Fəzail Ağamalı: “Müxalifət iqtidara qarşı qərəzli mövqedən imtina edərək konstruktiv mövqe nümayiş etdirsə, əlbəttə, iqtidar tərəfindən də onlara doğru addımlar atıla bilər” Əli Əliyev: “Dialoq bu hadisələrin ən vacib məqamı ola bilər” Eldəniz Quliyev: “Atılan addımı mütərəqqi sayıram və əminəm ki, bunun siyasi qütblərin yaxınlaşmasına müsbət təsiri ola bilər”
Ölkə başçısının imzaladığı son əfv fərmanı ilə adları problemli məhbuslar kimi qeyd olunan çoxlu sayda şəxsin azad olunması siyasi arenada rəğbətlə qarşılanıb. Ən maraqlısı budur ki, indiyə qədər hakimiyyətin heç bir müsbət addımını belə təqdir etməyən radikal düşərgə nümayəndələri də son əfv fərmanını müsbət dəyərləndiriblər.
Bu müzakirələrdə həm də belə bir fikir sələndirilir ki, son vaxtlar hakimiyyətin atdığı addımlarda müxalifətə yönəlik ciddi jestlər nəzərə çarpır, müxalif cameə bunu doğru dəyərləndirməyi bacarsa, iqtidarla müxalifət arasında dialoq baş tuta bilər. Belə bir dialoqun mümkünlüyünə siyasilər necə yanaşırlar?
Radikal müxalif fikirli insanların cəmləşdiyi Milli Şuranın Koordinasiya Mərkəzinin üzvü Eldəniz Quliyev qəzetimizə bildirdi ki, iqtidarla müxalifət arasında dialoqa hər zaman ehtiyac olub: “Beynəlxalq təcrübə də göstərir ki, bir çox məsələni çözmək üçün dialoq zəruridir. Hesab edirəm ki, bunu adına konstruktiv deyilən, əslində isə iqtidarı dəstəkləyən partiyalarla deyil, real müxalif qüvvələrlə iqtidarın yüksək təmsilçiləri arasında aparmaq lazımdır. Bəli, etiraf etməliyik ki, bunun üçün hazırda real zəmin yaranıb. Son əfv sərəncamı ilə bağlı müxtəlif fikirlər səslənir. Müxalif cameədə bunu normal addım hesab edənlər də var, hər yaxşı addımı belə inkar edənlər də mövcuddur. Biz rəyləri deyil, faktı əsas götürməliyik. Fakt ondan ibarətdir ki, böyük əfv sərəncamı olub. Şəxsən mən bunu alqışlayıram. Bunu deməsəm düzgün olmaz. Amma bunu da deməliyəm ki, yarımçıqlıq var. Mən çox istərdim ki, Seymur Həzi, Asif Yusifli kimi adamların da adı həmin sərəncamda olaydı. Elə adamlar var ki, onların da azad olunması dialoq mühitinə müsbət təsir edə bilər. Bütün bunlara baxmayaraq, atılan addımı mütərəqqi sayıram və əminəm ki, bunun siyasi qütblərin yaxınlaşmasına müsbət təsiri ola bilər”.
