Aydın Mirzəzadə: “Avropa İttifaqı aydın şəkildə görür ki, bu sərəncamda insanlara siyasi mənsubiyyətinə görə heç bir fərq qoyulmayıb" Rauf Zeyni: “Bu, insan haqlarına verilən ən böyük dəyər olduğu üçün, Aİ əfv qərarını birmənalı olaraq alqışlayıb”
Avropa İttifaqı (Aİ) Azərbaycan Prezidenti İlham Əliyevin Novruz bayramı ilə əlaqədar aralarında siyasi partiya, qeyri-hökumət təşkilatları üzvləri, bloger və jurnalistlərin də olduğu 400-dən çox məhbusu əfv etməsini alqışlayıb. Bu barədə Aİ-nin Xarici əlaqələr və təhlükəsizlik siyasəti ofisinin mətbuat katibinin bəyanatında deyilir.
Bildirilir ki, Aİ Azərbaycanın üzərinə götürdüyü beynəlxalq öhdəliklərə uyğun olaraq gələcəkdə də oxşar addımları davam etdirəcəyini gözləyir: “Aİ əməkdaşlığı, eyni zamanda, əlaqələrimizin vacib elementlərindən olan insan haqları sahəsində əlaqələri inkişaf etdirmək üçün Azərbaycanla işləməyə davam edəcək".
Avropa İttifaqı Azərbaycanda imzalanan son əfv sərəncamını dəstəkləməklə əsasən hansı aspektlərə önəm verib?
Millət vəkili Aydın Mirzəzadə qəzetimizə bildirdi ki, cənab Prezidentin imzaladığı əfv sərəncamına yalnız həmin qurumdan deyil, bir çox dairələrdən müsbət reaksiya verilib: “Bilirsiniz ki, Azərbaycan dövləti mütəmadi şəkildə əfv sərəncamları verir, amnistiya aktları tətbiq edir. Müqayisə aparsaq görərik ki, bu statistikaya görə, biz bir çox ölkələri qabaqlayırıq. Bu, dövlətin humanistliyini və səhv etmiş vətəndaşlarını bağışlamaq qüdrətində olduğunu göstərir. Belə addımların atılması, bir qayda olaraq, demokratik, hüquqi dövlətlər, yəni insan haqlarına ciddi hörmət edən ölkələr üçün xarakterikdir. Ölkəmizdə il ərzində bir neçə dəfə əfv fərmanı imzalanır, vaxtaşırı amnistiyalar verilir. Məhz bu baxımdan, hətta Avropa İttifaqında nə qədər Azərbaycanı sevməyən insan olsa da, yenə də həmin qurum ölkəmizdə insan haqlarına necə böyük önəmin verildiyini etiraf etməyə məcburdur. Avropa İttifaqı aydın şəkildə görür ki, bu sərəncamda insanlara siyasi mənsubiyyətinə görə heç bir fərq qoyulmayıb. Cəmiyyət üçün təhlükəli olmayan, cəza çəkdiyi müddətdə islah edilən şəxslər, bir qayda olaraq, ölkə başçısının sərəncamı ilə əfv edilirlər. Bu parametrlərə görə, son əfv sərəncamı həm Azərbaycan cəmiyyətində, həm də beynəlxalq aləmdə əks-səda doğuraraq, böyük rəğbətlə qarşılanıb”.
Ədliyyə Nazirliyi yanında İctimai Komitənin üzvü Rauf Zeyni hesab edir ki, imzalanan sonuncu əfv sərəncamı ilə bir çox tanınmış məhkumun da azadlığa çıxmasının belə rəyin formalaşmasına təsiri güclü olub: “Novruz bayramı ərəfəsində belə bir sərəncamın verilməsi çox humanist addımdır. Bu sərəncamla əfv olunanların ailəsində ikiqat sevinc yaşandı. 2003-cü ildən bəri 33 əfv sərəncamı imzalanıb. Bununla əlaqədar minlərlə insan məhkumluqdan azad olunub. Bu çox böyük diqqət və qayğıdır. Ölkə Prezidenti daim vətəndaşlara qayğı göstərir. Azərbaycan xalqı ölkə Prezidenti İlham Əliyevin və Birinci vitse-prezident Mehriban Əliyevanın bu istiqamətdəki fəaliyyətini yüksək dəyərləndirir. Bununla yanaşı, beynəlxalq qurumlar və xüsusilə də Avropa İttifaqı da görür ki, Azərbaycanda siyasi mənsubiyyətindən asılı olmayaraq, hər bir məhkuma eyni yanaşma ortaya qoyulur. Bu, insan haqlarına verilən ən böyük dəyər olduğu üçün, Aİ əfv qərarını birmənalı olaraq alqışlayıb”.
Məhəmmədəli QƏRİBLİ
