Son vaxtlar KİV-də “hardasa ağac kəsildi və yerində hansısa obyekt, ya da bina tikildi” və ya “ağacın dibinə hansı məhlul töküldü” kimi məlumatlara tez-tez rast gəlirik. Bu səfər Bakıda ağaclar dibinə mazut tökülərək qurudulub.
Hadisə Əhməd bəy Rəcəbli və Fətəli xan Xoyski kücəlrinin kəsişməsində baş verib. Bu barədə həmin ərazidə yaşayan sakinlər sosial şəbəkədə məlumat paylaşıb. Qeyd edilir ki, gecə saatlarında ağacların dibinə mazut tökülüb: “Səhər ağacların dibinin nə vəziyyətdə olduğunu görəndən sonra aiddiyəti qurumlara xəbər etdik. Bacardığımız qədər ağacların dibini təmizləməyə çalışdıq”.
Ekologiya və Təbii Sərvətlər Nazirliyi: “Müvafiq araşdırmalar aparıldıqdan sonra məsələyə hüquqi qiymət veriləcək”
Ekologiya və Təbii Sərvətlər Nazirliyindən bildirildi ki, məsələ ilə bağlı müvafiq araşdırmalar aparıldıqdan sonra məsələyə hüquqi qiymət veriləcək.
Flora Hacıyeva: “Ağacı kəsmək mümkün olmadıqda dibinə mazut, “kislota” və ya digər kimyəvi maddələr tökərək qurudurlar”
Ekoloq Flora Hacıyeva bizimlə söhbətində qeyd etdi ki, ağaclara qarşı bu əməlləri törədən şəxslər ağır şəkildə cəzalandırılmalıdır: “Ağacların dibinə mazut töküb yandırırlar ki, sonra yerində obyekt tiksinlər. Aidiyyəti qurumlar yalnız cərimə etməklə kifayətlənir, amma tək cərimə ilə bunların qarşısı alına bilməz. Ağacların quruması üçün kimyəvi maddə tökən şəxs sərt şəkildə cəzalandırılmalıdır ki, bu, digər şəxslərə də ibrət olsun”.
Həmsöhbətimiz hesab edir ki, yaşıllıqların məhv edilməsinin arxasında müəyyən dairələr dayanır. Bunun nəticəsidir ki, hansısa cərimə sanksiyalarından sonra yenə öz bildiklərini edirlər. Çətini ağacları kəsməkdir, ondan sonra qanunsuz tikinti işləri aparmaq elə də çətin deyil. Hansısa məmurlar bunu qabaqcadan, təbii ki, qeyri-rəsmi olaraq sahibkarlarla razılaşdırır. Buna uyğun olaraq da yaşıllıqlar məhv edilir: “Cərimə olunsalar da, bir müddət sonra öz işlərini görürlər. Bu mənada, ictimai nəzarət gücləndirilməlidir. Belə hallar baş verəndə dərhal müvafiq qurumlara məlumat verilməlidir. İkincisi, kəsilən ağacın yerində ağac əkilməli və onun orada qalmasına nəzarət edilməlidir. Bəzən formal olaraq kəsilən ağacın yerinə ting əkilir, sonra o ting oradan xəlvətcə götürülür. Ona görə də Ekologiya və Təbii Sərvətlər Nazirliyi buna nəzarəti artırmalıdır. Qurum yeni bir ağacın əkilməsini dərhal icra etməlidir. Yoxsa yalnız cərimə etməklə problem həllini tapmayacaq. Danılmaz faktdır ki, paytaxtda harada gəldi aparılan tikintilər zamanı ağaclar kəsilir. Kəsmək mümkün olmadıqda isə, dibinə mazut, “kislota” və ya digər kimyəvi maddələr tökərək qurudurlar. Bunun qarşısının alınması üçün çox ciddi cərimələr və adekvat cəzalar tətbiq olunmalıdır”.
Günel CƏLİLOVA
