Rəqəmsal İnkişaf və Nəqliyyat Nazirliyi yanında Elektron Təhlükəsizlik Xidməti vətəndaşlara “Telegram” vasitəsilə göndərilən saxta keçidlər barədə xəbərdarlıq edib. Qurum bəyan edib ki, son günlər “Telegram” vasitəsilə vətəndaşlara müxtəlif profillər adından saxta keçidlər göndərilir.
Həmin keçidə daxil olduqdan sonra vətəndaşdan “Telegram”da qeydiyyatdan keçərkən istifadə etdiyi mobil nömrəni daxil etmək tələb olunur. Daha sonra vətəndaşa təsdiqləmə kodu göndərilir. Şəxs həmin kodu təsdiq edərsə, haqqında olan məlumatlar ələ keçirilir. Beləliklə, şəxs haqqında bütün məlumatlar, yazışmalar ələ keçirilir.
“İstifadəçi kontakt siyahısından kimdənsə ona hədiyyə olaraq Telegram Premium-a abunə göndərildiyi barədə mesaj alır, istifadəçi düyməni basır və bu zaman…”
Mövzu ilə bağlı fikir bildirən İ KT sahəsi üzrə ekspert Nadim Əliyev “Bakı-Xəbər”ə açıqlamasında qeyd etdi ki, bu gün ölkəmizdə İKT sahəsində mütəxəssis problemi yaşanır: “Ölkəmizdə kibertəhlükəsizlik sahəsində milli mütəxəssis problemi aktualdır. Bu tip problemlərin yaranmasının müxtəlif səbəbləri var. İstifadəçi kontakt siyahısından kimdənsə ona hədiyyə olaraq Telegram Premium-a abunə göndərildiyi barədə mesaj alır. İstifadəçi düyməni basır və bu zaman o, avtorizasiya kodunu alır. Ekranda yazılır ki, premium abunəni aktivləşdirmək üçün bu kodu daxil etmək lazımdır. Həmin kod daxil edildikdən sonra onun hesabı dərhal hakerin kompüterində açılır. Beləliklə, bütün məlumatlar ələ keçirilir”.
Ekspert onu da əlavə etdi ki, ölkəmizdə kiberhücumlar lap əvvəldən yayılıb. İnternetin, sosial şəbəkələrin inkişafı ilə bağlı bu işlərlə məşğul olan xarici xüsusi xidmət orqanları və yaxud da fırıldaqçı biznes xarakterli şirkətlər bundan istifadə etməyə çalışırlar: “Burada iki amil var. Bəzi ölkələrin ictimai, siyasi, sosial əhəmiyyətli nüfuzlu şəxslərini ələ keçirmək, onlardan şantaj yolu ilə pul almaq məqsədi güdürlər. Təbii ki, bu bir mənəvi, psixoloji terrordur. İnsan hüquqlarına, informasiya gizliliyi məsələlərinə müdaxilədir. Bu məsələnin qarşısı alınmalıdır. Çünki insanın şəxsi əlaqələri, yazışmaları, istənilən motivdə olursa-olsun, başqaları tərəfindən icazəsiz paylaşıla bilməz. Bununla bağlı, təbii ki, müvafiq tədbirlər görülməlidir”.
Günel CƏLİLOVA
