"Yada düşdü" jurnalı 2 yaşını qeyd etdi

Tarix: 17.03.2014 / 10:55
Bölmə: Gündəm

Yaddaş insanın keçmişlə, ötüb keçən zamanla bu gününü birləşdirən, həmahəng edən bir məfhumdur. Yaddaşı olmayan xalq, yaddaşı olmayan insan heç vədə özünü tanıya, təsdiqləyə bilməz. Biz yaddaşımız vasitəsilə keçmişə qayıdır, olub-keçənləri gözlərimiz önündə canlandıra, ürəyimizdə həmin hadisələri yaşaya bilirik. Hər birimizdə nostalji hisslər yaradan bu məqamlardan hətta kövrəlirik də, bəzən dodağımız da qaçır.
"Yada düşdü" dərgisi özündə bu hissləri, bu məqamları yaşatdığı üçün dəyərlidir. Bu jurnal həyatımızdan, mədəniyyətimizdən, jurnalistikamızdan, ədəbiyyatımızdan, səhnəmizdən keçən və bu aləmdə dərin izlər qoyan şəxsiyyətləri unudulmağa qoymur. Əlbəttə ki, unutsaq unudularıq, unutsaq gələcək nəsillər də bizi yaddaşlarına yaxın buraxmaz.
"Yada düşdü" jurnalı özünün iki yaşını qeyd etdi, özü də ruhən, mənən ona yaxın, simsar olan insanların əhatəsində. Beynəlxalq Mətbuat Mərkəzində düzənlənən tədbirdə hər kəs sözün yaratdığı nostalji hisslərin təsiri altında idi. "Yada düşdü" bura yığışanların yadına çox əzəmətli insanları gətirdi...
Əvvəlcə qeyd edək ki, "Yada düşdü" jurnalı iki ayda bir-ildə altı dəfə çıxır. Dərginin baş redaktoru tanınmış yazıçı, ustad jurnalist Nahid Hacızadə, təsisçisi isə Nəzakət Məmmədovadır.
Jurnalı ərsəyə gətirənlərin verdiyi məlumata görə, "Yada düşdü" nostalji-yaddaş jurnalıdır, jurnalın əsas istiqaməti nostalgiyadır, ötənləri-keçənləri yada salmaqdır. Onu da deyək ki, jurnalın ən çox sevilən "Ölməzlər", "Unutsaq unudularıq", "Olanlardan keçənlərdən", "Qəlbimizə yazılan şeirlər", "Yazıçı ömrünün rəngləri", "Yaddaşımızda yaşayanlar" rubrikalarında tanınmış şəxsiyyətlərlə bağlı çox maraqlı yazılar dərc edilib. Jurnalda indiyə qədər Səməd Vurğun, Rəsul Rza, Əli Vəliyev, Əli Kərim, Əliağa Kürçaylı və başqaları haqqında sənət adamlarının çoxsaylı xatirələri işıq üzü görüb. Bu jurnal Azərbaycanın bütün bölgələrinə gedib çıxa bilib. Bundan başqa, dərgi respublika sərhədlərini adlayaraq Türkiyə, İran, Almaniya və keçmiş MDB ölkələrinə də yayılıb və bu məmləkətlərdə jurnalın abunəçiləri var.
"Yada düşdü" jurnalının Beynəlxalq Mətbuat Mərkəzində qeyd edilən iki yaşı münasibətilə keçirilən tədbiri Azərbaycan Mətbuat Şurasının sədri Əflatun Amaşov açaraq jurnalın yubileyinə toplaşanları salamladı və bildirdi ki, Azərbaycanda çoxlu sayda qəzet-jurnal olub, var, olacaq da. Ə.Amaşovun sözlərinə görə, heç də o qəzet və jurnalların hamısı özünə oxucu diqqəti cəlb edə bilmir. O dedi ki, "Yada düşdü" müasir qəzet və jurnal ailəsinə iki ildir daxil olmasına baxmayaraq, oxucu rəğbəti qazanmağa müvəffəq olub. Onun sözlərinə görə, jurnalın özəl cəhəti burada retronun üstünlük təşkil etməsidir. O bildirdi ki, insan yaşa dolduqca daha çox keçmişlə yaşayır, nəyi düzgün, nəyi yanlış etməsini saf-çürük edir. "Bu jurnalda daha çox ədəbiyyat, mədəniyyət xadimlərilə bağlı xatirələr dərc edilir. Bu iki il ərzində jurnal kifayət qədər tanınıb. Yaradıcı heyətə arzu edərdim ki, jurnalın 20 illiyini, gələcək nəsillər isə yüz illiyini qeyd etsinlər" deyə bildirən Ə.Amaşov qeyd etdi ki, vaxt gəlsin, bu jurnal Azərbaycan tarixinin, mədəniyyətinin ensiklopediyası rolunu oynasın.
