Nazirlər Kabinetinin iyunun 25-də təsdiq etdiyi “Nəqliyyat vasitələrinin parklanmasına görə ödənişin məbləği”nin təsdiq edilməsi haqqında qərarına görə, paytaxt Bakı, Sumqayıt və Gəncə şəhərlərində qiymətlər müəyyən edilib. Yeni qaydalara əsasən, Bakı şəhəri üzrə parklanma üçün mərkəz zonada ödənişin məbləği 1 manat olacaq. 1-ci zonada bu məbləğ 70 qəpik, 2-ci zonada 40 qəpik, 3-cü zonada isə 30 qəpik olacaq.
Bakı şəhəri üzrə 4-cü zonada nəqliyyat vasitələrinin parklanmasına görə ödəniş tələb olunmayacaq. Bu zona digər zonaların sərhədləri ilə əhatə olunmayan əraziləri əhatə edir.
Onu da bildirək ki, həftənin bazar günləri dövlətə məxsus parklanma yerlərində avtomobillərin park edilməsi ödənişsiz olacaq.
Parklanma ilə bağlı qəbul edilən qərar cəmiyyət tərəfindən birmənalı qarşılanmayıb və narazılığa səbəb olub.
Eldəniz Cəfərov: “Park yerləri gözəgörünməz şəxslər tərəfindən zəbt edilib və qanunsuz olaraq çalışdırılır, bu da təbii ki, Azərbaycan iqtisadiyyatının inkişafına böyük ziyan vurur”
Nəqliyyat eksperti Eldəniz Cəfərov “Bakı-Xəbər”ə açıqlamasında qeyd etdi ki, müvafiq qurumların Nazirlər Kabinetinə təqdim etdiyi tariflər qəbul olunan qiymətlərdən təxminən iki dəfə baha olub: “Görünür, hökumət Prezident İlham Əliyevin sosialyönümlü siyasətini nəzərə alaraq parklanma qiymətlərini o qədər də yüksək təyin etməyib. Tariflərin zonalara bölünməsi də ədalətlidir. Burada iki məqsəd əsas götürülüb. Birincisi, şəhərin mərkəzi hissələrində avtomobil sıxlığının qarşısının alınması prioritet təşkil edir. İkincisi, parklanmaya biznesin cəlb edilməsidir. Yəni biznes maraqlı olmalıdır ki, parklanma yerlərinin təşkili ilə bağlı işlər görə bilsin. Biznesmenlər görsələr ki, parklanmadan gələn gəlir o qədər də sərfəli deyil, yaxud çəkilən xərc uzun illərdən sonra geri qayıdacaq, bu zaman heç bir sahibkar həmin işə maraq göstərməyəcək. Bu səbəblərdən də parklanma tarifləri zonalara bölünüb. İl ərzində təxminən 50 milyon manat dövlət büdcəsinə daxil olacaq. Danılmaz faktdır ki, bu gün park yerləri gözəgörünməz şəxslər tərəfindən zəbt edilib və insanlar qanunsuz olaraq çalışdırılır. Bu da təbii ki, Azərbaycan iqtisadiyyatının inkişafına böyük ziyan vurur. Bu gün parklanma nəzarətçiləri qeyri-leqal çalışırlar. Baxmayaraq ki, onların çoxu aztəminatlı və yaşlı insanlardır, yaxın gələcəkdə çalışdıqlarının qarşılığı olaraq onların təqaüdü, sosial təminatı həyata keçirilməyəcək. Amma parklanma yerləri leqallaşdırılsa və dövlətin nəzarətində olsa parklanma nəzarətçiləri işdən qovulmaq əvəzinə leqal çalışacaqlar və sosial təminatları da həll ediləcək”.
Ekspertin sözlərinə görə, parklanmanın ilk 15 dəqiqəsi pulsuzdur: “Bu istər özəl, istərsə də dövlət parklamalarına aiddir. Parklanma sahibləri ilk 15 dəqiqəyə görə pul tələb etsələr, onlar haqqında qanuna müvafiq qaydada tədbir görüləcək. Pulsuz parklanma yerləri əsasən şəhərətrafı yerlərdə təşkil olunacaq. Bakı şəhərində vaxtilə dövlətin balansında xeyli sayda parklanma yerləri olub. Ümid edirəm ki, bu qərardan sonra dövlət öz balansında olan və kimlərsə tərəfindən zəbt edilən həmin parklanma yerlərini geri qaytaracaq”.
Elxan Əliyev: “Gündəlik şəhərdə işləyənlər parklamaya görə ayda azı 200 manat pul ödəməlidir”
Sosial sahə üzrə ekspert Elxan Əliyev isə hesab edir ki, yeni qaydalar orta təbəqə insanlar üçün uyğun deyil: “Bakının mərkəzində 1 saata görə 1 manatdan başlayaraq, mərkəzdən kənar zonalara keçdikcə, 70, 40, 30 qəpik müəyyənləşdirilib. Bu o deməkdir ki, dayanacaqlarda indi hər saata görə bir manat ödənməli olacaq. Zənnimcə, bu məbləğ düzgün deyil. Gündəlik şəhərdə işləyənlər şəxslər ayda azı 200 manat parklamaya görə pul ödəməlidir. Insaların tək dərdi parklanma deyil ki? Bu məsələ ilə bağlı yenidən müzakirələr aparılıb, hər kəsin büdcəsinə uyğun rəqəm çıxarılmalıdır”.
Günel CƏLİLOVA
