Azərbaycan koronavirusla ən uğurlu mübarizə aparan 10 ölkənin üçüncüsü oldu...

img

Çinin Uhan əyalətindən alovlanıb dünyanı bürüyən koronavirus, COVID-19 bəlası hələ də sovuşmayıb və bəşəriyyəti təhdid etməkdə davam edir. Ən güclü dövlətlərin belə iqtisadiyyatını, səhiyyəsini alt-üst edib, insan ölümlərini çarəsizcə izləməyə vadar edir.

Bu dəhşətli pandemiyanın Azərbaycanda bu cür arzuolunmaz fəsadlar yaratmaması, xəstəliyin ölkə ərazisində geniş yayılmaması üçün dövlətimiz tərəfindən ciddi tədbirlər görülür. Bu məqsədlə tətbiq edilən xüsusi karantin rejimi çərçivəsində artıq ölkədə hərəkət məhdudiyyətləri müəyyən olunub. Əhalinin həyat və sağlamlığının qorunmasını, dövlət qurumlarının və həyat təminatı obyektlərinin fasiləsiz işini, habelə yaranmış vəziyyətdə iqtisadi subyektlərin zəruri həddə fəaliyyətini təmin etmək məqsədilə qoruyucu tədbirlər davam edir.

Koronavirusun geniş yayılmasının qarşısının alınması istiqamətində görülən işlər xarici ölkələrin, beynəlxalq təşkilatların da diqqətini cəlb edir.

Azərbaycan Böyük Britaniyanın Oksford Universitetinin koronavirusla mübarizənin effektiv tədbirləri üzrə ən yaxşı ölkələrdən biri kimi tanınır. Universitetin tədqiqatçıları dünyanın 183 ölkəsində hökumət tədbirlərini əhaliyə yardım və səhiyyə sisteminin işi kimi 19 göstərici üzrə qiymətləndiriblər. Azərbaycan reytinq siyahısında 10 ən yaxşı ölkə arasında 3-cü yeri tutub.

COVID-19-a qarşı dövlətimiz tərəfindən aparılan effektiv mübarizə dünyanın da diqqətindən kənarda qalmayıb, təqdir olunur, nümunə göstərilir.

Xüsusilə qeyd edək ki, ÜST-ün baş direktoru Tedros Qebreyesus da COVID-19 pandemiyasının təsirinin və miqyasının məhdudlaşdırılması istiqamətində Azərbaycan Prezidentinin yürütdüyü siyasəti və atılan addımları təqdir edir.

Qeyd edək ki, virusun yayılmasının qarşısını almaqda ona yoluxan şəxslərin tez aşkarlanması da böyük rol oynayır. Bu istiqamətdə də Azərbaycanda əhəmiyyətli işlər görülür. Bunun üçün yeni, ən müasir standartlar səviyyəsində olan əlavə tibbi laboratoriyalar alınıb.

Dünyanın yeni bəlası qapını döyəndə Azərbaycan rəhbərliyi məhz belə etdi. Təmkinli, lakin çevik qərarlarla, bəlanın törədə biləcəyi faciənin miqyası dəqiq təhlil edilməklə mübarizə tədbirlərinə başlandı. Azərbaycan hökuməti Operativ Qərargah yaratdı, gücləndirilmiş iş rejiminə keçdi, profilaktik və preventiv tədbirlər görüldü, sabit və ardıcıl məlumatlandırma, maarifləndirmə tədbirlərinə start verildi.

Məlumdur ki, Azərbaycan infeksiyanın yayılmasına qarşı olduqca çevik reaksiya verib. Hələ ötən ilin fevral ayından Azərbaycanda ciddi karantin tədbirləri həyata keçirilir. Mart ayının əvvəllərindən bütün məktəblərdə tədris dayandırılıb, uşaq bağçaları bağlanıb. O cümlədən, respublikamızın qonşu ölkələrlə sərhədləri qapadılıb və xaricdən dönən vətəndaşların sağlamlığı ciddi şəkildə yoxlanıb. Eləcə də aviareyslər dayandırılıb, ölkə daxilində vətəndaşların və insanların hərəkəti məhdudlaşdırılıb. Bu dövrdə müvafiq dövlət qurumlarının əməkdaşları və eləcə də KİV tərəfindən genişmiqyaslı maarifləndirmə işlərinin aparılmasının da böyük əhəmiyyəti olub. Hazırda Azərbaycanda əksər orqanda fəaliyyət internet üzərindən qurulur, iclaslar, toplantılar onlayn rejimdə keçirilir.

Virusa qalib gəlməyin məhz dövlət və vətəndaş həmrəyliyindən asılı olduğu dünyanın bir çox ölkəsində rast gəlinən acı həqiqətlərlə təsdiq olunan gerçəklikdir.

Onu da qeyd edək ki, Azərbaycanın Koronovirusla Mübarizəyə Dəstək Fondu yaratması ideyası da artıq geniş təcrübəyə çevrilib. Prezident İlham Əliyevin təşəbbüsü ilə yaradılan, özünün və Birinci vitse-prezident Mehriban Əliyevanın birillik maaşını ianə etdiyi fonda vətəndaşlar, iş adamları, dövlət qulluqçuları, şirkətlər ianələrlə qoşuldular. Belə günlərdə mühüm məsələlərdən biri milli və vətəndaş həmrəyliyinin mövcudluğu, bunu cəmiyyətin bir daha hiss etməsi, hər kəsin Vətən üçün, cəmiyyət üçün əlindən gələni edə bilməklə öz bacarığını və hissini nümayiş etdirməsidir. Bu Fond məhz həmin hisslərin, davranışların, cəmiyyətin bütövlüyünün göstəricisi kimi çox vacib stimul oldu.

Koronavirusa zamanında ciddi yanaşmayan ölkələrdə sonradan qoyulan qadağalar elə də effektiv olmadı və bu təsir gücünün işlək olmamasında vətəndaşların da həmin qaydalara uymamasının böyük rolu oldu. Təəssüf ki, nəticə insan faciələri ilə müşayiət olundu.

Amma ölkəmizdə bu cür faciələrin yaşanmaması üçün zamanında tədbirlər görüldü, qaydalar tətbiq olundu və bu tədbirlər davam etdirilir. Təsadüfi deyil ki, hazırda Azərbaycanın adı koronavirusun tüğyan etdiyi ölkələr siyahısında deyil.

Günel CƏLİLOVA

Son xəbərlər