Son günlər sosial mediada ən çox əməkdar artist, bəstəkar Elza Seyidcahanın Azərbaycan Yazıçılar Birliyinə üzv qəbul edilməsi və türkiyəli müğənni Ebru Gündeşin Şəmkirdə toya gəlməsi müzakirə olunur. Əksər elektron xəbər portallarında və bəzi qəzetlərdə bu mövzular müxtəlif rakursdan işlənilir.
Kiminsə Yazıçılar Birliyinə üzv olması və ya hansısa sənətçinin kiminsə şəxsi vəsaiti hesabına məclisində iştirak etməsi elə də gündəmi sirkələyəcək aktual mövzu deyil. Hazırda müzakirə olunmalı ciddi, aktuallığını qoruyan saysız mövzular olsa da, bəzi xəbər portalları nədənsə Elza Seyidcahanın cızma-qaralarını və türkiyəli müğənninin Şəmkirə toyda iştirak etməsini qabardır. Bu isə həm etik, həm də beynəlxalq media prinsiplərinə ziddir.
Azər Həsrət: "Təəssüf ki, anormal müzakirələrin ayaq açıb yeridiyi cəmiyyətdə yaşayırıq, bu kimi mövzuların müzakirəsi dayandırılmalıdır"
Media eksperti Azər Həsrət "Bakı-Xəbər"ə açıqlamasında qeyd etdi ki, ölkə gündəmində daha ciddi məsələlər var və media həmin məsələlərlə məşğul olsa daha yaxşı olar: "Təəssüf ki, biz fərqli mənzərə ilə qarşılaşırıq. Bəzi media orqanları məqsədli şəkildə son günlər əməkdar artist, bəstəkar Elza Seyidcahanın Azərbaycan Yazıçılar Birliyinə (AYB) üzv qəbul edilməsini və məşhur türkiyəli müğənni Ebru Gündeşin Şəmkirin Şiştəpə kəndində toyda iştirak etməsini müzakirə edir. Ən acınacaqlısı isə odur ki, müzakirələrə qeyri-peşəkar şəkildə aparılır. Danılmaz faktdır ki, bir şəxs AYB-yə üzv olur. Onu da nəzərə almaq lazımdır ki, Azərbaycan Yazıçılar Birliyi ictimai təşkilatdır, özünün nizamnaməsi var. Nizamnamə tələblərinə cavab verən istənilən şəxs Birliyə üzv ola bilər. O şəxsin yaradıcılığı bizim xoşumuza gələ də bilər, gəlməyə də. Qərarı verən Yazıçılar Birliyinin özüdür. Bizim nə ixtiyarımız var ki, onu müzakirə edək? Ümumiyyətlə, bu məsələnin bu qədər qabardılması belə düzgün deyil. Şəmkirdə keçirilən toy məclisinə türkiyəli müğənninin çağırılmasının müzakirə olunması da qeyri-etikdir. Bir şəxs özünün xoş günündə xarici ölkədən tanınmış müğənni dəvət edirsə, bunun cəmiyyətə heç bir isti-soyuğu yoxdur. Adam şəxsi vəsaiti hesabına müğənni gətizdirib şadyanalıq edir. Buna qarışmaq, müzakirə etmək düzgün deyil. Dövlət vəsaiti deyil ki, ictimaiyyət bunu müzakirə edir? Toy sahibi vəzifə sahibi, siyasi lider də deyil ona suallar ünvanlansın ki, sən bu pulu hardan almısan. Təəssüf ki, anormal müzakirələrin ayaq açıb yeridiyi cəmiyyətdə yaşayırıq. Bu kimi mövzuların müzakirəsi dayandırılmalıdır. Media belə mövzulara toxunmamalıdır. Ancaq bəzi media orqanlarının bu tip mövzulara yanaşması onların qeyri-peşəkar olmasından xəbər verir. Özünə hörmət edən, etik qaydalara əməl edən media ictimaiyyət, dövlət üçün maraqlı mövzulara toxunmalıdır".
Vüsal Məmmədov: "Bizim jurnalistlərin problemi ondadır ki, özlərinin bloger "mən"i ilə jurnalist "mən"lərinin arasında dəqiq sərhədi çəkə bilmirlər"
Azvision.az saytının baş redaktoru Vüsal Məmmədov "Bakı-Xəbər"ə açıqlamasında bunları dedi: "Bir gün çukça görür ki, maral özünü sıldırımdan atdı. Ardınca ikinci maral da atıldı. Sonra üçüncü, dördüncü, beşinci... Çukça fikirli-fikirli özündən soruşur: "O "trend" dedikləri şey budur?!"
Trend başlayanda hamı ona qoşulmağa çalışır. Bu, sürü instinktindən doğan xüsusiyyətdir. Jurnalistlər də əsas təlimatı unudaraq, instinktin diqtəsi ilə hərəkət edirlər. Təlimat nədir?
Jurnalist materialı yazanda iki sualın cavabını əvvəlcədən bilməlidir:
1) Niyə yazıram?
2) Kimin üçün yazıram?
Bloger sadəcə kefi istədiyinə görə nəyisə yaza bilər. Sadəcə reaksiya gələcək deyə yaza bilər. Ona olar. Jurnalistə olmaz. Bizim jurnalistlərin problemi ondadır ki, özlərinin bloger "mən"i ilə jurnalist "mən"lərinin arasında dəqiq sərhədi çəkə bilmirlər".
Günel CƏLİLOVA
