Məlum olduğu kimi, orta məktəb müəllimləri üçün sertifikasiya prosesi keçirilib. İbtidai siniflər üzrə 30 min müəllim sertifikatlaşdırma prosesinə cəlb edilib. 2023-cü il üzrə ibtidai sinif müəllimləri üçün statistik nəticələrə görə, yüksək nəticə göstərənlər 10 faiz, qənaətbəxş hesab edilən 53 faiz, təkmilləşdirilməyə ehtiyacı olanlar isə 30 faiz təşkil edib.
Elm və təhsil naziri Emin Əmrullayev “Sertifikatlaşdırma: Peşəkar müəllim-keyfiyyətli təhsil” tədbirində çıxış edən zaman bildirib ki, sertifikasiya prosesində iştirak edən 30 min ibtidai sinif müəlliminin 0,7 faizi, yəni 223 nəfəri 0-9 bal toplayıb. Nazir qeyd edib ki, müəllimlərdən 10 faizi isə 10-19 bal yığıb: "51 bal həddini keçən müəllimlərin faiz göstəricisi isə 17 faiz təşkil edib".
Maraqlıdır, ibtidai sinif müəllimləri niyə aşağı, zəif nəticə göstərib?
"İbtidai sinif müəllimləri üçün keçirilən sertifikatisiya prosesində 0-9 arası bal toplayan müəllimlər olub, həmin şəxslərin sinifdə dərs deməsi doğru deyil"
Təhsil eksperti Kamran Əsədov "Bakı-Xəbər"ə açıqlamasında qeyd etdi ki, sertifikasiya çox vacib bir prosesdir: "Azərbaycan təhsil sistemində ciddi uğurların başlanğıcı kimi də bunu dəyərləndirmək olar. Çünki müəllimlər buna qədər hər hansı bir qiymətləndirməyə cəlb olunmamışdı. Sertifikatisiya prosesi göstərdi ki, müəlllimlər uzun müddət idi öz üzərlərində işləmirdilər. Məhz bunun nəticəsidir ki, 9 və 11- ci sinif məzunlarının nəticəsi aşağı olur. Şagirdlər çıxış yolu üçün repetitorlara müraciət edir. Bu kimi amillər onu deməyə əsas verir ki, Azərbaycanda müəllimlərin öz üzərində işləməsi üçün qiymətləndirməyə ehtiyac var idi. Çox təəssüflər olsun ki, əvvəllər qeyri-qanuni yollarla vəzifəyə, müəllim kimi işə düzələn şəxslər olub. Onlar saxta diplomla işə düzəldiyi üçün bilik və bacarıqları zəif olub".
Ekspert xüsusi olaraq vurğuladı ki, sertifikasiya prosesi olduqca şəffaf keçirilir. İbtidai sinif müəllimləri üçün keçirilən sertifikatisiya prosesində 0-9 bal arası bal toplayan müəllimlər olub. Həmin şəxslərin sinifdə dərs deməsi doğru deyil: "Hesab edirəm ki, müəllimlərin öz üzərində işləməsi üçün mütamadi olaraq bu tip imtahanlar keçirilməlidir. Belə olarsa onlar öz üzərində məsuliyyət hiss edəcək və bilik, bacarıqları lazımi səviyyəyə çatacaq. Danılmaz faktdır ki, bilik və bacarıqları yüksək olan müəllim daha keyfiyyətli dərs deyəcək, eyni zamanda yaxşı əmək haqqı alacaq. Məlumdur ki, 51 baldan yüksək nəticə göstərən pedaqoqların əmək haqqısına 35 faiz əlavə olacaq. Bu isə olduqda ciddi rəqəmdir".
K.Əsədov hesab edir ki, bilik və bacarıqları aşağı olan müəllimlər sistemden uzaqlaşdırılmalı, onların yerinə daha savadlı kadrlar cəlb olunmalıdır.
Günel CƏLİLOVA
