DİN-in kollegiyasında Ramil Usubov yeni mərhələyə start verdi

Tarix: 03.04.2014 / 09:14
Bölmə: Gündəm

Daxili İşlər Nazirliyində (DİN) şəhər, rayon polis orqanlarının polis sahə rəislərinin və sahə inspektorlarının cinayətkarlıqla mübarizədə, ictimai qaydanın qorunması və ictimai təhlükəsizliyin təmin edilməsi sahəsində fəaliyyətinin təkmilləşməsinə və görülmüş işlərin müzakirəsinə həsr olunmuş ümumrespublika toplantısı keçirilib.
DİN-in Mətbuat Xidmətindən verilən məlumata görə, tədbiri giriş sözü ilə açan Azərbaycanın daxili işlər naziri, general-polkovnik Ramil Usubov toplantının məqsədi və gündəliyi barədə məlumat verib, son on ildə Azərbaycan Respublikasının Prezidenti cənab İlham Əliyevin rəhbərliyi altında ölkədə həyata keçirilən islahatlar çərçivəsində Daxili İşlər Nazirliyi sistemində də köklü islahatların aparıldığını, xidməti fəaliyyətin beynəlxalq norma və standartlara uyğun qurulması, şəxsi heyətin sosial müdafiəsinin gücləndirilməsi, sosial funksiyaların genişlənməsi, əhalinin bütün qrup və təbəqələri ilə əlaqələrin möhkəmlənməsi, eyni zamanda, cinayətlərin profilaktikası, açılması və istintaqı, bütövlükdə ictimai asayişin təmin edilməsi sahəsində önəmli addımların atıldığını vurğulayıb.
Gündəlikdəki məsələ ilə bağlı Baş İctimai Təhlükəsizlik İdarəsinin rəisi, polis general-mayoru Cavanşir Məmmədov hesabat məruzəsi ilə çıxış edib. O bildirib ki, nazirliyin rəhbərliyi tərəfindən, digər sahələrlə yanaşı, polis sahə inspektorlarının fəaliyyətinin müasir tələblər səviyyəsində qurulmasına da xüsusi diqqət yetirilir. Bu məqsədlə Daxili İşlər Nazirliyi sistemində ictimaiyyətlə, əhalinin bütün qrup və təbəqələri ilə əlaqələrin hərtərəfli möhkəmləndirilməsi, insan hüquq və azadlıqlarının etibarlı təmin edilməsi üçün bir sıra struktur dəyişiklikləri aparılıb. O cümlədən polis sahə rəisləri institutu yaradılıb, onun fəaliyyətinin təkmilləşdirilməsi, cinayətkarlığa qarşı mübarizədə, ictimai asayişin təmin edilməsində rolunun artırılması, polis sahə məntəqələrində ictimai şuraların formalaşdırılması və fəaliyyətinin təşkili istiqamətində məqsədyönlü tədbirlər görülüb.
Toplantıda daxili işlər naziri Ramil Usubov da çıxış edib.
Ölkəmizin dünya birliyinə sürətli inteqrasiyasının, beynəlxalq öhdəliklərinin, eləcə də müasir dövrün çağırış və təhdidlərinin qarşıya çox məsul vəzifələr qoyduğunu qeyd edən daxili işlər naziri sabitliyin qorunub saxlanmasının, insan hüquq və azadlıqlarının etibarlı müdafiəsinin, xidməti fəaliyyətin, o cümlədən sosial funksiyaların icrasının yeni keyfiyyət səviyyəsinə yüksəldilməsinin, vətəndaş məmnunluğunun təmin olunmasının başlıca məqsəd olduğunu diqqətə çatdırıb.
Nazir hazırlanan cinayətlərin qarşısının vaxtında alınması üçün polis əməkdaşlarının, o cümlədən, sahə rəislərinin və inspektorlarının zəruri hüquqi biliklərə, geniş dünyagörüşə, yeni texnologiyalarla iş bacarığına, bütövlükdə yüksək professionallığa malik olmalarının vacibliyini xüsusi vurğulayıb və bu məsələyə hər bir ərazi polis orqanında xüsusi diqqət yetirilməsini tələb edib.
