Son illərin ən geniş müzakirə mövzularından biri də uşaqların 1-ci sinfə imtahanla qəbul edilməsidir. Belə ki, valideynlər imtahanların çətin olmasından və bu imtahanın düzgün olmadığından şikayətlənirlər. Hətta sosial şəbəkədə 1-ci sinfə qəbul imtahanına düşən suallar belə narazılığa səbəb olur.
Bildirilir ki, 6 yaşlı uşağa onun yaşına, psixologiyasına uyğun olmayan suallar verilir. Təbii ki, uşaq da o cür suallara cavab verə bilmir deyə onu məktəbə qəbul etmirlər.
Maraqlıdır, uşaqların birinci sinfə qəbul prosesi necə olmalıdır ki, bu sahədə narazılıq olmasın?
“6 yaşı tamam olmamış uşaqların 1-ci sinfə qəbulu mümkün deyil, bunu nə sistem, nə də mövcud qanunvericilik qəbul edir”
Təhsil eksperti Kamran Əsədov bildirdi ki, Azərbaycanda yalnız rus bölməsində oxumaq istəyən uşaqların oxuma, anlama və dinləmə qabiliyyətləri yoxlanılır: “Bu da anlaşılandır. Çünki bir çox hallarda valideynlər rus dilində danışa bilməyən uşaqların rus bölməsinə cəlb olunmasında maraqlı olurlar. Əlbəttə, onlar istəyirlər ki, övladları ikinci bir dil bilsin, ancaq ciddi problem yaratmış olurlar. Çünki ev tapşırıqlarının yerinə yetirilməsində övladlarına kömək edə bilmirlər. Bu hal uşaqların təhsil aldıqları müddətdə əziyyət çəkmələrinə gətirib çıxarır. Məlumdur ki, Elm və Təhsil Nazirliyi hər il rus bölmələri üçün müsahibə təşkil edir. Hər il 15 mindən çox şagird müsahibə və müsabiqə nəticəsində rus bölməsinə qəbul olur. Qəbul ola bilməyənlər imtahanın şəffaf olmadığını iddia edir. Ancaq deyərdim ki, imtahanlar tam obyektiv və şəffaf keçirilir. Burada problem uşaqlarımızın özünü ifadə etmək bacarığı ilə bağlıdır. Bəzən valideynlər uşaqlarını son 1 il, 6 ay ərzində rus dili hazırlıqlarına qoyurlar, ona görə uşaq müəyyən qədər rusca bilir. Lakin bu, rus dilində ciddi akademik səviyyədə anlama, dinləmə, özünü ifadə etmə bacarıqlarını formalaşdırmır. Bu ciddi bir məsələdir. Özüm də monitorinq aparıb görmüşəm ki, suallar uşaqları danışdırmağa yönəlmiş suallardır. Yəni qərəzli olaraq hər hansı uşağın rus bölməsi üzrə kəsilməsini iddia etmək əsassızdır. Bununla bağlı apellyasiya var. İmtahan zamanı valideyn və qanuni nümayəndələr orada olur. Etiraz olduqda, cavablara, videoya yenidən baxılır. Özünü ifadə edə bilən uşaqlar birmənalı şəkildə uğur qazanır”,
Ekspert onu da əlavə etdi ki, 6 yaşı tamam olmamış şəxslərin 1-ci sinfə qəbulu mümkün deyil. Bunu nə sistem, nə də mövcud qanunvericilik qəbul edir. 6 yaşı 16 sentyabr-31 dekabr müddətində tamam olan uşaqların I sinfə qəbulu isə “Xüsusi istedada malik uşaqların vaxtından əvvəl I sinfə qəbulu Qaydaları”na əsasən aparılır.
Günel CƏLİLOVA
