Bu günlərdə imtahana “şortik” və çəkələklə gələn tələbə universitet qapısında gözlədilib. Hadisə Azərbaycan Texniki Universitetində baş verib.
Qeyd edək ki, son zamanlat tələbələrin geyimi ilə bağlı narazılıqlar yaşanır. Ekspertlər bildirir ki, tələbələrin ali məktəblərə şortik geyinməsi Azərbaycan mentaliteti və mədəniyyətinə uyğun deyil. Tələbələrin geyimləri mentalitetə uyğun olarsa, tənqid obyektinə də çevrilməyəcək.
Xeyrəddin Qoca: “İnsanlar müəyyən çərçivələrdən çıxmamaq şərti ilə azad olmalı, cəmiyyətdə özlərini azad hiss etməlidir”
Mövzu ilə bağlı tanınmış yazıçı-pulbisist Xeyrəddin Qoca “Bakı-Xəbər”ə şərhində bunları dedi: “Vaxtilə mən də təcrübəsizlikdən belə şeylərin əleyhinə çıxmışam. Xaricdə şortiklə ölkə başçısından müsahibə götürürlər. Bizdə milli-mənəvi dəyərlərdən həddindən çox danışırlar, daha doğrusu, "şitini-şorunu" çıxarırlar, amma ortada dəyər-filan yoxdur!
Əgər şortik geyinən tələbə savadlıdır, mədənidirsə, ağıllıdırsa, imtahan suallarına cavab verə bilirsə, milli-mənəvi dəyərlərin məsələyə dəxli yoxdur! Bir də bizdə o "milli-mənəvi dəyərlər" dediyinizdən heç nə qalmayıb! Guya o tələbədən imtahan götürən müəllimin özü milli-mənəvi dəyərlər haqqında bir şey bilir?
Amerikada tələbələr istədikləri vaxt dərsə gələ bilərlər, istədikləri vaxt gəlməzlər. Müəllimin mühazirəsini dinləyə də bilərlər, oturduqları yerdə yata da bilərlər! Nəticə yüksək olmalıdır...
Bir dəfə 47 il ədəbiyyat müəllimi işləmiş atamdan soruşdum ki, türklər müsəlman deyil? O da cavab verdi ki, "müsəlmandırlar". Soruşdum, bəs qadınlar niyə səhnəyə açıq-saçıq geyinib çıxırlar? Dedi ki, "qoy bizdə müstəqillik olsun, bizimkilər daha betər olacaqlar!" İndi gedin, bir sıra restoranlarda kiçik yaşlı qızların necə geyindiklərinə, nələrdən çıxdıqlarına baxın! Hanı milli-mənəvi dəyərlər?
Ümumiyyətlə, insanlar müəyyən çərçivələrdən çıxmamaq şərti ilə azad olmalı, cəmiyyətdə özlərini azad hiss etməlidirlər. Baxın, bu bizdə yoxdur! Milli-mənəvi dəyərlərin də "quyruğuna" bağlanan bir sıra fikirlərə görə, insanlarımız azad yaşaya bilmirlər! "Mənə nə deyərlər", filankəslər buna necə baxarlar" sualları insanları rahat yaşamağa qoymur!
Əvvəl də bir müsahibəmdə demişəm, təkrar edirəm, bizdə ali təhsil yoxdur. Bizə dərs deyən müəllimlərin də təhsili ali olmur! "Ali" sözünün dərin mənasını bir düşünün! Bir sahəni öyrənib,diplom almaq ali təhsilli olmaq deyil! Ümumiyyətlə, bizə dərs deyən "alimlər"in savadlı bir ərizə yaza bilmədiklərini (bəzi görkəmli dilçilərdən başqa) mən çoxdan sübut etmişəm!
Bir sözlə, milli-mənəvi dəyərlərlə tələbələri sıxışdırmağa lüzum görmürəm!”.
Fatimə Hacıbəyli: “Daxili nizam-intizam qaydalarını hər bir tələbə gözləməlidir, yəni təhsil ocağıdır deyib, istədiyimiz formanı geyinib, ora gedə bilmərik”
“Vəfa” Sosial İctimai Birliyinin sədri Fatimə Hacıbəyli “Bakı-Xəbər”ə açıqlamasında qeyd etdi ki, daxili nizam-intizam qaydalarını hər bir tələbə gözləməlidir: "Yəni təhsil ocağıdır deyib, istədiyimiz formanı geyinib, ora gedə bilmərik. Hər bir paltarın geyinilməsinə uyğun yeri var. İnsan ən azından özünə hörmətlə yanaşmalıdır ki, hansı geyimi hara geyinir. Universitet tələbələri səliqəli geyinməli, normal geyim mədəniyyətini qorumalıdırlar. Tələbə təhsil aldığı üçün universitetə təhsil haqqı ödəyir. Heç bir halda onunla imzalanmış müqavilədə göstərilməyib ki, tələbə hansısa formada universitetə qəbul olunmalıdır. Dikdaban ayaqqabı ilə təhsil prosesində iştirak etməmək absurd məsələdir. Bu, təhsilalanların təhsil hüququnun tapdalanması kimi qiymətləndirilə bilər. Amma hər bir şəxs - tələbə, müəllim – geyimində məsuliyyət hiss etməlidir. Tələbənin tələbə, müəllimin müəllim geyimi olmalıdır. Mən dünyanın heç bir yerində görməmişəm ki, tələbə univeristetə şortikdə gəlsin. Sadəcə, bizim ölkəmizdə hər şeyin ağını çıxartmağı xoşlayırlar. Təhsil, mədəniyyət mərkəzində şortikdə gəzməklə bulvarda şortikdə gəzmək arasında fərq olmayacaqsa, bu yanaşma doğru ola bilməz . Universitetlərdə isə məsələ başqadır, müəyyən qadağa, “dress code” qoymaq olar”. Dünyada bu cür “dress code”-lar mövcuddur. Operaya, teatr tamaşasına cins şalvarda gələnlər yaxşı qarşılanmır. İnsanlar belə yerlərə ən gözəl paltarlarında gəlirlər”.
Günel CƏLİLOVA
