Hacı İbrahimdən Prezidentin media siyasətinə daha bir dəstək nümunəsi...

Tarix: 14.05.2014 / 08:55
Bölmə: Gündəm

Bu gün Azərbaycanda əsas problem kimi özünü göstərən məsələlərdən biri də "avtoşluq"la bağlıdır. Təkcə son bir ayda baş verən hadisələrə diqqət yetirmək kifayətdir ki, "avtoşluğ"a görə neçə adamın həyatını itirməsinə şahid olasan. Məsələnin digər narahatlıq doğuran tərəfi bəzi hallarda yüksək çinli məmur övladlarının da "avtoşluğ"a həvəslənməsi, sürət yarışı təşkil etmələridir.
Məsələn, bu il martın 15-də Azərbaycan Xəzər Dəniz Gəmiçiliyi QSC-nin sabiq sədr müavini Mübariz Mədətovun oğlu Xalid Mədətov idarə etdiyi "Mercedes-Benz G-55" markalı avtomobillə xalq artisti Ağasəlim Abdullayevin olduğu və oğlunun idarə etdiyi maşını vuraraq 2 nəfərin ölümünə səbəb oldu.
Məmur övladlarının "avtoşluğ"una dair son aylarda müxtəlif saytlarda bir neçə video yayılıb. Belə videoların tapılıb üzə çıxarılmasında isə jurnalistlərin rolu kifayət qədər yüksəkdir. Eyni zamanda, media işçiləri bununla həm də "avtoşlara" qarşı bir ictimai qınağın yaranmasına yol açırlar.
Qeyd edilən məsələdə cəmiyyətdə tanınmış şəxslərin media təmsilçilərinə dəstək vermələri isə, heç şübhəsiz, sözügedən problemin daha tez həllinə gətirib çıxarır. Bu mənada tanınmış şəxslərin göstərilən məsələyə dair fikir bildirmələri zəruri sayılır. Belə zəruri nümunəni meydana qoyan tanınmış şəxslərdən biri də "Xəzər adaları" layihəsinin müəllifi, "Avesta Concern"nin rəhbəri, tanınmış iş adamı Hacı İbrahim İbrahimovdur. İbrahim Nehrəmli kimi də tanınan iş adamı "publika" portalına müsahibəsində məmur övladlarının və qohumlarının bahalı avtomobillərlə paytaxt küçələrində "avtoşluq" etməsinə dair məsələyə çox maraqlı münasibət bildirib: "Mənə elə gəlir ki, bu məsələni çox şişirdirlər. Kimsə özünə maşın alırsa, bunu sürmək üçün alır. Cavan uşaqlardır da. Mən buna cavanlıq kimi baxıram. Ancaq belə hərəkətlərə son qoyulması məsləhətdir. Cənab prezident də deyir ki, ölkədə stabillik və sabitlik qorunmalıdır. Hər hansı məmur və ya onun övladı bahalı avtomobil alıb onu yüksək sürətlə idarə edirsə, o zaman ilk növbədə insanları və özünü düşünməlidir. Çünki bununla o, özünə və başqasına xəsarət yetirə bilər. Avtoşluğa mən də yaxşı baxmıram. Bu məsələ heç zaman iftixaredici hərəkət olmayıb. Bu, insana baş ucalığı gətirən hərəkət deyil. İmkanlı şəxslərin törətdiyi hadisə daha çox və tez gündəmə gətirilir. Ancaq sadə bir adamın törətdiyi hadisə qabardılmır. Məmur övladları üzdə olan insanlardır".
İş adamının vəzifə sahiblərinin övladlarına ünvanladığı məsləhət fonunda media nümaynədələrinə dair səsləndirdiyi fikirlər isə xüsusi maraq doğurur: "Burada qınanılası cəhət var. Həmin uşaqlara demək lazımdır ki, mətbuatla kəllə-kəlləyə gəlməsinlər. Əsas problem də burada yaranır. Jurnalistlə kəllə-kəlləyə gəlmək olmaz. Jurnalist gördüyünü yazırsa, ona qarşı getməməlisən. Əksinə, deməlisən ki, çox sağ ol və gedib dərhal səhvini düzəltməlisən. Jurnalistə hücum çəkmək olmaz. Kimsə jurnalistə qarşı çıxırsa, o adam gec-tez uduzacaq. Mənim əsas fikrim odur ki, Azərbaycanda jurnalistə hörmət etmək, düzgün dialoqa girmək lazımdır. Jurnalist gördüyünü yazmırsa, o jurnalist deyil, gördüyünü yazırsa, ona hörmətlə yanaşmaq lazımdır. Çünki jurnalistlər bu cəmiyyətin aynasıdır, bizim görmədiyimiz səhvləri onlar bizə deyirlər. Mən hər zaman demişəm ki, bu ölkədə jurnalistlərə hörmətlə yanaşılmalıdır.
Jurnalist hər hansı məmurdan yazırsa, o jurnalistə deyilməməlidir ki, niyə məndən yazmısan? Əskinə, gedib səhvini düzəltməlisən. Əgər jurnalist deyirsə ki, sənin oğlun "avtoşluq" edir, o zaman sən də gedib oğluna de ki, ay bala, daha "avtoşluq" etmə, cəmiyyətin gözünə bu cür hərəkətlərlə girmə və sairə. Şəxsən mən jurnalistə güzgü kimi baxıram. Jurnalistlərə daha çox imkan yaradılmalıdır. Mən hər zaman razı olmuşam ki, jurnalist məndən yazsın. Hətta mən vaxtilə qardaşım oğlu ilə bağlı məsələdə də jurnalisti müdafiə etdim. Düz də etdim. Bu gün də jurnalisti müdafiə edirəm. İndi Azərbaycan cəmiyyətində jurnalistə az hörmət olunur. Bundan da artıq hörmət olunmalıdır. Jurnalistlər "dördüncü hakimiyyət"dir. Jurnalistlər ölkənin güzgüsüdür. Jurnalist məndən yazanda sevinirəm. deyirəm ki, nə səhvim var, gedib düzəldirəm onu. Bəlkə də jurnalistlər yazmasa idi, mən daha böyük səhvlər edərdim. "Avtoşluq" məsələsində də jurnalistlə münaqişəyə girilməsəydi, bəlkə də bu məsələ bu qədər böyüməzdi".
Həqiqətən də bəzi məmur övladlarının "avtoşluq" etməsinin ictimailəşməsində medianın xüsusi rolu olub. Burada da əsas məqsəd belə halların ictimai qınaq predmetinə çevrilməsini təmin etməkdən ibarət olub. Hacı İbrahimin də dediyi kimi, "avtoşluq" məsələsində də jurnalistlə münaqişə ictimaiyyətin diqqətini daha çox bu məsələyə yönəltdi. Halbuki, jurnalistlə yersiz münaqişə yaradılmasaydı, vəziyyət tam başqa ola bilərdi. Bu mənada Hacı İbrahim haqlı olaraq vurğulayır ki, jurnalistlər bu cəmiyyətin aynasıdır və ölkədə jurnalistlərə hörmətlə yanaşılmalıdır. Hər halda, elə Hacı İbrahimin özü bu məsələdə yaxşı nümunə meydana qoyur. Yaxşı nümunəni götürmək isə özü də bir böyüklükdür.
Onu da qeyd edək ki, Prezident İlham Əliyev ötən il redaktorlarla görüşündə dövlət məmurlarına media ilə diqqətli davranmağı tövsiyə etmişdi.