O əsl müəllim idi.
Gənc nəslə yalnız elm, bilik öyrətməklə kifayətlənmir, onlara insanlıq, ləyaqət, saflıq dərsi də öyrədirdi. Sadəliyi, səmimiliyi, daxili zənginliyi, xanım-xatınlığı ilə insanı qəlbən sevdirən Zemfira müəllimə!
Zemfira Bəhlul qızı Səmədova 19 oktyabr 1946-cı ildə Quba rayonunda ziyalı ailəsində anadan olmuşdur. Orta məktəbi də elə rayonda bitirmişdir. Elə həmin ili Bakı Dövlət Universitetinin filologiya fakültəsinə daxil olmuş, elm ocağını qırmızı diplomla başa vurmuşdu.
1972-ci ildən Yasamal rayonundakı 158 saylı tam orta məktəbdə dil-ədəbiyyat müəllimi, direktor müavini, direktor vəzifəsində işləmişdir.
Zemfira müəllimə mənim üçün, ilk növbədə Azərbaycanın mötəbər ziyalısı, işıqlı insan idi. Onunla söhbətlərimizin hər dəqiqəsi maraqlı idi. Elə insanlar var ki, hər gün görüşməsən də, onları həmişə öz ətrafında hiss edirsən. Onların mənəvi mövcudluğunu həmişə hiss edirsən.
Məhz bu səbəbdəndir ki, Zemfira xanım haqqında keçmiş zamanda danışmaq olmur.
İlk görüşümüz Zemfira müəllimin o vaxtlar direktor olduğu Yasamal rayonundakı 158 saylı tam orta məktəbdə oldu. Yazıçı-dramaturq Cəfər Cabbarlıya həsr olunan bir tədbirə məni də dəvət etmişdi.
Çox maraqlı, yaddaqalan bir görüş oldu. Görüş bitəndən sonra bizi çay süfrəsinə dəvət etdi.
Mən onunla belə tanış olmuşdum. O görüşdən sonra Zemfira xanım məni rəhbərlik etdiyi məktəbə tez-tez dəvət edirdi. O, çox mehriban, səmimi insan idi.
Zemfira xanım, sözün əsl mənasında müəllim idi. Onun davranışı, insanlara münasibəti, səliqəsi vüqarlı qaməti, savadı bir örnək idi.
Zemfira xanım əsl azərbaycanlı idi. Zemfira Bəhlul qızı Azərbaycan Respublikasının Prezidentinin Sərəncamı ilə 2005-ci ildə "Əməkdar müəllim" fəxri adına layiq görülmüşdür.
Vətəninə, torpağına, elinə-obasına, bu torpağın insanlarına sevgisilə tanınırdı. Zemfira müəllimə həm də çox sadə adam idi. Böyüklə böyük, kiçiklə kiçik olurdu. Çox təəssüflər olsun ki, torpaqlarımızın düşmən tapdağından azad olunması gününü görə bilmədi.
Mənim üçün Zemfira xanım peşəsini ürəkdən sevən, müəllimlik ləqayətini həmişə qoruyub saxlayan, qayğıkeş, dostluğa sadiq, heç kimdən köməyini əsirgəməyən, geniş dünyagörüşlü bir şəxsiyyət kimi yadda qaldı. Heyif ki, böyük insani keyfiyyətləri özündə cəmləşdirən Zemfira Səmədova qadir Allahın əmri ilə 4 sentyabr 2018-ci ildə bizi tənha qoyub haqq dünyasına üz tutdu. Respublikanın "Əməkdar müəllimi", gözəl insan, mehriban ana, qayğıkeş nənə Zemfira xanımın əziz xatirəsi daim qəlbimizdə yaşayacaqdır.
Elşad Dağlı "Cabir Novruz" Mədəniyyət Fondu mətbuat xidmətinin rəhbəri, AYB və AJB-nin üzvü
