2023-cü ilin “Heydər Əliyev İli” elan edilməsi ilə əlaqədar respublikamızın hər yerində olduğu kimi, cənub mirvarisi Lənkəranda da həyata keçirilən silsilə tədbirlər davamı edir. Rayon prokurorluğunun inzibati binasında ulu öndər Heydər Əliyevin 100 illik yubileyinə həsr olunmuş konfrans daha möhtəşəm keçdi.
Lənkəran, Masallı, Astara, Lerik, Yardımlı rayon prokurorların, Lənkəran hərbi prokuroru ilə yanaşı, Lənkəran Şəhər icra Hakimiyyətinin başçısının, prokurorluq əməkdaşlarının, hüquq mühafizə orqanlarının rəhbərləri və ictimaiyyət nümayəndələrin qatıldığı konfrans iştirakçıları əvvəlcə ulu öndər Heydər Əliyevin abidəsini, Şəhidlər Abidə Kompleksini ziyarət edərək onun önünə və şəhid məzarlarına tər gül dəstələri düzüb, müstəqil dövlətimizin memarı, müdrik dövlət xadimi, dahi şəxsiyyət Heydər Əliyevə dərin hörmət və ehtiramını bildirib, həmçinin Lənkəran Rayon Heydər Əliyev Mərkəzində Ümummilli lider Heydər Əliyevin zəngin dövlətçilik irsini, həyat və fəaliyyətini özündə əks etdirən eksponat və fotostendlərlə tanış oldular.
Tədbir ulu öndərin və ölkəmizin ərazi bütövlüyü uğrunda qəhrəmancasına şəhid olmuş şəxslərin əziz xatirəsi bir dəqiqəlik sükutla yad edilməklə, Azərbaycan Respublikasının Dövlət Himni oxunmaqla başlandı.
Lənkəran rayon prokuroru Taryel Ələkbərov konfransı açıb müasir Azərbaycan dövlətinin banisi, görkəmli dövlət xadimi ümummilli liderimiz Heydər Əliyevin şəxsiyyəti, onun zəngin siyasi və idarəçilik fəaliyyəti, hüquqi dövlət quruculuğu, dahi liderin rəhbərliyi altında bütün sahələrdə olduğu kimi prokurorluq orqanlarda aparılmış köklü islahatlar və prokurorluğa dövlət qayğısı, eləcə də ölkəmizin beynəlxalq müstəvidə tanınmasında göstərdiyi xidmətləri mövzusunda çıxış etdi.
Digər natiqlər - Lənkəran Şəhər İcra Hakimiyyətinin başçısı Taleh Qaraşov və rayon ziyalısı İbrahim Quliyev, Lerik rayon prokuroru Akif Rzayev və Lənkəran hərbi prokuroru Elşən Əli-Məmmədov dahi insan, Azərbaycan xalqının böyük oğlu Heydər Əliyevin zəngin siyasi və dövlət quruculuğu sahəsində əvəzolunmaz fəaliyyəti, eləcə siyasi hakimiyyətdə olduğu dövrdə Lənkəranla bağlı gördüyü işlər haqqında danışıb, dahi liderlə olan xatirələrini konfrans iştirakçıları ilə bölüşdülər.
Yekunda konfrans iştirakçıları Baş Prokurorluğun təşəbbüsü ilə ərsəyə gəlmiş ümummilli liderin xatirəsinə həsr olunan “Böyük şəxsiyyət...3 ştrixdə” adlı sənədli filmə baxdılar.
Zəfər ORUCOĞLU Azərbaycan Jurnalistlər Birliyinin üzvü
