Hafiz Məmmədov özünü daha da çətinə saldı

Tarix: 19.05.2014 / 07:07
Bölmə: Gündəm

Bakı Futbol klubunun, "Bank of Azerbayjan"ın "Baqlan qrup"un sahibi Hafiz Məmmədovun adı və fəaliyyəti barədə çox şübhəli söz-söhbətlər son vaxtlar daha da güclənib. Bu gün Azərbaycanda ən dumanlı təsəvvürlər yaradan üç fəaliyyət sahəsi var ki, onun üçündə də "Hafka" adlandırılan Hafiz Məmmədovun adı keçir: bank işi, futbol və tikinti işləri. Hafiz Məmmədovun adı niyə bu qədər "əlləm-qəlləm" söhbətlərin mövzusu olur?
Təbii ki, bunun səbəbini ilk növbədə onun hər üç sahədə - bank işi, futbol və birbaşa biznesdəki fəaliyyətinin dərin təhlili ilə ortaya çıxarmaq olar. Ancaq bu yazıda hələlik Hafiz Məmmədovun fəaliyyətini dərin təhlil etmək fikrimiz olmadığı üçün başqa bir məsələyə diqqət yönəltmək istəyirik. Bu da ondan ibarətdir ki, kim olursa olsun, adamlar haqqında "əlləm-qəlləm" söhbətlərin başqa bir səbəbi həmin şəxsin hərəkətləri və danışıqları ilə bağlıdır. Yəni peşəkar fəaliyyət bir yana qalsın, insan bəzən çıxış və adi danışığında elə səhvlər buraxır ki, onun bir çox hallarda effekti sadəcə ifşaedici olur və ya öz sahibinə qarşı kəskin suallar yaradır. Məsələn, Hafiz Məmmədovun üç gün əvvəl mediaya böyük həcmli müsahibəsi kimi. Başa düşülür ki, Hafiz Məmmədov bu müsahibə ilə özünü son günlərin ən qarmaqarışıq söhbətlərindən xilas etməyə və təmizə çıxmağa çalışıb. Söz yox ki, müsahibənin verilməsində təşəbbüskar şəxsən özü olub və hansısa mülahizələrlə müsahibə verdiyi media orqanını seçərək hərəkətə keçib. Hamı bilir ki, hələ aylar öncə bir beynəlxalq jurnalist təşkilatı tərəfindən rüşvət verməkdə ifşa olunan və hətta bu məsələ ilə dünyanın nüfuzlu televiziya kanalının hədəfinə düşən Hafiz Məmmədov barədə son həftələr yeni söhbətlər başlayıb. Bir vaxt Azərbaycanın adını guya qaldırmaq üçün Fransada futbol klubunun alış-verişinə baş vurdu, sonra jurnalistlərə pul paylayan yerdə lentə alınaraq telefiziyada göstərildi və həmin televiziya onun timsalında Azərbaycanda guya korrupsiyanın tüğyan etdiyi barədə dövlətimiz üçün ləkələyici eyhamlar vurdu. Sual olunur: Azərbaycanın adını qaldırmaq üçün "futbol klubu alıram" demək hara, öz hərəkətləri ilə dövləti beynəlxalq arenada korrupsiya ittihamlarına hədəf etmək hara? Bəlkə Azərbaycana "Hafizsayağı" xidmət belə olur? Və belə xidmətin xoş olmayan təəssüratı səngiməmiş "Bank of Azerbayjan"ın iflas etdiyi, futbolçularla Hafiz Məmmədov arasında problem yarandığı, Hafiz bəyin öz şərikləri, məşhur Məmmədovlarla yollarının pis formada ayrıldığı barədə xəbərlər yayıldı. Hafiz Məmmədovu son bir neçə gündə xüsusi məqsədlərlə mediaya üz tutmağa vadar edən əsas səbəbin məhz bu söz-söhbətlərlə bağlı olduğuna artıq heç bir şübhə yoxdur. Ancaq məşhur oliqarx son vaxtlar onu hədəfə almış qara-qura işlərin hamısına aydınlıq gətirə bildimi bir müsahibə ilə? Müsahibənin təkcə birinci hissəsinin doğurduğu təəssürat, Hafiz Məmmədov üçün nə qədər acı olsa da deməliyik