19/01/2020 09:08
728 x 90

Bankların faiz siyasəti yenə problem yaradır…

img

Bu gün hökumətin xüsusi diqqət mərkəzində yer alan məsələlərdən biri də bankların ölkə iqtisadiyyatında daha fəal iştirakına, kreditlər vasitəsilə iqtisadi tərəqqinin stimullaşdırılmasında yaxından iştiraklarına nail olmaqdır. Qeyd olunan məqsədlə dövlət tərəfindən banklara lazımi şərait yaradılır, onlar həm vəsaitlə təmin olunur, həm də digər müvafiq tədbirlər görülür. Amma real vəziyyət həm də onu üzə çıxarır ki, banklar onlar üçün yaradılan şəraitdən hələ də, belə demək olarsa, sui-istifadə edir. Hər halda, kredit faizlərinin hələ də yüksək həddə olması bu qənaəti gücləndirir.

Xatırladaq ki, kreditlərin aşağı düşməsini təmin etmək məqsədilə artıq Mərkəzi Bank  2018-2019-cu illərdə uçot dərəcəsini təxminən 2 dəfə azaldaraq 7,5%-ə endirib. Mərkəzi Bankın sədri Elman Rüstəmov Prezident İlham Əliyevin yanında 2019-cu ilin yekunları ilə bağlı keçirilmiş müşavirədə  bu məsələyə toxunaraq bildirib: “Biz bu siyasətin bank faizlərinə təsirini görürük. Məsələn, son 2 ildə biznes kreditlərinin orta illik faiz dərəcəsi 5 faiz bəndi azalaraq 11%-ə düşüb. Amma bu səviyyə bizi qane etmir və faizlərin daha da azalması istiqamətində işləri davam etdirəcəyik”. Bundan başqa, baş bankirin sözlərinə görə, ötən il dövriyyədə olan pul kütləsinin həcmi 24% artırılıb: “Pul siyasətinin yumşaldılması çərçivəsində banklara 2 milyard manatdan çox vəsait verilib ki, onlar bunu kreditləşmə üçün istifadə etsinlər. Ümumilikdə son 3 ildə aşağı inflyasiya, milli valyutanın sabit məzənnəsi, getdikcə azalan xarici borc Azərbaycanın xarici kreditor mövqeyini gücləndirib. Hazırda bizim xaricdə yerləşdirdiyimiz vəsaitlərin məbləği 100 milyard ABŞ dollarından çoxdur ki, bu da öhdəliklərimizlə müqayisədə 2 dəfə çoxdur. Bu da onu göstərir ki, Azərbaycanda möhkəm makroiqtisadi sabitlik, dayanıqlılıq yaradılıb və bu, iqtisadi inkişafa təsir edir”.

Yuxarıda qeyd olunduğu kimi isə, bütün bunlar fonunda bankların kredit faizləri hələ də yüksək olaraq qalır. Ekspertlər də hesab edir ki, uçot dərəcəsinin enməsi barədə qərar qəbul edilsə də, bu, kreditlərin ucuzlaşmasında, iqtisadiyyata banklar tərəfindən daha çox vəsait yönəldilməsində özünü hələ də istənilən şəkildə büruzə vermir. Məlumat üçün qeyd edək ki, uçot dərəcəsi Mərkəzi Bankın ölkənin digər banklarını pul kütləsi ilə təmin etməsidir. Yəni burada Mərkəzi Bank kommersiya bankları və digər maliyyə təşkilatlarına kredit verir, onlar isə öz növbəsində həm adi vətəndaşları, həm də müxtəlif şirkət və təşkilatları kreditlə təmin edir. Deməli, uçot dərəcəsi aşağı düşdükcə, kredit faizləri də ucuzlaşmalıdır. Bundan başqa o da faktdır ki, ölkədə inflyasiya səviyyəsi də uçot dərəcəsinin endirilməsinə imkan verir.  Belə vəziyyətdə bank kreditlərinin ucuzlaşması mütləq şəkildə həyata keçməlidir. Amma reallıq göstərir  ki, Mərkəzi Bank uçot dərəcəsini aşağı salsa da, banklar heç də kreditləri buna görə ucuzlaşdırmır. Bu səbəbdən məsələyə inzibati müdaxilə də zəruri sayılır. Ekspertlər də qeyd edir ki, əslində, kreditlərin faizlərinin aşağı düşməsi üçün bütün amillər var. Əvvəla, yuxarıda qeyd olunduğu kimi, Azərbaycanın iqtisadi inkişaf sürəti və nailiyyətlər buna imkan verir. Digər tərəfdən, problemli kreditlərin həlli ilə bağlı dövlət tərəfindən atılan addımlar banklara böyük dəstək olub. Eyni zamanda, milli valyutanın mübadilə məzənnəsi uzun müddətdir sabitdir və belə görünür, hökumət bu sabitliyi yaxın dövrdə də qorumağa çalışacaq. Rəsmi inflyasiya səviyyəsi də, yuxarıda qeyd olunduğu kimi, aşağı həddədir. Mərkəzi Bankın yumşaq pul-kredit siyasəti, yəni uçot dərəcələrinin aşağı salınması, ehtiyat normalarının minimum səviyyədə olması kimi amillər də kreditlərin aşağı faizlə verilməsini stimullaşadıran faktorlar sırasında yer alır. Bankların cəlb etdikləri resursların ucuz olması da burada mühüm rol oynayır. Amma bunlara rəğmən, kreditlərin istənilən həddə ucuzlaşması baş vermir. Hazırda Azərbaycanda kommersiya banklarının depozit portfeli ilə kredit portfeli arasında faizlər baxımından kəskin fərq var. Ekspertlər hesab edir ki, fərqin yaranmasının əsas səbəbi bankların yenə də daha çox gəlir əldə etməyə çalışmasıdır. Yəni qısa müddətə daha çox gəlir əldə etmək prinsipi banklar üçün prioritet olaraq qalır. Bundan əvvəl banklar tərəfindən belə iddialar da səslənirdi ki, ölkə iqtisadiyyatında risqlərin yüksək olması səbəbindən faizlər yüksəkdir. Amma həyata keçirilən son islahatlar bankların bu bəhanəsini də aradan qaldırıb. İqtisadiyyatda risklərin aşağı olması və bunun beynəlxalq maliyyə qurumları tərəfindən də bəyan edilməsi verilən kreditlərin geri qayıtma ehtimalının yüksək olmasını təsdiqləyir.  Bu səbəbdən belə vəziyyət də bankların kredit faizlərini aşağı salmasına təsir göstərməlidir. Lakin banklar yenə də faizləri aşağı salmaqdan imtina edir. Elə bu da iqtisadi inkşafın istənilən həddə olmasına maneə yaradan faktorlardan sayılır. Məhz bu mənada, artıq məsələyə inzibati formada hansısa təsir göstərilməsi olduqca önəmli sayılır. Çünki bankların real mövqeyi hökumətin siyasəti ilə tam şəkildə uzlaşmır.

Tahir TAĞIYEV

Son xəbərlər