Azərbaycanın Qida Təhlükəsizliyi Agentliyinin tələbi ilə “Rosselxoznadzor” “İnduşkin Dvor” MMC (Rostov vilayəti) və Blaqodarnenski Ət və Quşçuluq Kombinatının (Stavropol diyarı) filialı olan “Stavropol Broyler” MMC-nin istehsal etdiyi quş əti məhsullarının sertifikatlaşdırılmasını dayandırır.
Bu barədə "Rosselxoznadzor"un saytı məlumat yayıb. Buna səbəb Rusiyadan idxal olunan toyuqlarda təhlükəli salmonellez xəstəliyinin aşkarlanmasıdır.
Qeyd edilir ki, müəssisələrin məhsullarında (dondurulmuş hinduşka çubuqları və toyuq cəmdəklərinin dondurulmuş hissələri) salmonellez aşkar edilib.
Bildirilir ki, 2023-cü ilin əvvəlində “Rosselxoznadzor”, bu şirkətlərin məhsullarında salmonellez aşkarlanması ilə əlaqədar olaraq gücləndirilmiş laboratoriya nəzarəti rejimini tətbiq edib.
Təqdim olunan faktlara əsasən, “Rosselxoznadzor” araşdırma aparacaq, həmçinin tədbirlər görəcək.
"Şübhəm yoxdur ki, bu barədə AQTA beynəlxalq qurumlara da məlumat verəcək"
Məsələyə şərh verən Azad İstehlakçılar Birliyinin sədri Eyyub Hüseynov "Bakı-Xəbər"ə şərhində bildirdi ki, qida təhlükəsizliyinin təmin edilməsi, vətəndaşlarımızın sağlam qidalanması çox vacibdir. "Salmonellez toyuq ətinin təhlükəli bakteriyalarla çirklənməsidir. Bu ən çox toyuq, hinduşka ətində, yimurtalarda olur. Çox yaxşı haldır ki, Azərbaycan Qida Təhlükəsizliyi Agentliyi (AQTA) bunun qarşısını almaq üçün iş görür. Şübhəm yoxdur ki, bu barədə AQTA beynəlxalq qurumlara da məlumat verəcək. Yəni bu işləri tənzimləyən beynəlxalq qurumlar da mövcuddur. Salmonellez bakteriyası insanlarda ciddi mədə-bağırsaq xəstəlikləri və digər xəstəliklər əmələ gətirə bilər. Azərbaycan vətəndaşlarını xilas edən Azərbaycanın mətbəxidir. Azərbaycan mətbəxində yemək yaxşı bişirilir. Temperatur təzyinə məruz qalır. Əgər Azərbaycan mətbəxi Avropa mətbəxi kimi olsa, yəqin ki, çoxlu sayda insan heyvan xəstəliklərindən dünyasını dəyişərdi, yaxud sağalmaz xəstəliklərə tutulardı"- deyə E.Hüseynov vurğuladı.
E.Hüseynovun sözlərinə görə, AQTA çox düzgün edib o malların sertifikatını dayandırlb. O hesab edir ki, gərək malların geriçağırılma mexanizmi də olsun. "Əminəm ki, satışda belə mallar varsa AQTA onların geri çağırılma işini də görür. Ekspertizanın aparılması çox yaxşı haldır. Əhaliyə çağırış edirəm ki, məhsul alanda mal etiketinə diqqətlə baxsınlar. Amma əhali bunu bilməyə də bilər. Çünki bakteriyalarla çirklənmiş mal müəyyən partiya mala aid olur. Yəni demək olmaz ki, o müəssisənin buraxdığı malın hamısı salmonellez bakteriyasına məruz qalıb. Ona görə də çox yaxşı olardı ki, AQTA pariya malı da göstərsin ki, bu hansı pariya maldan aşkarlanıb. Belə güman edirəm, o mal Azərbaycan sərhədindən içəriyə buraxılmayıb"- deyə E.Hüseynov qeyd etdi.
Leyla QARAXANLI
