Açıqlanan statistik rəqəmlərə əsasən, ölkəmizdə idxal göstəriciləri artıb. Məlumdur ki, istehlak məhsullarının böyük bir hissəsi məhz idxal hesabına təmin edilir. Azərbaycanın coğrafi baxımdan kənd təsərrüfatı təyinatlı torpaqlara sahib olmasına baxmayaraq, əksər məhsullar ölkəmizə idxal olunur.
Məlumat üçün bildirək ki, bu ilin yanvar-avqust aylarında Azərbaycan Gürcüstandan 11,2 milyon ABŞ dolları dəyərində 4482,4 ton diri iribuynuzlu mal-qara tədarük edib. Bu da ötən illərlə müqayisədə 2,1 dəfə artım deməkdir.
Onu da qeyd edək ki, 8 ayda qonşu ölkədən Azərbaycana ümumi dəyəri 3,3 milyon ABŞ dolları olan 1049,3 ton diri qoyun və keçi də ixrac olunub.
Onu da bildirək ki, ötən il rəqəmlərdə ət idxalında ciddi azalma müşahidə olunurdu. O zaman bildirilirdi ki, yerli istehsal daxili tələbatı ödədiyindən idxal azalıb. Maraqlıdır, bu il ət idxalı niyə iki dəfədən çox artıb?
“Aqrar potensialı olan ölkənin əksər ərzaq məhsullarını xaricdən idxal etməsi yolverilməzdir”
Aqrar sahə üzrə ekspert Niyazi Əliyev qeyd etdi ki, aqrar potensialı olan ölkənin əksər ərzaq məhsullarını xaricdən idxal etməsi yolverilməzdir. Buna görə də aqrar sektora əsaslanan regional inkişafı stimullaşdırmaq, bu istiqamətdə real işlər görmək lazımdır: “Maldarlıq üçün Azərbaycanda şərait nə qədər münbit olsa da, tələbatın 40 faizi həcmində ət istehsal edilir. Məlumdur ki, ilin əvvəlində elan edildi ki, ölkəyə ət idxalı azalıb. Həmin ərəfədə idxalın azalmasını ölkədə ət istehsalının artması ilə izah etdilər. İdxalın azalmasına səbəb həm də o idi ki, şadlıq saraylarının, kafe-restoranların bağlanması nəticəsində ətə tələbat azalmışdı. Buna uyğun olaraq da idxal azaldı. Artıq karantin qaydaları yumşaldıldı, ona görə də ətə tələbat artdı. Tələbata uyğun olaraq da xaricdən ət idxal edirik. Yaxın gələcəkdə də idxalın azalmasını görmürəm. Azərbaycanda nə qədər şərait olsa da, heyvanların açıq şəkildə saxlanılması imkan vermir ki, heyvanların saxlanılmasını genişləndirək. Açıq otlaqlarda təxminən 10 milyon iri və xırdabuynuzlu heyvan saxlamaq mümkündür.
Kənd təsərrüfatının intensiv inkişafı üçün fermerlərə yetərincə subsidiyalar verilməlidir”.
Günel CƏLİLOVA
