Son illər paytaxt Bakı dünyanın ən gözoxşayan, müasir şəhərlərdən birinə çevrilsə də, bu inkişaf özü ilə xeyli həlli vacib problem də gətirməkdədir.
Paytaxt və paytaxtətrafı qəsəbələrdə sürətli məskunlaşmanın və əhali sıxlığının kəskin artması, turist axınının ilbəil güclənməsi təkcə yüksək təhlükəsizlik tədbirlərinin görülməsini zəruri etmir, həm də hökumətdən yeni xidmət və yaşayış sahələrinin tikilib istifadəyə verilməsini, əlverişli yol-nəqliyyat infrastrukturunun yaradılmasını, sərbəst və rahat hərəkət sistemlərinin, mexanizmlərinin qurulmasını tələb edir.
Təkcə son 10 il ərzində saysız körpülərin, tunellərin, yol qovşaqlarının və yolötürücülərin tikilib istifadəyə verilməsinə, ayrıca genişzolaqlı yeni yolların salınmasına, eləcə də hərəkətin müntəzəm qaydada polis gücünə tənzimlənməsi hallarına baxmayaraq, paytaxtın tıxac problemi hələlik tam həll oluna bilmir.
Uzun-uzadı tıxacın yaşandığı ərazilərdən biri də “Dərnəgül” bazarı adlanan yerdir. Məlumdur ki, Bakının ən böyük tikinti materialları satılan bazarında tikinti materialları az qalsın yolun ortasında satılır. Üstəlik, həmin ərazidən keçən avtomobil yolu da olduqca ensizdir. Bu isə, xüsusilə pik saatlarında ərazidə hərəkəti daha da çətinləşdirir.
Bu səbəbdən də son günlər “Dərnəgül” bazarının köçürülməsi müzakirə olunur. Mütəxəssislər adıçəkilən bazarın yol kənarı olmayan yerdə olmasını vacib sayır.
Maraqlıdır, “Dərnəgül” bazarının köçürülməsi tıxac probleminə təsir edəcəkmi?
“Dərnəgül” bazarı köçürülsə belə, həmin prospektdə yaranan tıxacları aradan qaldırmaq mümkün olmayacaq”
Nəqliyyat eksperti Eldəniz Cəfərov bildirdi ki, Ziya Bünyadov prospekti istiqamətində tunellər tələb olunan standartlara cavab vermir: “Yollar gah daralır, gah da genişlənir. “Dərnəgül” bazarı köçürülsə belə, həmin prospektdə yaranan tıxacları aradan qaldırmaq mümkün olmayacaq. Sıxlığın səbəbləri hər kəsə məlumdur, bu ancaq yolun özü ilə əlaqədardır. Ziya Bünyadov prospektində tıxac yol ötürücüləri, körpülər, tunellər standartlara uyğun tikilməyən ərazilərdə yaranır. “Dərnəgül” bazarının Ziya Bünyadov prospektinə hər hansı bir aidiyyəti yoxdur. Prospektə baxanda biz görürük ki, axın “20 Yanvar” metrostansiyası ərazisindən “Koroğlu” metrostansiyasi istiqamətinə doğrudur. Problem də o ərazilərdən qaynaqlanır”.
Günel CƏLİLOVA
