14/08/2020 12:06
728 x 90

Azərbaycanda videokonfrans-əlaqə məhkəmələri başlayır – tam səs yazısı aparılacaq, iqtisadi cinayətlərə görə isə…

Əziz Qənbərov: “Dəyişikliyin əhəmiyyətli tərəflərindən biri də məhkəmə iclaslarının fasiləsiz audio və video yazılması nəzərdə tutulmasıdır”

img

Xəbər verildiyi kimi, Cinayət-Prosessual Məcəlləsində dəyişiklik edilir. Qanunun məqsədi cinayət mühakimə icraatında müasir informasiya- kommunukasiya texnologiyalarının üstünlüklərindən istifadə edilməsini, habelə xüsusi karantin rejimində və digər xüsusi hallarda cinayət prosesinin videokonfrans əlaqə vasitəsilə davam etdirilməsini təmin etməkdir.

Qanun bütövlükdə cinayət mühakimə icraatında innovativ üsullardan istifadə etməklə effektivliyin yüksəldilməsi, məhkəməyə müraciət etmək imkanlarının genişləndirməsi, habelə süründürməçilik və sui-istifadə hallarının qarşısının alınması məqsədi ilə hazırlanıb.

Həmçinin qanunda iqtisadi sahədə olan cinayətlərə görə zərərçəkmiş şəxslə barışma, ziyanın ödənilməsi və dövlət büdcəsinə ödəniş edilməsi şərti ilə cəzadan azad etmənin qaydası nəzərdə tutulur.

  • “İqtisadi sahədə olan cinayətlərə görə zərərçəkmiş şəxslə barışma, ziyanın ödənilməsi və dövlət büdcəsinə ödəniş edilməsi şərti ilə cəzadan azad etmənin qaydasının tətbiq edilməsi təqdirəlayiqdir”

Qanunun mahiyyəti haqqında məlumat verən vəkil Əziz Qənbərov “Bakı-Xəbər”ə açıqlamasında bildirdi ki, qanuna edilən dəyişikliyin əhəmiyyəti ondan ibarətdir ki, hazırkı karantin dövründə və ümumiyyətlə bəzi kateqoriyalı cinayətlərin istintaqı zamanı onlayn qaydada məhkəmə və istintaq proseslərinin keçirilməsini tənzimləyir: “Ancaq onu da bildirim ki, bunun müəyyən çətinlikləri də olacaq. İstintaq zamanı təqsirləndirilən şəxslə müdafiəçisinin eyni yerdə olmaması müdafiə taktikasında müəyyən problemlər yarada bilər. Bəzən vəkil müdafiə etdiyi şəxsə dərhal məsləhət vermək zərurəti yaranır. O zaman bəzi çətinliklər yarana bilər. Bundan başqa dəyişikliyin əhəmiyyətli tərəflərindən biri də məhkəmə iclaslarının fasiləsiz audio və video yazılması nəzərdə tutulmasıdır. Ənənəvi məhkəmə prosesində isə protokollar məhkəmə katibinin və hakimin insafına buraxılır. Bəzən məhkəmələr iclasda baş verən prosesləri deyil, ittiham tərəfinin təqdim etdiyi ittiham aktını məhkəmənin iclas protokoluna köçürdürlər. Təbii ki, bu da ədalət mühakiməsinə öz mənfi təsirini göstərir. İnsanların məhkəməyə inamını azaldır. Ancaq bu dəyişiklikdən sonra hesab edirəm ki, bu cür neqativ hallar baş verməyəcək”.

Həmsöhbətimiz onu da əlavə etdi ki, iqtisadi sahədə olan cinayətlərə görə zərərçəkmiş şəxslə barışma, ziyanın ödənilməsi və dövlət büdcəsinə ödəniş edilməsi şərti ilə cəzadan azad etmənin qaydasının tətbiq edilməsi təqdirəlayiqdir.

Məlumat üçün bildirək ki,  Azərbaycan Respublikası Prezidentinin "Məhkəmə Hüquq sistemində islahatların daha da dərinləşdirilməsi barədə" 03.04.2019-cu il fərmanından bir ildən də çox vaxt keçib, ancaq bu fərmanın icrası ilə bağlı addımlar son iki-üç ayda daha çox nəzərə çarpmaqdadır.

Günel CƏLİLOVA

Son xəbərlər