Azərbaycan Aşıqlar Birliyinin sədri, xalq şairi Zəlimxan Yaqub da "Yada düşdü" jurnalının iki illik yubileyini təbrik etdi. O bildirdi ki, "Yada düşdü" deyəndə yada gözəl və şərəfli insanlar, ləyaqətli adamlar, böyük şəxsiyyətlər düşür: "Jurnalın adını "Yada düşdü"nün baş redaktoru yaxşı tapıb. Mən bu jurnalın ilk saylarından başşlayaraq son saylarına qədər hamısını oxumuşam və onları kitabxanamda saxlayıram. Burada Azərbaycanın görkəmli şairləri, yazıçıları, sənət adamları yad edilir, şirin xatirələri dilə gəlir. Bu jurnal çox qiymətlidir. Sevilmək, el-el, əl-əl dolaşmaq hər jurnalın işi deyil, amma bu jurnala nəsib olub. Arzu edərdim "Yada düşdü"nün tirajı çox olsun ki, hər kəs onu oxuya bilsin. XX əsrin böyük şəxsiyyətləri çox olub, amma daha çox Üzeyir bəy və Səməd Vurğunun yaxşılığından danışırlar. Bu jurnal da hər zaman yaxşılar cərgəsində olsun. "Yada düşdü"nün min illiyini qeyd etsinlər və iki yaşı mübarək olsun!".
Z.Yaqubdan sonra Ə.Amaşov sözü "Azərbaycan" jurnalının baş redaktoru, yazıçı İntiqam Qasımzadəyə verdi. İ.Qasımzadə bildirdi ki, "Yada düşdü" jurnalı hər ədəbiyyat adamının əziz jurnalıdır: "Bir müddət əvvəl "Azərbaycan" jurnalının 91 yaşı oldu, gün o gün olsun ki, siz də 91 yaşınızı da, 101 yaşınızı da qeyd edəsiniz. Bir vaxtlar Nahid müəllim Hacızadə incəsənət, mədəniyyət, ədəbiyyat adamları ilə bağlı öz xatirələrini yazıb "Azərbaycan" jurnalında çap etdirirdi. Görünür, Nahid müəllim hiss etdi ki, onun da öz jurnalı olmalıdır. Azərbaycanda memuar janrı həmişə zəif olub, demək olar ki, bizdə bu janr elə də inkişaf etməyib. Ancaq bu jurnal çox sağ olsun ki, memuar janrının inkişafına çalışır, burada memuarlar çap olunur. Bu jurnal memuar janrını ayağa qaldırıb sabaha doğru aparır".
Əməkdar jurnalist Flora Xəlilzadə də jurnalla bağlı söz dedi. Tanınmış jurnalist bildirdi ki, qəzet və jurnal bolluğunda hansısa bir jurnalın, dərginin sifətini tanıtmaq, adını təsdiq etdirmək çox çətindir: "Mən "Yada düşdü"yə bir xatirə jurnalı kimi baxıram".
Türkiyə Cumhuriyyətinin Azərbaycandakı Səfirliyinin mədəniyyət və mətbuat müşaviri Seyid Əhməd bəy də jurnal haqda isti münasibətini bildirdi. Onun fikrincə, jurnal bolluğunda belə bir dərginin özünə tez zamanda oxucu qazanması böyük işdir. Seyid Əhməd bəy jurnalın yaradıcı heyətini təbrik edərək bildirdi ki, xatirə janrında, dahi, böyük şəxsiyyətlərin xatirəsinə işıq tutan jurnalın çap edilməsi təqdirəlayiqdir: "Bu gün çoxlu qəzet-jurnal var. Amma "Yada düşdü" öz ideyasına, yönünə görə çox fərqlidir. Həqiqətən də çox dəyərli insanları, şəxsiyyətləri xatırlamaq çox yaxşı hissdir".
Respublikanın əməkdar artisti, bədii qiraət ustası Ağalar Bayramova da söz verildi. O bildirdi ki, jurnalın yolu, izi, sifəti onu qane edir: "Bu jurnalda çap olunanlar haqqında hamımızın məlumatı var. Burada nələri görmək istərdim? Hər bir insanda xarakter deyilən bir şey var. Arzu edərdim ki, bu jurnalın özünün bitkin xarakteri olsun. O heç bir jurnala bənzəməsin. Çox istərdim ki, populyar olan, lakin yazdığı cızma-qaradan başqa bir şey olmayan insanlar bura ayaq açmasın, amma heç kəsin tanımadığı, adı dəftərdə olmayan, sənətə xidmət edən insanların əsərləri bu jurnalda çap olunsun. Bu jurnalın daimi mövzuları istedadlı adamlarla bağlı olarsa, onu oxucular daha çox arzulayacaq".
"Yada düşdü" filmi də təqdim edildi. Burada jurnalın keçib gəldiyi yol, gördüyü işlər, görkəmli adamların onunla bağlı düşüncələri, arzuları yer alıb.
Jurnalın təsisçisi Nəzakət Məmmədova filmdə jurnalın adı haqda danışıb. O bildirib ki, bu jurnal vaxtilə onun üçün bir xəyal, arzu olub: "Belə bir jurnal arzulayırdım. Düşünürdüm ki, bu gün dünyada ən oxunaqlı, ən maraqlı jurnallar xatirə jurnallarıdır. Jurnalın çapı reallaşanda onun adını ilk olaraq "Xatirələr" qoymaq istədim. Sonra Nahid müəllimin "Yada düşdü" adlı kitabının adı üstə dayandım. Jurnalın adını belə adlandırdım və Nahid Hacızadəni baş redaktor seçdim".
"Yada düşdü" jurnalına uğurlar arzu edirik. O bizimlə keçmişimiz arasında qırılmaz bir bağ rolunu oynayır...
Zülfiyyə BABAYEVA

