Məşhur iş adamı, xeyriyyəçi, "Avesta" Konserninin sahibi, Xəzər dənizində əfsanəvi şəhərcik saldıran doktor Hacı İbrahim Türkiyənin Manisa şəhərindəki mədən fəlakəti qurbanlarına Qırmızı Aypara Cəmiyyətinin xəttilə 5 min dollar yardım göstərib. Bu barədə məlumatı dünən iş adamının ofisindən aldıq. Hacı İbrahimin indiyə qədər də dünyanın müxtəlif ölkələri, o cümlədən ərəb dövlətləri, Avropa dövlətləri, Türkiyə ilə intensiv işgüzar əlaqələrinin olduğu bəlli idi. Ancaq bu addımla iş adamı qardaş Türkiyəyə təkcə biznes tərəfdaşı kimi yox, həm də dar günün dost-qardaşı kimi baxdığını nümayiş etdirib. Bizimlə söhbətində bunu özü də dönə-dönə təkrar etdi ki, qardaş-bacılarımızın Türkiyədə böyük acı içində olduğu bir vaxtda mən laqeyd qala bilməzdim və onların ağrı-acılarını azaltmaq üçün nəsə etməli idim.
Azərbaycanda ötən 10 gün ərzində Qırmızı Aypara Cəmiyyəti xəttilə 12 min dollar yardım toplandığı halda, "Avesta" prezidenti təklikdə 5 min dollar yardım göstərib.
Xatırladaq ki, Hacı İbrahim 20 ildən çoxdur geniş biznes fəaliyyəti ilə bərabər, həm də böyük xeyriyyəçilik işləri görür. İlk biznes fəaliyyətinə başladığı 90-cı illərdə Naxçıvanda məscid tikdirib, Muxtar Respublikanın 10-dan çox kəndinə su çəkdirib, onlarla kilometr rahat yollar çərib, xəstələr müalicə etdirib. Həm də bunları hər hansı təmənna ilə yox, həqiqətən kəskin ehtiyac duyulan yerlərdə və kimsələrə edib.
Təəssüf ki, təmənnasız xeyriyyəçiliklə ad çıxarmış bu iş adamı bəziləri tərəfindən şantaj olunur. Doğrudur, belə şantaj cəhdləri heç bir nəticə vermir və əsassız olduğu üçün nəticə verə də bilməz. Məsələn, özünü guya iş adamı kimi təqdim edən Elşad Məmmədov heç bir əsas olmadan ondan qiyməti 500 minə yaxın olan iki mənzil qoparmaq üçün aylardır gah intihar edəcəyini deyir, gah "öz ağzını tikir", belə şantajlara hətta ölkə başçısının da diqqətini cəlb etmək üçün müxtəlif üsullara əl atır. Məşhur xeyriyyəçini şantaj etmək istəyən belə şəxslərin bir məlum icra başçısı (?) tərəfindən qəbul olunaraq ciddi münasibət göstərilməsi isə sadəcə təəssüf doğurur.
Qəribə deyilmi? Əsl türk canlı vətənpərvər və insanpərvər bir şəxs öz soydaşlarına və qardaş ölkə vətəndaşlarına illərdir xeyriyyəçilik əli uzatdığı bir vaxtda vətənində kimsə tərəfindən əsassız şantaj olunur...
