Qızların Ali Hərbi Məktəbə qəbulunun bərpası təqdir olunur

Tarix: 15.05.2014 / 09:23
Bölmə: Gündəm

"Digər güc strukturları da peşəkar qadın hərbçilərin hazırlanması ilə bağlı lazım olan işləri həyata keçirməlidir"
Müdafiə Nazirliyinin mətbuat xidmətindən bildirildiyinə görə, 2009-cu ildən Müdafiə Nazirliyi tərəfindən Tələbə Qəbulu üzrə Dövlət Komissiyasına qızların Azərbaycan Ali Hərbi Məktəbinə qəbulu üzrə sifariş dayandırılıb. Lakin sifarişin dayandırmasının səbəbləri açıqlanmayıb.
Milli Məclisin Təhlükəsizlik və müdafiə komitəsinin üzvü Zahid Oruc isə bildirib ki, son vaxtlar bununla bağlı xanım abituriyentlər tərəfindən üzv olduğu komitəyə edilən çoxsaylı müraciətlərdən sonra Müdafiə Nazirliyinə məsələ ilə bağlı rəsmi sorğu göndərilib: "Sorğuya cavab olaraq bizə bildirdilər ki, qeyd olunan vaxtdan Ali Hərbi Məktəbə qəbulla bağlı imtahanların aparılması üçün Tələbə Qəbulu üzrə Dövlət Komissiyasına edilən müraciətdə qızların qəbulu nəzərdə tutulmur. Səbəbi isə konkret olaraq belə göstərdilər ki, hərbi məktəbdə təhsil zamanı sosial uyğunsuzluq, müxtəlif ictimai problemlər, psixoloji konfrontasiyalar və digər bu kimi problemlər aşkar olunub ki, bunu nəzərə alan nazirlik qızların hərbi məktəbə qəbulu sifarişini dayandırıb".
Z.Oruc onu da deyib ki, bu hal ali təhsil alma hüququ ilə bağlı ziddiyyətli məqamlara yol açdığı üçün hərbi qanunvericilikdə bununla bağlı yeniliklərin edilməsi gözlənir: "Onsuz da bizim komitə Müdafiə Nazirliyi ilə birgə hərbi qanunvericiliyə aid digər məsələ ilə bağlı müzakirələr aparacaq. Artıq bununla bağlı edilən müraciətlərdən sonra bu məsələni də gündəmə gətirərək hərbi ali təhsillə bağlı hərbi qanunvericiliyə xüsusi müddəaların salınmasına ehtiyac olacaq. İndiyədək hərbi ali məktəblərə qəbul ali təhsil alma ilə bağlı qanunvericiliyin tərkib hissəsi idisə, artıq bunu hərbi qanunvericilikdə də ayrıca nəzərdə tutmaq lazımdır ki, gələcəkdə bu hal təkrar baş verməsin. Biz əminik ki, yeni müdafiə nazirimiz də buna humanist yanaşaraq, bu halın aradan qaldırılmasında Milli Məclislə həmrəy olacaq".
Hərbi ekspert Üzeyir Cəfərov qəzetimizə açıqlamasında
bildirdi ki, Azərbaycan öz müstəqilliyini elan edəndən və Silahlı Qüvvələrini yaradandan sonra bizim ordu sıralarına gələcəyin zabiti olacaq qadın cinsindən olan xeyli şəxs müraciət edir və onlar uzun müddət Heydər Əliyev adına Azərbaycan Ali Hərbi Məktəbində təhsil alıblar: "Çox təəssüflər olsun ki, 2009-cu ildə bu məsələyə heç bir tutarlı əsas göstərilmədən qadağa qoyuldu. İndi şükürlər olsun ki, bizim Milli Məclis artıq bu məhdudiyyətin aradan qaldırılması ilə bağlı hərbi qanunvericiliyə yeniliklər etmək fikrindədir. Hesab edirəm ki, bu 5 il itirilmiş illər kimi sayılmalılır və yaranan boşluğu təcili doldurmalıyıq.
2009-cu ildən Müdafiə Nazirliyi tərəfindən Tələbə Qəbulu üzrə Dövlət Komissiyasına qızların Azərbaycan Ali Hərbi Məktəbinə qəbulu üzrə sifarişin dayandırılma səbəbi açıqlanmasa da, əslində mən bunun nə ilə bağlı olduğunu bilirəm. Buna MN-nin sabiq generallarından birinin tabeliyindəki qadın hərbi qulluqçu ilə bağlı mətbuatda getmiş və çox böyük səs-küylə müşayiət olunmuş hadisə səbəb olmuşdu. Biz o vaxt da bu qərarın yanlış olduğunu bildirmişdik və hesab edirdik ki, bu qərarın qəbulu zamanı dövləti maraqlar daha üstün tutulmalı idi.
Qəbul edilmiş yanlış qərar çoxlu haqlı şikayətlərə və müraciətlərə səbəb olmuşdu. Yəqin ki, belə çoxsaylı müraciətlərdən sonra Milli Məclis tərəfindən Müdafiə Nazirliyinə məsələ ilə bağlı rəsmi sorğu göndərilib. Sevindiricidir ki, MN-in hazırkı rəhbərliyi bu məsələyə müsbət yanaşdığını bildirib. Bu məsələnin həlli Azərbaycan ordusunu da, dünya dövlətlərinin silahlı qüvvələrində olduğu kimi, qadın hərbçilərlə kifayət qədər komplektləşdirmək imkanı verəcək. Həmin xanımlar da əsasən tibb, rabitə, elmi-pedaqoji fəaliyyət, o cümlədən qərargahlarda zabit vəzifələrində xidmət keçə bilər. Belə bir qərar təkcə Müdafiə Nazirliyi ilə yekunlaşmamalıdır. Digər güc strukturları da peşəkar qadın hərbçilərin hazırlanması ilə bağlı lazım olan işləri həyata keçirməlidir. Doğrudur, bu gün MTN və FHN sistemlərində hərəsində bir general olmaqla xanım general-mayorlar-Natəvan Mürvətova və Sevinc Hüseynova xidmət keçir. O cümlədən, DSX-nin Hərbi Həkim Komissiyasının sədri, tibb xidməti polkovniki Zərifə Əliyeva və onlarla digər xanım zabitlərimiz bu gün kişilərlə çiyin-çiyinə xidmət edir. İstənilən halda müsbət addımdır və bu işi tezliklə yoluna qoymaq lazım gələcək".