DİGƏR XƏBƏRLƏR

Tarix: 02.07.2026 / 09:54

Avropa sentyabrdan uşaqların sosial şəbəkələrə girişini qadağan edəcək...

Tarix: 02.07.2026 / 09:09

Bodrumda Kılıçdaroğluna “soyuq duş” - etiraz imza sayı 15 mini keçdi

Tarix: 01.07.2026 / 19:05

Rusiya Hindistan neftinin ümidinə qaldı...

Tarix: 30.06.2026 / 21:33

Nyu-Yorkda istilik xəbərdarlığı - təcili yardım planı aktivləşdirildi

Tarix: 30.06.2026 / 16:47

Bodrumda Kılıçdaroğluna qarşı imza kampaniyası - “Səni şəhərimizdə istəmirik”…

Tarix: 30.06.2026 / 09:26

Sinan Oğan suala sualla cavab verdi - gündəm oldu

Tarix: 29.06.2026 / 16:47

Kılıçdaroğlu Kadir İnanırın dəfn törənində fitə basıldı

Tarix: 29.06.2026 / 11:19

Baş prokuror Xətai rayonunda vətəndaşları qəbul edəcək

Tarix: 29.06.2026 / 10:57

İran Körfəz öıkələrinə yeni təhlükəsizlik sxemi təklif edəcək...

Tarix: 28.06.2026 / 13:47

Kılıçdaroğlu özünü Atatürklə müqayisə etdi, cavab sərt oldu – “Ona millət xain demədi, amma sənə..."

Tarix: 28.06.2026 / 10:46

Türkiyəyə 700 milyon dollarlıq təyyarə mühərrikləri satışı erməni lobbisinin yuxusunu qaçırdı - ANCA hərəkətə keçdi

Tarix: 26.06.2026 / 17:20

Kılıçdaroğlunun “nəhəng karvanlı” İstanbul səfəri alınmadı…

VİDEO

Tarix: 27.11.2025 / 11:10

Biri ermənini öpür, biri sovet bayrağı qaldırır... Günümüzə baxın! - VİDEO

Tarix: 12.11.2025 / 11:05

Lavrov işdən kənarlaşdırılır, yoxsa oyun qurulur? - VİDEO

Tarix: 21.06.2025 / 08:15

Dünyada xaos böyüyür, Azərbaycana təhlükə də artır... - VİDEO

Tarix: 25.06.2026 / 20:33

Əmək pensiyası yaşına görə qonşular bizi bir neçə il qabaqlayır...

Tarix: 25.06.2026 / 14:47

Ermənistan hakimiyyətinə qarşı 102-ci Rusiya bazası hərəkətə gətirilir - İrəvan panikada...

Tarix: 25.06.2026 / 13:42

Trampa partiyadaşlarından ağır zərbə - İranla müharibəyə girməyi qadağan etdilər...

Dövlət qulluğu statusu-dövlətçilikdə Azərbaycan brendi...