Eyni zamanda onu da diqqətə çatdırıb ki, profilaktik fəaliyyətdə böyük əhəmiyyət kəsb edən maarifləndirmə işi ictimai şuraların üzvləri, vətəndaş cəmiyyəti və kütləvi informasiya vasitələrinin nümayəndələri, yerli icra hakimiyyəti orqanlarının, bələdiyyələrin, təhsil və səhiyyə müəssisələrinin işçiləri, din xadimləri ilə birgə, onların qüvvəsindən, imkanlarından geniş istifadə edilməklə həyata keçirilməlidir.
Xidməti fəaliyyətin təşkilində və nəticələrinin qiymətləndirilməsində ən mühüm vasitələrdən birinin vətəndaşların qəbulunun, ərizə və şikayətlərinə operativ baxılmasının olduğunu qeyd edən nazir bu xüsusda ulu öndər Heydər Əliyevin "Gərək elə işləyəsiniz, özünüzü elə göstərəsiniz, vətəndaşlarla o qədər mülayim, amma cinayətkarlara qarşı o qədər barışmaz olasınız ki, insanlar sizi dövlətin bir nümayəndəsi kimi sevsinlər" tövsiyəsini də xatırladaraq əhalinin inamını, etibarını daim qorumağın möhtərəm Prezidentimizin xalqın xidmətçisi olmaq tələbinin, dövlətin və vətəndaşların qanuni mənafeyinin, şərəfli polis adının daim üstün tutulmasının, qanunçuluğa riayət edilməsində hər bir əməkdaşın vətəndaşlara nümunə olmasının, etik davranış qaydalarına ciddi riayət edilməsinin vacibliyini vurğulayıb.
Səslənən fikirlərin arasında ən diqqət çəkənlərdən biri xidməti fəaliyyətin təşkilində və nəticələrinin qiymətləndirilməsində ən mühüm vasitələrdən birinin vətəndaşların qəbulu, ərizə və şikayətlərinə operativ baxılması ilə bağlı nazirin verdiyi tövsiyələr oldu.
DİN bu istiqamətdə hansı tədbirləri həyata keçirməyi planlaşdırır?
DİN-in Mətbuat Xidmətinin əməkdaşı Ehsan Zahidov "Bakı-Xəbər"ə açıqlamasında bildirdi ki, cənab nazir tərəfindən səsləndirilən bütün fikirlər diqqətlə araşdırılır və irəli gələn bütün tapşırıqlara sözsüz əməl olunur: "DİN-də vətəndaşların qəbulu, ərizə və şikayətlərinə operativ baxılması ilə bağlı vəziyyət çox yaxşıdır. Cənab nazir bu tövsiyələri ilə xidmətin daha da yüksəldilməsini istəyir. Bir daha bildirmək istəyirəm ki, toplantıda bildirilən fikirlərdən o nəticə çıxmamalıdır ki, deyilən istiqamət üzrə DİN-də vəziyyət qənaətbəxş olmayıb. Bu, həssas istiqamət olduğu üçün ciddi nəzarətə ehtiyac var. DİN rəhbərliyi öz strukturlarına onsuz da ciddi nəzarət edir. Vətəndaşların şikayətlərinin operativ araşdırılması ilə bağlı görülən ən effektiv işlərdən biri də 102 xidmətidir. Azərbaycanın istənilən nöqtəsində olan vətəndaş polis bölməsinə getmədən şikayətini edə bilir. 102 xidmətində şikayət qeydiyyata alındıqdan sonra, hadisə yerinə dərhal polis patrulları göndərilir. Bütün bunlar vətəndaşların şikayətinin operativ araşdırılması məqsədilə edilir".
"Polisə Dəstək" İctimai Birliyinin rəhbəri Şəmsəddin Əliyev də Ramil Usubovun vətəndaşlara yönəlik bu addımını yüksək qiymətləndirdiyini dedi: "Digər qurumlarla müqayisədə DİN vətəndaşların şikayətlərinə çox operativ yanaşır.
Elə qurum rəhbəri var ki, mən bir şəhid atası kimi onun qəbuluna 3 ildir düşə bilmirəm. İnsafən demək lazımdır ki, DİN orqanlarında vətəndaşların şikayətinə böyük diqqətlə yanaşırlar. Mən bunu apardığımız monitorinqlərin nəticəsində müəyyən etmişəm.
Cənab nazirin bu məsələnin əhəmiyyətinə yenidən önəm verməsi vətəndaşların konstitusion hüquqlarına edilən hörmətdir".