RİYAKARLAR... - Xeyrəddin QOCA yazır

Elza Seyidcahanın AYB-yə üzv olması nə böyük hadisə olub ki, "aləm" dəyib bir-birinə? Elza xanım bəstəkardır, şeirlər də yazır, bir kitabı da işıq üzü görüb. O, niyə AYB-nin üzvü ola bilməz?
Mən bu barədə yazmayacaqdım, redaksiyanızın xahişi ilə yazıram. Yazmamışdan əvvəl, məndən əvvəlki, fikirlərlə tanış oldum. Çoxlu riyakarlıqlar və məntiqsizliklərlə qarşılaşdım.
Tural Turan adlı tanımadığım biri yazır: " Fikrimcə, dünya ədəbiyyatı adına çox böyük hadisədir. Elza xanıma bundan sonrakı dərin yaradıcılıq axtarışlarında uğurlar arzulayıram!.. Məndə olan məlumata görə, (yekə-yekə danışanlar belə ifadələr işlədirlər! A kişi, sənə o məlumatı kim verib?) Elza xanım Seyidcahan qarşısına məqsəd qoyub ki, tezliklə Buker, daha sonra Nobel mükafatını ölkəmizə gətirəcək. Böyük sənətkara dəstəyimizi əsirgəməyəcəyik...(Sənin nə dəstəyin ola bilər ki?) Mən Elza xanımdan xahiş edirəm ki, musiqi sahəsində də yeniliklər ard-arda ( Azərbaycan dilində belə söz yoxdur!) sıralanmış və heyvanlar üçün təşkil etdiyi konsert proqramları ilə bütün dünyada musiqinin necə təmsil etməsindən danışılır..." ( Bu necə cümlədir?)
Tural Turan, sözümün əvvəlində yazdığım ki, mən səni tanımıram, Elza Seyidcahanı isə tanıyıram! Mən Elza xanımın bəzi şeirlərini tənqid etməyə hazırlaşsam da, sizin kimilərinin belə boş hədyanlarına görə, onu müdafiəyə keçdim! "Tarixi-Nadiri yarısına qədər oxusam da", sənin nə demək istədiyini başa düşmədim. Camaatı ələ salırsan?
Sevinc Elsevəri də tanımıram. Görün, o, nə deyir: "Elzanı çox istəyirəm. Ona hər şey olar". (Hər şey?). Şeirlərinə gəlincə, insanların üzünü güldürür"...
Xanım, şeirlər insanları güldürmək üçün yazılır?
Sonra yazır: "Bu xanım maraq doğurur. Hər zaman maraqlıdır"...
Bu nə səfsəfədir? Onu maraq doğurduğu üçün Yazıçılar Birliyinə üzv ediblər?
Baba Vəziroğlunu isə 40 ildən çoxdur tanıyıram. Yazdığına fikir verin: "Sabirin şeirlərini oxuyub güldüyünüz kimi, Elza xanımın da şeirlərini oxuyun, gülün."
Ay Baba, sən Sabiri niyə təhqir edirsən? Sabir şeirlərini gülmək üçün yazırdı? Ayıb deyil?
Yutubda "Mirinin dibçəyi" verilişi lap xal vurdu! Aparıcı Çingizin Elza Seyidcahana verdiyi suallar adamı hövsələdən çıxarır!
"Siz gələcəkdə Yazıçılar Birliyinin sədri ola bilərsinizmi?". "Ermənilər sizə xalq artisti fəxri adını versələr, götürərdinizmi?" "Azərbaycanın xalq artisti olacaqsınız?"
Bu insanlar xəstədirlər-nədirlər? A bala, bir ağzınız deyəni qulağınız eşitsin də!
Ümumiyyətlə, Elza xanımla müsahibə aparanların heç birinin səviyyəsi onun qədər deyil!
İndi keçək Elza xanımın "yadda qalan", "dillər əzbəri" olan misralarına. "Tikim sizin ağzınızı! "Bir əlim qabağımda, bir əlim dalımda"! "Sənə verdi, mənə verdi, ona verdi"! Burada bir şeyi başa düşmək çətindir, kim kimə nə verdi? Nə üçün verdi?
Elza xanım "Mirinin dibçəyi"ndə demişdir: "Bizim xalq çox erotik xalqdır!". "55 yaşım var, getdikcə uşaqlaşıram", "Uşaqlıqda pavidla qutularında nağara çalmaqdan əllərim yara olmuşdu". "Şeirləri özüm yazmıram, mənə yazdıran var"...
Əstəğfürullah!
Xeyrəddin QOCA