Azərbaycan iqtidarı ilə müxalifətin 4 məsələ ətrafında tarixi razılaşması…
"Bizim siyasi partiyalarla görüşümüz artıq ənənə halını almaqdadır. İki ay bundan əvvəl biz siyasi partiyalarla ilk görüşümüzü keçirdik və gələcək görüşlərin bəzi məsələlərini müzakirə etdik". Trend-in məlumatına görə, bunu Prezident Administrasiyasının İctimai-siyasi məsələlər şöbəsinin müdiri Əli Həsənov bu gün keçirilən iqtidar-müxalifət dialoqunda deyib.
Ə.Həsənov qeyd edib ki, hal-hazırda hakimiyyətlə ona müxalif mövqedə olan siyasi qüvvələr arasında ölkənin, dövlətin, cəmiyyətin bu günü və gələcəyi ilə bağlı istənilən məsələlər müzakirə mövzusu ola bilər: "Çünki bu iki institut faktiki olaraq Azərbaycan cəmiyyətinin bugünkü və gələcək ictimai, siyasi, sosial və digər sahələrdə idarəçiliyinin, dövlətin daxili və xarici siyasətinin taleyini müəyyən edir. Mən əminəm ki, burada siyasi partiya sədrləri tərəfindən yaxşı ideyalar, mövzular təklif olunacaq və biz görüşdən-görüşə o məsələləri müzakirə edib, bəlli bir fikrə gələcəyik".
Qeyd edək ki, dialoqda iqtidar tərəfdən Prezident Administrasiyasının İctimai-siyasi məsələlər şöbəsinin müdiri Əli Həsənov, onun müavini Tahir Süleymanov, şöbənin sektor müdiri Elman Paşayev iştirak edir.
Siyasi partiyalardan isə dialoqda Azərbaycan Demokratik Partiyasının sədri Sərdar Cəlaloğlu, Azərbaycan Demokratik İslahatlar Partiyasının sədri Asim Mollazadə, Milli İstiqlal Partiyasının sədri Yusif Bağırzadə, Azadlıq Partiyasının sədri Əhməd Oruc, Milli Dirçəliş Hərəkatı Partiyasının sədri Fərəc Quliyev, Klassik Xalq Cəbhəsi Partiyasının sədri Mirmahmud Mirəlioğlu, Böyük Quruluş Partiyasının sədri Fazil Mustafa, Bütöv Azərbaycan Xalq Cəbhəsi Partiyasının sədri Qüdrət Həsənquliyev, Vətəndaş və İnkişaf Partiyasının sədri Əli Əliyev, Böyük Azərbaycan Partiyasının sədri Elşad Musayev, Ümid Partiyasının sədri İqbal Ağazadə, Aydınlar Partiyasının sədri Qulamhüseyn Əlibəyli, Xalq Partiyasının sədri Pənah Hüseyn, Sosial Demokrat Partiyasının sədri Araz Əlizadə və digərləri iştirak edirlər.
"Bugünkü görüşdə də biz bütövlükdə siyasi partiyalarla bu görüşün formatını, reqlamentini, tematikasını və digər məsələləri müzakirə etdik". Bunu Əli Həsənov iqtidar-müxalifət dialoqunun nəticələrinə dair jurnalistlərə açıqlamasında deyib.
Ə.Həsənov qeyd edib ki, partiya sədrləri məsələlər ətrafında öz fikirlərini səsləndirdilər: "Görüşdə müxtəlif fikirlər səsləndirildi. Amma gəldiyimiz razılaşma ondan ibarətdir ki, Prezident Administrasiyasının nümayəndəsi ilə siyasi partiyaların rəhbərlərinin görüşü aktual hesab olunsun, cəmiyyət üçün gərəkli, lazımlı bir akt kimi dəyərləndirilsin və davam etdirilsin. Bundan sonra mütəmadi olaraq hər iki ayda bir dəfə bu formatda yığışıb Azərbaycan ictimaiyyətini, hakimiyyəti, siyasi partiyaları, digər institutları narahat edən və yaxud cəmiyyət üçün aktual hesab olunan məsələləri müzakirə edəcəyik".
PA rəsmisi ikinci məsələ kimi gələcək görüşlərin formatı məsələsinin müzakirə olunduğunu deyib: "Əlbəttə, biz siyasi partiyalar arasına ayrı-seçkilik qoya bilmərik. Aktiv siyasi fəaliyyətlə məşğul olan bütün siyasi partiyalar bu görüşlərdə iştirak edə bilər. İndiyə kimi keçirilmiş görüşlərdə təxminən 16-20 arasında siyasi partiya rəhbəri qatılıb. Azərbaycanda neçə partiyanın qeydiyyatdan keçməsindən asılı olmayaraq, aktiv siyasi fəaliyyətlə məşğul olan siyasi partiyalar bu görüşlərdə iştirak ediblər, bir neçəsi də təşrif buyurmayıb. Onlara da dəvətlər olunub, yəqin ki, bəlli səbəblərdən qatılmayıblar. Sonra iştirak etmək istəsələr, biz onlara da qapılarımızı açıq qoyuruq".
Ə.Həsənov əlavə edib ki, üçüncü məsələ kimi görüşlərin mövzusu müzakirə olunub: "Gələcəkdə görüşlərə çıxarılacaq mövzuların əvvəlcədən müəyyən olunması məsələsi ətrafında geniş fikir mübadiləsi aparıldı və razılıq əldə olundu. Bütün siyasi partiyaların, ayrı-ayrı mətbuat orqanlarının, o cümlədən dövlət qurumlarının ictimai əhəmiyyətli hesab etdiyi məsələlər siyahıya alınacaq, bütün siyasi partiyalara göndəriləcək və onların seçimi ilə həmin məsələlərdən biri növbəti görüşün müzakirəsinə çıxarılacaq".
PA rəsmisi qeyd edib ki, dördüncü razılaşdırılan məsələ ondan ibarət oldu ki, müzakirə olunan mövzu ətrafında yaranmış fikir ayrılığı və yaxud da fərqli fikirlər cəmiyyətin müzakirəsinə çıxarılsın: "Azərbaycan hakimiyyətinin mövqeyi ondan ibarətdir ki, ölkədə bütün institutlar - siyasi partiyalar, qeyri-hökumət təşkilatları, mətbuat orqanları dövlət siyasətinin formalaşması və həyata keçirilməsində iştirak etsinlər".
