə rəisi olmuş Akif Çovdarov hərbi qulluqçu pensiyası almaq üçün iddia qaldırıb.
İddiaya ilk olaraq Bakı İnzibati Məhkəməsində baxılıb.
Akif Çovdarov 47 il iş stajının olduğunu, o cümlədən 11 il MTN-də idarə rəisi işlədiyini bildirib. O, həmçinin, 2012-ci ildən həbs olunduğu günə qədər general-mayor rütbəsi ilə xidmət etdiyini məhkəmənin diqqətinə çatdırıb.
Məhkəmə iddianı təmin etməyib. Məlum olub ki, məhkəmənin təqdimatına əsasən Azərbaycan Prezidentinin sərəncamı ilə 2020-ci ildə Akif Çovdarov general rütbəsindən və digər orden və medallardan məhrum edilib.
Məhkəmə qərarında göstərilib ki, iddiaçı-Akif Çovdarov general-mayor ali hərbi rütbəsindən məhrum edilərək əsgər rütbəsinə endirildiyindən, qanunvericiliyin tələblərinə görə, onun hərbi qulluqçu kimi pensiya almaq hüququ yoxdur.
Akif Çovdarov qərardadla razılaşmayaraq apellyasiya şikayəti verib. Bu günlərdə Bakı Apellyasiya Məhkəməsi şikayəti əsassız sayaraq rədd edib.
Xatırladaq ki, Akif Çovdarov 2017-ci ildə Bakı Hərbi Məhkəməsinin hökmü ilə 12 il azadlıqdan məhrum edilib. 2020-ci ildə imzalanmış əfv sərəncamı ilə azadlığa buraxılıb.
2022-ci ilin dekabr ayında Bakı Apellyasiya Məhkəməsi Akif Çovdarovun yaxınlarına məxsus 30 milyonluq əmlakın müsadirədən azad olunaraq sahiblərinə qaytarılması barədə qərar qəbul edib. Bir müddət əvvəl isə Ali Məhkəmə sözügedən qərarı ləğv edib.
Belə bir reputasiyaya malik olan keçmiş genaralın özünə “general təqaüdü” tələb etməsi nə dərəcədə doğrudur?
Elşən Həsənov: “Akif Çovdarov əməllərinə görə rütbədən məhrum edilibsə, buna görə özünü qınamalı və reallıqla razılaşmalıdır”
Xüsusi xidmət orqanlarının sabiq əməkdaşı Elşən Həsənov “Bakı-Xəbər”ə bildirdi ki, Akif Çovdarov pensiya davasına hələ həbsdə olarkən başlayıb: “Həbsdə olan MTN generalı Akif Çovdarov Əmək və Əhalinin Sosial Müdafiəsi Nazirliyinə qarşı məhkəmə iddiası qaldırmışdı. A.Çovdarov iddia ərizəsində nazirlik yanında Dövlət Sosial Müdafiə Fondunun Hərbi Qulluqçular və Xüsusi Rütbəli Şəxslərlə İş İdarəsindən məlumat vərəqəsinin göndərilməsini və pensiyanın təyin edilməsini tələb edirdi.
İşə ilkin instansiya məhkəməsi olan 1 saylı Bakı İnzibati İqtisad Məhkəməsində baxılıb və qərara əsasən iş üzrə icraat dayandırılıb.
Azərbaycan Prezidentinin sərəncamı ilə 2020-ci ildə Akif Çovdarov general rütbəsindən və digər orden və medallardan məhrum edilib. Onun hərbi qulluqçu kimi pensiya almaq hüququ yoxdur. Buna baxmayaraq, o yenə yüksək məbləğdə pensiya davası edir. Yaxşı olardı ki, Çovdarov bu barədə vaxtında daşıdığı general rütbəsinə hörmət edərdi. O halda heç belə vəziyyət də yaranmazdı. Akif Çovdarov öz əməllərinə görə rütbədən məhrum edilibsə, buna görə özünü qınamalı və reallıqla razılaşmalıdır”.
Elçin Qurbanov: “Akif Çovdarov bəraət almayıb ki, bütün hüquqlarını əvvəlki qaydada bərpa etmək istəyir”
İqtisadçı Elçin Qurbanov “Bakı-Xəbər”ə bildirdi ki, Azərbaycanın hüquq sistemi üçün ən faciəvi hadisə Akif Covdarov kimi bir adamın azadlığa buraxılması və onun əmlakının geri qaytarması ilə bağlı qəbul etdiyi qərar oldu: “ Çox sağ olsun ki, Ali Məhkəmənin yeni rəhbərliyi müsadirə ilə bağlı qərarı sonra qüvvədə saxladı. Bu adam ağır cinayət törətməkdə ittiham edilib. Korrupsiya əməlinə görə həbs olunub. Belə hallarda əmlakın müsadirə edilməsi qanunun tələbidir. Rütbədən məhrum olunubsa, onun general kimi pensiya alması da mümkün deyil. Akif Çovdarov bəraət almayıb ki, bütün hüquqlarını əvvəlki qaydada bərpa etmək istəyir. Onun törətdiyi cinayət əməlləri hər kəsə bəllidir. Belə adam sakit yerində oturmalı və azadlıqda olmağına şükür etməlidir. Hələ utanmadan yüksək təqaüd davası da edir”.
Məhəmmədəli QƏRİBLİ
