Qadınlarımızı narkokuryerə çevirən mafiya strukturları fəallaşır...

Qadınların onlar üçün xarakterik olmayan sahələrə cəlb edilməsi mənfi hal olsa da, təəssüf ki, müəyyən hallarda qadınları bu neqativlərdən qoruya bilmirik. Son illər cəmiyyətimizdə tez-tez eşidilən və arzuolunmaz olan narkokuryerlik işində qadınların da adının hallandırılması acı təəssüf doğurur. Hətta narkokuryerlik edən bəzi qadınların həbsi xəbərləri də medianın gündəmində yer alıb.

Dövlət Gömrük Komitəsinin Əməliyyat-İstintaq Baş İdarəsinin rəisinin birinci müavini Güloğlan Muradlı mətbuata deyib ki, bəzi kişilər həyat yoldaşlarını narkokuryerliyə məcbur edirlər. Son illər qadınlardan narkokuryer kimi istifadə edilməsi hallarının artdığını deyən qurum rəsmisinin  sözlərinə görə, ümumiyyətlə, narkotacirlərin 14 faizini qadınlar təşkil edir: “Təəssüf ki, son dövrlər biz öz həyat yoldaşlarını, qadınları narkotacirliyə sövq edən şəxslərlə tez-tez rastlaşırıq. Uşaqların dəqiq sayı bilinməsə də, bəzən olur ki, bu işə azyaşlı uşaqların da cəlb olunması faktı ilə üzləşirik”.

G.Muradlı onu da əlavə edib ki, cari ilin 11 ayı ərzində daxili bədən boşluğunda narkotik vasitə keçirmə faktı ötən ilin eyni dövrü ilə müqayisədə 21 fakt artıb: “Ötən il insanların daxili bədən boşluğunda narkotik vasitə keçirmə faktı 87 olub. Bu il isə bu göstərici 108-ə çatıb”.

• “Bu qadınlar ailəsini qorumaq, yaxud da ərindən qoruxduğu üçün ərin tapşırığını yerinə yetiriblər...”

 “Təmiz Dünya” İctimai Birliyinin sədri Mehriban Zeynalova hesab edir ki, əslində bu problem yeni deyil. Zeynalova baki-xeber.com-a açıqlamasında bildirib ki, Azərbaycanda keçən əsrin 90-cı illərinin əvvəllərindən qadınların narkokuryerliyə məcbur edilməsi prosesi baş verib. M.Zeynalova hesab edir ki, qadınlar bu işə könüllü deyil, ərlərinin təhriki ilə qoşulur, bu isə onların öz ailələrini qorumaq cəhdindən irəli gəlib. Bəzi kişilərin qadınlarından bu şəkildə istifadə edilməsinin səhv addım olduğunu qeyd edən M.Zeynalovanın bildirdiyinə görə, qadınlar narkokuryerliyi könüllü seçmir: “Hələ keçən əsrin 90-cı illərindən bu problem müşahidə edilməyə başlayıb. Biz 1998, 2000-ci illərdə qadınların ərləri tərəfindən narkokuryerliyə məcbur edilməsi haqqında danışırdıq, amma təəssüf ki, buna qəribə baxırdılar. Amma bu gün artıq bu problem özünü daha qabarıq şəkildə göstərir. Qadınların ərləri tərəfindən narkokuryerliyə cəlb edilməsi halları daha çox rayon yerlərində müşahidə edilib. Bu qadınlar ailəsini qorumaq, yaxud da ərindən qoruxduğu üçün ərin tapşırığını yerinə yetiriblər və narokuryerlik edirlər. İnanmıram ki, bu qadınların çoxu bunu könüllü edib. Əlbəttə, heç bir qadın istəməz ki, başqasının balası narkotikdən istifadə etsin. Bilirsiz, o vaxtlar qadınlar xırda cinayətlərə görə, çox da həbs edilmirdi. Bu da mentalitetimizdən irəli gəlirdi ki, qadın həbsə düşməsin. Bundan da bəzi kişilər sui-istifadə edərək yoldaşını bu işə cəlb edirdi. Bu gün isə qanunlar dəyişib, buna baxmayaraq yenə də həyat yoldaşını narkokuryerliyə məcbur edən kişilər, ərlər var”.

M.Zeynalova hesab edir ki, o qadınlar narkokuryerlikdən elə də böyük gəlir əldə etmirlər, amma ərlərinin tapşırığı olduğu üçün onu yerinə yetirirlər. Bu halın qarşısının alınması üçün maarifləndirici tədbirlərə ehtiyac olduğunu deyən M.Zeynalova hesab edir ki, qadınlar özü də övladlarının xatirinə bu addımı atmamalıdırlar. “Bu əslində qadının kişidən nə qədər asılı olmağının göstəricisidir. Qadınlar narkokuryerlik edirsə deyim ki, onların bu işdən böyük qazanc götürmək, dillerə çevrilmək istəyi olmur, onun bu hərəkəti ərinin günahını öz üzərinə götürüb onu qorumağa xidmət edir. Yaxud da əri hesab edir ki, sərhəddən keçərkən qadın olduğu üçün arvadının üzərini yoxlamazlar, ona görə ona narkotik verir. Narkokuryerə çevrilən qadınların çoxunun bu işə könüllü razılığı olmur, onlar bu işi ərlərinin təsiri və təhriki ilə edirlər. Onları ərləri bu işə məcbur edir. Bilirsiz ki, çox az qadın tapılar ki, başqasının övladının narkotiklə zəhərlənməsini qəbul etsin. Demirəm, indi bir-iki belə qadın ola bilər ki, o özü də istifadəçidir, daşıyıcıdır, bu da var, amma bunların sayı çox ola bilməz” - deyə M.Zeynalova qeyd etdi.

İradə SARIYEVA