Elçin Mirzəbəyli: “Ölkənin milli və dövlət maraqları ilə bağlı bütün məsələlər üzrə cəmiyyətdə həmrəylik mövcuddur”
Prezident İlham Əliyevin Novruz bayramı münasibətilə növbəti əfv sərəncamı imzalaması ictimaiyyətdə böyük rəğbətlə qarşılanıb. İctimaiyyətin bütün təbəqələri ölkə başçısının sözügedən qərarını alqışlayır. Nəzərə almaq lazımdır ki, əfv sərəncamı 431 məhkuma şamil olunub. Belə ki, onlardan 399-u azadlıqdan məhrumetmə cəzasının qalan hissəsini çəkməkdən azad edilib.
Prezident İlham Əliyevin fəaliyyətində humanizmin və insansevərliyin əsas prinsip olmasını rəqəmlər də təsdiqləyirlər. Çünki ölkə başçısı tərəfindən imzalanan sonuncu sərəncam 2003-cü ildən bəri sayca 33-cü əfv sənədidir. Ümumilikdə, 16 il ərzində imzalanan fərman və sərəncamlarla 4.500-dən çox şəxs azadlığa buraxılmaqla, 5 minə yaxın məhkum əfv edilib. İmzalanan əfv sərəncamları çoxsaylı ailəyə sevinc bəxş edir. Qeyd edək ki, ötən il də mayın 24-də Cümhuriyyətin 100 illiyi münasibətilə 634 şəxs əfv olunub.
Diqqətçəkən məqamlardan biri həm də ondan ibarətdir ki, əfv sərəncamı siyasi mənsubiyyətindən aslı olmayaraq, bir sıra məhbuslara şamil olunub. Düzdür, bundan əvvəlki sərəncam və fərmanlarda da belə olub. Yəni siyasi görüşlərindən asılı olmayaraq, bir çox məhbus azad edilib. Bu dəfə isə sözügedən məhbusların sayı daha çox idi. O üzdən, sözügedən qərar həm də Azərbaycanda vətəndaş həmrəyliyinin daha da güclənməsinə öz müsbət təsirini göstərəcək.
Maraqlıdır, bəs ekspertlər bunu necə dəyərləndirirlər? Əfv sərəncamı ölkədə vətəndaş həmrəyliyinin daha da möhkəmlənməsində necə rol oynayacaq?
Məsələyə münasibət bildirən politoloq Elçin Mirzəbəylinin sözlərinə görə, məlum qərar ümumən çox böyük əhəmiyyətə malikdir: “Əvvəla konkret şəxslər konkret cinayət əməllərinə görə məsuliyyətə cəlb olunublar. Kimin hansı syasi görüşlərə malik olmasının cinayət əməllərinə hər hansı bağlılığı yoxdur. Prezident humanistlik göstərərək vətəndaşların, dövlət qurumlarının, Əfv Komissiyasının və insan haqları təşkilatlarının rəyini nəzərə alaraq, çoxsaylı insanın əfv olunması ilə bağlı sərəncam imzalayıb. Onların arasında siyasi dünyagörüşü fərqli olan bir sıra şəxslər də var. Həmin insanlar da konkret cinayət əməlinə görə məhkum olunublar. Ancaq ölkə başçısı humanistlik göstərərək onları əfv edib. Bu, Prezident İlham Əliyevin humanistliyinin növbəti nümunəsidir. Məsələ ondadır ki, ölkə başçısı son 10 ay ərzində 2 əfv sərəncamı imzalayıb. Sözügedən sərəncamların miqyasına baxsaq görərik ki, bu qərarlar kifayət qədər geniş və əhatəlidir. Bildiyim qədər dünyada indiyə qədər oxşar fakt olmayıb. O cümlədən, qadın məhbusların azad olunması ilə bağlı ardıcıl addımların atılmasını xüsusi qiymətləndirirəm. Bu, Azərbaycan dövlətinin humanizm mahiyyətindən irəli gələn faktordur. Eyni zamanda, digər məqamları da qeyd etmək lazımdır. Azərbaycanda cəzaların daha yüngül cəzalarla əvəz olunması ilə də bağlı addımlar atılır. Nəticədə məhbusların daha yüngül cəzalarla cəzalandırılmasına imkan yaranır. Bütün bunlar, təbii ki, ciddi humanizm xarakteri daşıyan addımlardır. Ölkədə vətəndaş həmrəyliyinə gəldikdə, Azərbaycan xalqı yekdildir, bütövdür. Ölkənin milli və dövlət maraqları ilə bağlı bütün məsələlər üzrə cəmiyyətdə həmrəylik mövcuddur. Bu həmrəylik də özünü ən müxtəlif dövrlərdə büruzə verib. Aparılan siyasət həmrəyliyin daha da güclənməsinə öz müsbət təsirini göstərir. Ümumilikdə, Prezidentin məlum qərarı cəmiyyət tərəfindən rəğbətlə qarşılanır və yüksək səviyyədə dəstəklənir”.
Vidadi ORDAHALLI
