Məlum olduğu kimi, Səhiyyə Nazirliyinin sifarişi əsasında Tarif Şurası dərman vasitələrinin qiymətlərinə yenidən baxacaq. Həmçinin Milli Məclisin növbədənkənar sessiyasının iclasında “Dərman vasitələri haqqında” qanuna dəyişiklik layihəsi (ikinci oxunuş) müzakirə olunub.
Dəyişikliyə əsasən, Azərbaycanda dövlət qeydiyyatına alınan dərmanlar apteklərdə yenidən fərqli qiymətlərə satıla bilər. Ekspertlər hesab edir ki, bu dəyişiklik dərmanların satış qiymətinə təsir edəcək.
İqtisadçı Kamran Məmmədli "Bakı-Xəbər"ə açıqlamasında qeyd etdi ki, dərman vasitələri ilə bağlı çox ciddi problemlər var. Qiymətlər çox yüksəkdir. İnsanlar özlərinə dərman ala bilmir: "O da məlumdur bu gün ölkədə dərman qıtlığı yaşanır. Ümumiyyətlə, dərman qıtlığının aradan qaldırılması üçün addımlar atılmalıdır".
Ekspertin sözlərinə görə, yaxın müddət ərzində dərmanların satış qiymətinin yenidən dəyişilməsi gözlənilir. Tarif Şurası qiyməti artıracaqsa, əhali narazı qalacaq, azaldacaqsa, vətəndaşlarımız üçün faydalıdır: "Danılmaz həqiqətdir ki, Azərbaycanda satılan dərman preparatarının qiyməti xarici ölkələrlə, qonşu Türkiyə, Rusiya və İranla müqayisədə dəfələrlə bahadır. Türkiyədə 10 manata satılan dərman preparatı Azərbaycanda 40-50 manatdır. İnsanlar bu səbəbdən məcbur olub bəzi dərman preparatlarını Türkiyədən gələn yaxınlarına aldırırlar. Qiymətlərdə belə yüksək fərqin yaranması isə xəstə insanların dərmanlara əlçatanlığını azaldır. Həkim xəstəyə dərman yazır, qiyməti baha olduğundan xəstə həmin dərmanı ala bilmir. Belə olan halda pasiyentin səhhəti daha da pisləşir. Üstəlik qiymətinin baha və ya ucuz olmasından asılı olmayaraq, apteklərdə satılan dərmanlar keyfiyyətcə aşağıdır".
İqtisadçı onu da əlavə etdi ki, Azərbaycanda təxminən 14-15 min adda dərman vasitələrinin qiyməti Tarif Şurası tərəfindən tənzimlənir və pərakəndə satış qiyməti eyni olur. Ümumiyyətlə bu sahəyə nəzarət daha da artırılmalıdır: "Dərmanların daxildə istehsal olunmaması qiymət siyasətinə təsir edir. Daxildə dərman istehsal olunarsa, buna şərait yaradılarsa o zaman qiymət elə də yüksək olmaz. İdxaldan asılılıq istər-istəməz qiymətə təsir edir".
Günel CƏLİLOVA
