Xəzər dənizinin Azərbaycana aid hissəsində Rusiya bayrağı altında üzən "Vətən-1” gəmisi qəzaya uğrayıb. APA-nın Rusiya mətbuatına istinadən verdiyi məlumata görə, 1972-ci ildə istehsal olunan, "VTS-TRans” şirkətinə məxsus olan gəminin göyərtəsində Rusiya və Ukrayna vətəndaşları var.
Məlumata əsasən, Rusiyadan Azərbaycana sement daşıyan gəminin mühərriki sıradan çıxıb və gəmi Bakı sahili yaxınlığında dayanmağa məcbur olub.
Gəmi heyəti bildirib ki, onların mühərriki təmir etmək üçün ehtiyat hissələri yoxdur, qida məhsulları və yanacaq da tükənib. Gəmi sahibinin isə limana külli miqdarda borcu var. Heyət üzvləri deyiblər ki, üç gündür limana daxil ola bilmirlər, müraciətlərinə heç kim baxmır, məvacibləri isə 3 aydan çoxdur, ödənilmir.
Məlumatda həmçinin qeyd olunur ki, gəminin köməyinə Azərbaycan Dövlət Dəniz Administrasiyasının qəza-xilasetmə gəmisi göndərilib. Gəminin Bakı dəniz limanına göndərilməsi gözlənilir.
Həştərxan vilayətin qubernatoru Aleksandr Jilkin isə bildirib ki, gəminin sahibi ilə danışıqlar aparılır: "Biz gəminin sahibi ilə təmirlə bağlı danışıqlar aparırıq. Azərbaycan da lazımi yardımlar edir”.
Gəmin kapitanı Rusiya vətəndaşı Timur Kamalovdur.
Gəminin göyərtəsində olan Aleksey, Bakulin, Yelena Kosıreva, Əsədulla Əsədullayev Rusiya, Maksim Ponomarçuk, Pavel Savçenko, Dmitri Buş, Aleksey Vekov, Dmitri Knyazev və Oleq Komisarçuk isə Ukrayna vətəndaşıdır.