ki, təəssüfləndiricidir. Əvvəla, Hafiz bəyin danışıq üslubundandı, ya söhbətin qələmə alınma ustalığındandı, dəqiq deyə bilmərik, müsahibənin bir çox yerləri o qədər rabitəsiz və qeyri-müəyyəndir ki, anlamaq çətindir, nə demək istədiyi bəzən başa düşülmür. Digər tərəfdən, müsahibənin bir sıra hissələri birbaşa Hafiz Məmmədovun özünə qarşı ittihamedici suallar doğurur, beləliklə, guya son günlərin mübahisəli məsələlərinə aydınlıq gətirmək istəyən şəxs özünü daha dərin bataqlığa salır. Ondan başlayaq ki, Hafiz bəy Xədicə Abbasovadan "sitat" gətirməklə uğursuz gediş edib. Xədicə Abbasovanın dili ilə "mən onların səviyyəsinə enmədim" sözləri, Hafiz Məmmədovun nə demək istədiyindən asılı olmayaraq, onun öz əleyhinə çevrilir. Adətən sitatı sözü, adı bir çox sferalarda önəmli olan şəxslərdən gətirirlər. Xədicə Abbasovanın isə məhdud bir sahə adamı olduğunu nəzərə alsaq, belədə Hafiz Məmmədovun məhz ondan sitat gətirməsi həqiqətən uğursuz taktikadır.
Digər tərəfdən, Hafiz bəy futbolçuların maaş məsələsini aydınlaşdırmaq istərkən də sual yaradıb. Deyir ki, futbolçular pula önəm vermədiklərini bildiriblər, qorxudan mənə heç nə demirlər. Maraqlıdır, Hafiz Məmmədov hansı qorxudan danışır, əgər söhbət futbolçuların qanuni maaşlarından gedirsə, futbolçular öz qanuni maaşlarını istəyəndə nə üçün sahibkardan qorxmalıdır?
İndi də gələk lisenziya söhbətinə. Hafiz Məmmədov öz klubunun avrokuboklara düşməməsini lisenziya məsələsi ilə izah edənlərə cavab verir ki, bu, lisenziya ilə bağlı deyil, onunla bağlıdır ki, bizim klub lazımi balları toplaya bilməyib. O deyir: "Lisenziyadan asılı olsa, biz 4-5 manat tapıb lisenziya ala bilərik". Maraqlıdır, Hafiz Məmmədov lisenziyanın puldan asılı olub-olmadığına işarə vurmaqla nə demək istəyir? Burada işarə lisenziyanın qanuni haqqına, ya qanuni haqdan əlavə "şapka" ödənişinə vurulub? AFFA-nın Bakı klubu ilə münasibətlərində bəzi hamar olmayan detalların olduğuna dair söz-söhbətləri nəzərə alsaq, "4-5 manat pul" söhbətinin AFFA rəhbərliyinə xoş gəlməyəcəyi elə bu başdan bəllidir...
Xatırladaq ki, bütün bu suallar Hafiz Məmmədovun müsahibəsinin tək birinci hissəsindən sonra ortaya çıxıb. Müsahibənin növbəti hissəsində də Hafiz Məmmədov özünə sürprizlər yaradıb. Əgər ilk hissədə öz şəxsi maraqları çərçivəsində taktiki səhvlərə yol verirsə, ikinci hissədə şəçsiyyət cizgiləri zərbə altına qoyulur. Ziya Məmmədov barədə dediklərindən bundan başqa nəticə çıxarmaq olmur. "Ziya Məmmədov mənim... atamdır" kimi qeyri-ciddi və baş ucalığı gətirməyən sözlərdən çıxan digər nəticə və ehtimal isə daha maraqlıdır. Yada salaq ki, bir neçə həftə əvvəl Ziya Məmmədov və oğlu Anar Məmmədovun Hafiz Məmmədovu ofisdən qovduqları və bankrota saldıqları barədə xəbər yayılmışdıı. Bunun yalan olduğunu inandırıcı şəkildə sübut etməmiş Hafiz Məmmədovun Ziya Məmmədovu "ata" adlandırması əvvəlcə deyilənlərin həqiqət olduğunu (?) sübut etməklə yanaşı, həm də nazirə acizanə yalvarış tonu ilə diqqət çəkir.