Vətəndaş və İnkişaf Partiyasının sədri Əli Əliyev qəzetimizə bildirdi ki, hakimiyyətin son addımlarını xoş hadisə kimi dəyərləndirmək lazımdır: “İlham Əliyevin idarəçiliyi dönəmində ikinci dəfədir ki, adları siyasi məhbus kimi qeyd olunan şəxslərin azad olunması belə geniş siyahı ilə əhatə olunur. Təbii ki, yaxşı olardı bu problem tamamilə çözülsün. Avropa siyasi çoğrafisyasında təmsil olunan ölkə kimi bizim bu problemdən tam yaxa qurtarmağımız təqdirəlayiq olardı. Uzunmüddətli sərt idarəetmə fonunda belə bir addımın atılması xoş məram kimi qiymətləndirilməlidir. Davamlı olması üçün cəmiyyətdə pozitiv dəyər almalıdır. Hesab edirəm ki, bu cür addımlar tendensiya xarakteri daşımalıdır. Son iki ay ərzində biz bu tip addımların mütəmadi atıldığını görürük. Hakimiyyət cəmiyyətin müxtəlif təbəqələri ilə təmaslara cəhd edir. Dialoq da bütün bu müsbət işlərin kulminasiyası ola bilər. Çünki ölkədəki mənfi proseslərin çoxu siyasi anlaşılmazlıqdan qaynaqlanır. Dialoq bu hadisələrin ən vacib məqamı ola bilər. Çünki biz ölkəmizin bütün problemlərini öz aramızda vasitəçi olmadan həll edə bilərik. Hesab edirəm ki, dialoq çox zəruridir. Bunun üçün tərəflər addımlar atmalıdırlar. Ən əsası isə bu, hakimiyyətdən asılı olan məsələdir”.
Təəssüf ki, dəfələrlə cəhd etməyimizə baxmayaraq, YAP funksionerlərindən bu mövzuya münasibət öyrənə bilmədik.
Ancaq uzun illərdir hakimiyyətin siyasi xəttini müdafiə edən Ana Vətən Partiyasının sədri, deputat Fəzail Ağamalı hesab edir ki, demokratik cəmiyyətdə iqtidarla bərabər, müxalifətin olması çox vacib şərtdir: “Bu, ölkəmizin də inkişafı üçün ciddi bir şərtdir. Çox arzu olunandır ki, iqtidarın bu və ya digər hərəkətlərini qəbul etməyən, özü buna başqa cür yanaşan, müxalifət mövqeyində duran insanlar qanunun aliliyinə söykənərək bu fəaliyyəti göstərsinlər. Prezidentimiz hər bir vətəndaşa, məmura nümunədir. Çox yaxşı olar ki, vətəndaşımız, müxalifətçilər, məmurlar cənab Prezidentdən nümunə götürsünlər. O zaman məmur-vətəndaş münasibətlərində, siyasi münasibətlərdə daha yüksək səviyyəli sivil münasibətlər hökm sürəcək. Bu gün Azərbaycanda siyasi baxımdan qarşıdurma elementləri, demək olar ki, yox dərəcəsindədir. Müxalifət partiyalarının mütləq əksəriyyəti öz fəaliyyətini Azərbaycan qanunvericiliyi çərçivəsində qururlar, iqtidarla onların dövlətçilik baxımından hər hansı bir problemləri yaşanmır. Bu cür üstün cəhətləri, əlbəttə, unutmaq olmaz. Müxalifətlə iqtidar arasında münasibətlərin daha yüksək səviyyədə qurulması üçün bundan sonra hər iki tərəfdən yeni addımlar atıla bilər. Müxalifət iqtidara qarşı qərəzli mövqedən imtina edərək konstruktiv mövqe nümayiş etdirsə, əlbəttə, iqtidar tərəfindən də onlara doğru addımlar atıla bilər. Bizim çox ciddi problemimiz var - Qarabağ problemi. Torpaqlarımızın işğalda olması bizim hər birimizin üzərinə böyük məsuliyyət qoyur. Burada iqtidar-müxalifət anlayışı tamamilə kənara qoyulmalıdır. Birmənalı olaraq bu anlayışdan imtina edib hər birimiz işğaldakı torpaqlarımızın azad edilməsi üçün əlimizdən gələni etməliyik. Bununla bağlı iqtidarla müxalifət arasında dialoq da təşkil oluna bilər. Ölkəmizin sosial-iqtisadi inkişafı, digər vacib məsələlərlə bağlı iqtidar partiyası ilə müxalifət partiyaları arasında dialoqlar da təşkil oluna bilər. Bunlar siyasi mühit üçün də faydalı olar. Gələcəkdə bütün bunların olmasını istisna etmirəm”.
Məhəmmədəli QƏRİBLİ
